Хонандаи азиз, тавре иттилоъ доред, 22 декабри соли 2016, зимни ироаи Паём Пешвои муаззами миллат, муҳтарам Эмомалӣ Раҳмон соли 2017-ро “Соли ҷавонон” эълон намуда буданд. Инро мутахассисони соҳаи кор бо ҷавонон ва коршиносону ҷавонони кишвар ҳамчун як “соли таърихӣ”, “гардиши куллӣ” ва “оғози марҳилаи нав” дар сиёсати давлатии кор бо ҷавонон тавсиф менамуданд. Инак, мо ба фарҷоми “соли таърихӣ” расидем. Аслан, татбиқкунандаи сиёсати давлатии кор бо ҷавонон Кумитаи кор бо ҷавонон ва варзиши назди Ҳукумати Ҷумҳурии Тоҷикистон аст ва барои ҳамин дар сархати татбиқи кулли нақша-чорабиниҳои “Соли ҷавонон” қарор мегирад. Аз ин рӯ, дар фарҷоми “Соли ҷавонон” доир ба ҳадафи эълон доштани он аз ҷониби Пешвои муаззами миллат, мазмуну моҳияташ, нақши он дар ҳаёти ҷавонон ва умуман, мавқеи ҷавонон дар ҷомеа бо раиси Кумитаи кор бо ҷавонон ва варзиши назди Ҳукумати ҷумҳурӣ Аҳтам Абдуллозода Рустам мусоҳибае доштем, ки инак фишурдаи он манзуратон мешавад.

- Бо пешниҳоди Пешвои миллат, муҳтарам Эмомалӣ Раҳмон соли 2017 “Соли ҷавонон” эълон гардид. Дақиқан, ин ташаббус дар тамоми кишварҳои дунё бесобиқа аст. Чанд сухан доир ба ин иқдом мегуфтед...

- Асосгузори сулҳу ваҳдати миллӣ – Пешвои муаззами миллат, муҳтарам Эмомалӣ Раҳмон аз рӯзи аввали соҳибистиқлолӣ дар паи баррасии мушкилии ҷавонон ва дарёфти роҳҳои ҳалли онҳо буданд. Дар баробари ин дар баргузории шӯроҳо фикру андешаи худи ҷавононро мешуниданд ва баҳри татбиқи ташаббусҳошон мусоидат менамуданд. Муҳтарам Ҷаноби Олӣ аллакай дар рӯзи 70-уми Роҳбари давлат интихоб шуданашон маҳз бо ҷавонон вохӯрӣ намуда буданд. Дар баробари он ки мулоқотҳои ҳамасолаи Пешвои миллат бо ҷавонон доир мегардад,таҷрибаи дар ҳар як сафар ба минтақаҳои кишвар мулоқот доир намудан бо ҷавонон, шунидани андешаҳои онҳо, дастгирӣ кардан аз ташаббусҳояшон, дастгирӣ кардан аз таълиму тарбия ва таҳсилашон, то ҳадди дастгирӣ ёфтан барои хонадоршавӣ, бо манзили зист ва ҷои кор таъмин кардан як услуби хоси муносибати Роҳбари давлат бо ҷавонони кишвар мебошад. Дар баробари сафарҳои дохилӣ, дар ҳар як сафари хориҷиашон Ҷаноби Олӣ бо донишҷӯёну ҷавонони дар дигар кишварҳо таҳсилу кор мекарда мулоқот доир мекунанд, онҳоро ба баланд бардоштани эҳсоси ватандӯстӣ, такмили ихтисос, савияи дониш, баргашта ба Ватан хизмат кардан ва дар баробари кору фаъолият дар хориҷи кишвар муаррифӣ кардани миллату давлати тоҷик ҳидоят месозанд. Аз ҳамин муносибати доимии Пешвои миллат нисбати ҷавонон хулоса кардан мумкин аст, ки эълони “Соли ҷавонон” иқдоми яку якбораи Роҳбари давлат нест. Ин идомаи мантиқии сиёсати Пешвои муаззами миллат барои дастгирии ҷавонон аст, ки лаҳза ба лаҳза, моҳ ба моҳ ва сол ба сол густариш ёфта истодааст. Соли 2016 Шӯрои миллии кор бо ҷавонон дар назди Президент таъсис ёфт, соли 2017 бошад, пурра ба ҷавонон бахшида шуд. Дар Паёми имсолаашон бошад, таъкид намуданд, ки ғамхории Ҳукумати кишвар ба ҷавонон бо “Соли ҷавонон” маҳдуд намегардад. Минбаъд низ Ҳукумат ҷавононро дар меҳвари сиёсати худ қарор медиҳад ва пайваста аз ин қишри ояндасоз ҷонибдорӣ менамояд.

- “Соли ҷавонон” аз ҷониби ҷавонон чӣ гуна пазироӣ гардид?

- Рӯзи 22 декабри соли 2016, ҳамон лаҳзае, ки Пешвои муаззами миллат, дар Паёмашон соли 2017-ро “Соли ҷавонон” эълон намуданд, тамоми вуҷуди моро ҳам шодию нишот ва ҳам масъулияти басо бузург фаро гирифт. Суханони Сарвари давлат то ҳанӯз ва фикр мекунам як умр дар ҳастии мо ҳамчун ифтихори бузург садо медиҳад. Дар ҳамон лаҳзаҳо тамоми ҷавонони шаҳри Душанбе иштирокчиёни Паёмро дар берун интизор буданд. Онҳоро бо ширинӣ, варақаҳо, бо газетаҳо ва бо табрикномаҳо муборакбодӣ мекарданд Худи ҳамон рӯз аллакай дар кӯчаҳои шаҳри Душанбе, дар хиёбонҳои дигар шаҳру навоҳии вилоятҳо ҷавонон ба кӯча баромада, якдигарро табрик намуда, шодиву нишот мекарданд, ки соли 2017-ро Ҷаноби Олӣ ба мо бахшиданд. Онҳо медонистанд ва бори дигар умқан дарк намуданд, ки пуштибони онҳо маҳз Сарвари давлат аст. Аз ҳамон лаҳза дар афкорашон нақшаи чорабиниҳо ва дар замирашон масъулияти дар сатҳи баланд баргузор гардидани Соли ҷавонон тарҳрезӣ гардид. Дар ҳар як шаҳру ноҳия ҷавонон алоҳида ҷамъ шуда, миннатдории худро бо муроҷиатномаҳо ба Пешвои миллат иброз мекарданд. Мушоҳида гардид, ки ба шодиву нишоти ҷавонон тамоми қишрҳои ҷомеа ҳамроҳ гардиданд. Волидон аз шодии фарзандон хушҳол гардиданду устодон аз хурсандии шогирдон.

- Ба фаъолияти ҷавонон дар “Соли ҷавонон” баҳои чанд медиҳед?

- Бе ягон муҳобот баҳои панҷ. Зеро ҷавонони тоҷик беҳтарин ҷавонони рӯи дунё ҳастанд. Онҳо ҳамчун қувваи баору номус дар замирашон нисбати Ватан меҳру муҳаббати самимӣ дошта, ба арзишҳо ва муқаддасоти миллӣ арҷ мегузоранд, ба ҳаёт нигоҳи ҷиддӣ дошта, дар дил орзуҳои зебои инсониро мепарваранд ва ҳамчун пайравони асили Пешвои миллат созандаю бунёдкор мебошанд. “Соли ҷавонон” нигоҳи ҷавононро ба зиндагӣ ҷиддӣ кард. Ҳар як ҷавоне, ки дар пайроҳаи “Соли ҷавонон” қадам гузошт, ӯ ҷавонмарди миллату давлат ва хонадони худ буд.

Дар тамоми самтҳо ҷавонони мо худро ба хубӣ муаррифӣ намуданд. Чӣ дар ҷодаи илму маърифат, чӣ дар ҷодаи санъату фарҳанг ва чӣ дар ҷодаи варзиш ва майдонҳои бузурги варзишӣ. Зиёда аз 30 ҷавони тоҷик дар олимпиадаҳои ҷаҳонӣ аз фанҳои дақиқ сазовори медали тилло шуда, садҳои дигар сазовори ҷойҳои ифтихорӣ гардиданд.

Аммо бар замми ин баҳои асосиро ҷомеа медиҳад. Бояд волидони ҷавонон баҳо диҳанд, ки онҳо дар ин сол чӣ қадар фаъолият доштанд. Давлату миллат баҳо медиҳад, ки онҳо дар соли ҷорӣ чӣ корҳоеро ба анҷом расониданд.

- Дар “Соли ҷавонон” дар аксар вазифаҳои роҳбарикунандаи мақомоту идораҳо ҷавонон таъин гаштанд. Саҳми ҷавононро дар вазифаҳои роҳбарикунанда чӣ гуна баҳо медиҳед?

- Дар давоми солҳои соҳибистиқлолӣ таваҷҷуҳи Пешвои миллат ба кадрҳои ҷавон ба маротиб афзуд. Бо назардошти қувваи ҷисмонӣ ва нерӯи зеҳнии ҷавонон мавқеи онҳо дар хизмати давлатӣ ба маротиб мустаҳкам шуд. Дар доираи сиёсати кадрии Пешвои муаззами миллат ҷавоникунонии ҳайати кадрӣ аз ҳисоби ҷавонон рӯ ба инкишоф ниҳод. Дар вазорату идораҳо, мақомоти иҷроияи ҳокимияти давлатӣ ва дигар ташкилоту муассисаҳо масъалаи ба вазифаҳои пурмасъул таъин намудани ҷавонони фаъолу ташаббускор ба ҳукми анъана даромад.Ҷавонони роҳбар аз замони таъин шуданашон ба вазифаҳои роҳбарикунанда содиқ будани худро тавассути кор ва фаъолияти пурсамар нишон доданд.

Ҷавонон, дар воқеъ, қишри ояндасози кишвар буда, иштироки онҳо дар ҳаёти иқтисодӣ, сиёсӣ, фарҳангӣ ва ҷамъиятӣ боиси рушди мамлакат мегардад. Имрӯзҳо шояд соҳае дар кишвар мавҷуд набошад, ки дар он фаъолияти ҷавонон ба назар нарасад. Ин қишри ҷомеа дорои имконияти бузурги зеҳниву ҷисмонӣ буда, соҳиби нерӯи созандагиву бунёдкорӣ, илму дониш, донандагони забонҳои хориҷӣ ва технологияи замонавӣ ба ҳисоб мераванд. Таҷрибаи корҳои созандагиву бунёдкории ҷавонон дар давраи соҳибистиқлолӣ нишон дод, ки ҷавонон дар пешрафти тамоми соҳаҳои ҳаёти ҷомеа иштироки фаъолона дошта, сиёсати пешгирифтаи Ҳукумати Ҷумҳурии Тоҷикистон, Пешвои миллатро ҳамеша ҷонибдорӣ менамоянд ва дар раванди он худ бевосита ширкат ва саҳмгузорӣ мекунанд. Дар шароити сиёсии ҷаҳони имрӯз ягон давлатро бе нерӯи ҳарбӣ ва мудофиавӣ тасаввур кардан ғайриимкон аст. Соҳиби артиши дорои иқтидори баланд амнияту суботи давлатро кафолат дода, заминаи пешрафту ободии кишварро фароҳам меорад. Захираи бузурги чунин артишро ҷавонони аз лиҳози ҷисмонӣ далеру тавоно ва бомаърифату босавод ташкил медиҳанд. Дар ин самт имрӯзҳо ҷавонони далеру шуҷои тоҷик бо дарки қарзи шаҳрвандии хеш дар назди Модар-Ватан, барои таҳкими Ваҳдати миллӣ ва ҳифзи суботи сиёсӣ дар кишварамон дар сафҳои Қувваҳои Мусаллаҳи Ҷумҳурии Тоҷикистон ва дигар мақомоти ҳифзи ҳуқуқ адои хизмат менамоянд. Маҳз ин ҷавонон бо хизмати хеш дар роҳи таъмини амнияти кишвар ва таҳкими соҳибистиқлолии Тоҷикистон саҳми арзандаи ҷавонмардии худро гузошта, барои насли наврас дарси ибрат мебошанд. Маҳз чунин ҷавонон на танҳо бо шиор ва сухан, балки амалан бо ҷону дил ва амали хеш дар ҳифзу ҳимояи Ватан хизмати ҷавонмардона намуда, мактаби бузурги ватандӯстии Пешвои миллатро ҳамчун сабақи бузург дар зиндагӣ маншаи кори худ қарор додаанд.

- Кумитаи кор бо ҷавонон ва варзиш ҷиҳати дар сатҳи баланд ҷашн гирифтани “Соли ҷавонон” чӣ қадар чорабиниҳоро гузаронид?

- Кумитаи кор бо ҷавонон ва варзиш дар доираи эълон гардидани соли 2017 “Соли ҷавонон”, ки имконияти фаррох баҳри таҳкими асосҳои меъёрию ҳуқуқӣ ва заминаи методию иттилоотӣ, татбиқи барномаҳои соҳавӣ, дастгирии иҷтимоию иқтисодии ҷавонон, тарғиби тарзи ҳаёти солим, пешгирии омилҳои номатлуб, ахлоқи ҳамида ва фарҳангдӯстию меҳанпарастии ҷавонон тавассути баргузории чорабиниҳои фарҳангию оммавӣ, тарбияи ҷисмонӣ ва варзиш, муносибатҳои байнисоҳавию байналмилалӣ дар доираи қонуну санадҳои танзимкунанда фаъолияти худро ба роҳ монд.

Аз лаҳзаи аввале, ки “Соли ҷавонон” эълон гардид, маҳз як ҷавони ташаббускор ва хайрхоҳ нисбати насли ҷавон президенти Федератсияи футболи Тоҷикистон, муҳтарам Рустами Эмомалӣ иқдом намуданд, ки тамоми чорабиниҳои “Соли ҷавонон”-ро зери сарпарастии худ мегиранд. Дар доираи сарпарастии муҳтарам Рустами Эмомалӣ зиёда аз 5 ҳазор чарабиниҳо бо иштироки 1,5 млн. нафар ҷавонон баргузор шуданд.

Ҳамин тариқ, дар соли 2017 аз ҷониби Кумита, сохторҳои маҳаллӣ, ташкилотҳо дар ҳамкорӣ бо вазорату идораҳои дахлдор дар самти татбиқи сиёсати давлатии кор бо ҷавонон 17036 чорабинӣ, бо фарогирии 4 миллиону 064 ҳазору 549 нафар наврасону ҷавонон баргузор гардиданд.

Дар ин замина, дар соҳаи тарбияи ҷисмонӣ ва варзиш, таҳкими тарзи ҳаёти солим ва оммавияти он низ дар ин давра 7836 чорабинӣ баргузор гардидааст, ки 2 745 999 нафар фаро гирифта шуда, аз ин шумора 537130 нафарашонро бонувон ташкил медиҳанд.

Дар маҷмуъ, дар “Соли ҷавонон” дар кишвар дар соҳаи кор бо ҷавонон ва варзиш 24 ҳазору 872 чорабинӣ бо фарогирии 6 миллиону 810 ҳазору 545 нафар баргузор карда шудааст.

- Хотирмонтарин лаҳзаҳо дар “Соли ҷавонон” аз нигоҳи Шумо?

- Хотирмонтарин лаҳза аз нигоҳи ман 22 декабри соли 2016 аст, ки аз ҷониби Пешвои миллат соли 2017-ро “Соли ҷавонон” эълон намуданд. Ин эҳсосотро бо ягон сухан ва бо ягон забони рӯи дунё маънидод кардан номумкин аст.

Лаҳзаи дигари хотирмон ин бо шукӯҳу шаҳомати хосса аз ҷониби сарпарасти “Соли ҷавонон” муҳтарам Рустами Эмомалӣ дар пойтахти кишварамон шаҳри Душанбе ташкил намудани шоу-консерти идона бахшида ба Рӯзи ҷавонони Тоҷикистон буд, ки Пешвои миллат ба чорабинии ҷавонон худашон ташриф оварданд. Дар таърихи сиёсати давлатии ҷавонон ин баландтарин сатҳи чорабинии фарҳангӣ барои ҷавонон буд. Ва дар ибораи “Ҷовидон бод, ҷавонӣ ва ҷавонони Тоҷикистон”, ки Пешвои муаззами миллат иброз намуданд, тамоми меҳру ихлоси Сарвари давлат нисбат ба ҷавонони Тоҷикистон ва ҷаҳониён инъикос ёфт.

Агар дар умум нигарем, дар доираи нақшаи чорабиниҳое, ки аз ҷониби Пешвои миллат тасдиқ гардид, 365 рӯзи “Соли ҷавонон” барои мо хотирмон буд. Ин 365 рӯз то абад дар ёду хотири мо бо ҳарфҳои заррин нақш хоҳад баст.

- Асоси муваффақиятҳои ҷавононро корнамоиҳои варзишгарон ташкил медиҳанд. Аз назари Шумо ҳамчун нафари масъули соҳа, таҳаввулоти асосии “Соли ҷавонон” дар самти варзиш кадом буд?

- Беҳтарин чеҳраи варзиши сол Беҳрӯз Хоҷазода аст. Пешвои муззами миллат зимни сафарашон ба вилояти Суғд иброз доштанд, ки пирӯзии Беҳрӯз Хоҷазода дар сабқати ҷаҳонии самбо беҳтарин дастоварди “Соли ҷавонон” маҳсуб меёбад. Бо шарофати чорабиниҳои варзишии “Соли ҷавонон” ва иқдомҳои бунёдкоронаи раиси шаҳри Душанбе, муҳтарам Рустами Эмомалӣ, ки аксар раисони шаҳру ноҳияҳо ба шаҳрдории Душанбе пайравӣ намуда, майдончаҳои зиёди варзишӣ бунёд намуданд, ин худ як таҳаввулот аст. Аз ҷониби дигар, дар соли 2017 нисбати солҳои қаблӣ варзишгарони мо Тоҷикистони азизамонро дар арсаи байналмилалӣ даҳҳо маротиба зиёд муаррифӣ намуданд. Чорабиниҳои варзишию оммавигардонии “Соли ҷавонон” буд, ки варзишгарони мо заминаи хуби омодашавиро ба мусобиқаҳои сатҳи байналмилалӣ гирифтанд. Бори нахуст тими мунтахаби самбочиёни кишвар дар Чемпионати ҷаҳон, ки дар шаҳри Сочии Русия баргузор гардид, миёни 93 давлати дунё аз ҳисоби умумидаставӣ дар зинаи дуюм қарор гирифт. Мунтахаби миллии футболи занонаи Тоҷикистон бори аввал дар таърихи худ шомили раддабандии Федератсияи футболи умумиҷаҳонӣ (ФИФА) шуд, тими “Истиқлол” бори дуюм сазовори медалҳои нуқраи Ҷоми AFC (Конфедератсияи футболи Осиё)-2017 гардид. Дастаи мунтахаби Тоҷикистон дар Мусобиқоти интихобии қаҳрамонии футболи Осиё-2019 дар гуруҳи “F” дар зинаи сеюм бо 7 имтиёз аз 5 бозӣ (таносуби тӯбҳо – 9-7) қарор гирифт. Мунтахаби ҷавонони Тоҷикистон бо 10 имтиёз дар ҷадвали гурӯҳи “В” мақоми аввалро касб кард ва ба марҳилаи ниҳоии Мусобиқоти қаҳрамонии футболи Осиё-2018 роҳ ёфт. Дастаи мунтахаби футзали кишвар низ ба даври ниҳоии Ҷоми Осиё -2018 роҳхат ба даст овард. Дастаи мунтахаби занонаи футболи Тоҷикистон низ роҳхати Мусобиқаи интихобии қаҳрамонии Осиё–2018, ки аз 3-юм то 12-уми апрели соли 2018 доир мегард, дар соли 2017 ба даст оварданд. Инчунин, натиҷаҳои дигаре, ки дар ин соли таърихӣ ба Ватан оварда шуд, аксар таърихӣ буданд. Баъди 42 сол ба Беҳрӯз Хоҷазода муяссар гардид, ки дар “Соли ҷавонон” медали тиллои самбои ҷаҳонро ба кишвар оварад. Дар Бозиҳои Осиё дар толори болопӯшида, ки дар кишвари Туркманистон баргузор гардид, варзишгарони тоҷик бори аввал соҳиби 52 медал гардиданд. Дар “Соли ҷавонон” варзишгарони кишвар аз мусобиқаҳои байналмилалӣ 425 медал вориди хазинаи варзишии кишвар намуданд, ки аз ин 121-тоашро тилло, 116-тоашро нуқра, 188-тоашро биринҷӣ ташкил медиҳад.

- Аксар варзишгарон аз он хурсанд буданд, ки бахшида ба “Соли ҷавонон” теъдоди мусобиқаҳои варзишӣ зиёд шуд ва ин заминаи хуби омода шудани онҳо ба мусобиқаҳои байналмилалӣ гардид. Оё теъдоди мусобиқаҳои варзишӣ дар соли 2018 нисбат ба соли қаблӣ зиёд мешавад?

- Дар “Соли ҷавонон”, воқеан ҳам, чорабиниҳои варзишии мо зиёд буд. Мо ҳар як соат ва дақиқаи “Соли ҷавонон”-ро бе чорабинӣ нагузаронидем. Метавон гуфт, ки нисбати солҳои қаблӣ варзиши тоҷик даҳчанд оммавӣ гардид, вале ин ҳама моро қаноатманд намекунад. Кумита алаккай нақша-чорабиниҳоро барои соли оянда омода карда истодааст ва кӯшиш мекунем, ки эстафетаи “Соли ҷавонон”-ро аз даст надиҳем. Дар соли 2018 чорабиниҳои Кумита дар самти оммавигардонии варзиш зиёд мешаваду кам не. Зеро Пешвои муаззами миллат дар Паёми имсолаашон дар самти оммавирадонии варзиш ва тарғиби тарзи ҳаёти солим таъкид намуданд ва ин нуктаро мо сармашқи кори Кумитаи кор бо ҷавонон ва варзиш дар соли 2018 қарор медиҳем ва кӯшиш мекунем, ки дар соли 2018 варзишро аз ин ҳам зиёд миёни аҳолии кишвар оммавӣ намуда, дар ҳифзи генофонди миллӣ тавассути варзиш саҳми худро гузорем.

- Ба андешаи Шумо “Соли ҷавонон” то чӣ андоза дар оммавигардонии варзиш дар кишвар таъсир гузошт?

- Барои оммавигардонии варзиш чорабиниҳои зиёд, аз ҷумла машқҳои пагоҳирӯзӣ, тарғиби варзиш ба воситаи видеороликҳо тариқи телевизион, веломарафон, ду маротиба дави миллӣ доир намудем. Маҳз таҳти сарпарастии муҳтарам Рустами Эмомалӣ бо мақсади эҳё, рушд ва амалигардонии бозиҳои миллии варзишӣ ва тарбияи насли наврас дар руҳияи эҳтиром ва арҷгузорӣ ба таъриху анъанаҳои миллии аҷдодон, баргузории ҳамасолаи Фестивали бозиҳои миллии варзишӣ дар се марҳила (маҳаллӣ, минтақавӣ ва миллӣ) дар остонаи таҷлили иди байналмилалии Наврӯз (марҳилаи якум), Ваҳдати миллӣ (марҳилаи дуюм) ва ҷашни Истиқлолияти давлатӣ (марҳилаи сеюм) тасдиқ гардид.

Ҳамин тавр, марҳилаи якум ва дуюми Фестивали бозиҳои миллии варзишӣ дар вилоят, минтақа ва шаҳру ноҳияҳои ҷумҳурӣ аз рӯи 8 намуди варзиш баргузор гардид, ки дар ин чорабиниҳо зиёда аз 26991 (бистушаш ҳазору нӯҳсаду наваду як) нафар варзишгар ва 652355 (шашсаду панҷову ду ҳазору сесаду панҷову панҷ) нафар тамошобинону дӯстдорони соҳаи варзиш иштирок намуданд.

Маросими ҷамъбасти солонаи фестивали мазкур бошад, дар шаҳри Душанбе бо иштироки 500 варзишгар ва 15 ҳазор мухлиси варзиш бо як шукӯҳу шаҳомати хосса таҷлил гардид. Дар умум, дар се марҳилаи Фестивали бозиҳои миллии варзишӣ, ки дар “Соли ҷавонон” дар саросари кишвар роҳандозӣ гардид, 27491 (бисту ҳафт ҳазору чорсаду наваду як) нафар варзишгар ва 665355 (шашсаду шасту панҷ ҳазору сесаду панҷову панҷ) нафар ҳаводорони варзиш ширкат намуданд, ки ин аз оммавияти варзиш дар кишвар дарак медиҳад.

- Барои кадом чорабинӣ ва иқдоми пешгирифтаатон дар “Соли ҷавонон” вақт маҳдуд шуду он ба соли 2018 боқӣ монд?

- Тамоми идея ва мақсадҳои “Соли ҷавонон” то дараҷае барои мо муқаддас ва гаронарзишанд, ки онҳо барои даҳсолаҳои дигар идома меёбанд. Он мақсадҳоеро, ки Пешвои миллат дар “Соли ҷавонон” дар пеши мо гузоштанд, мантиқи басо баланд ва дурнамои хеле зиёд доранд. Бо шаклу услуби нав баргузор кардани фестивалу озмунҳо ва дигар чорабиниҳои маърифатию фарҳангӣ миёни ҷавонон, тарҳрезии лоиҳаҳои нав, аз қабили “Меҳмонии ҷавонон”, “Дар меҳмонии ректор”, таъсиси мактаби “Пайравони Пешвои миллат” дар назди Кумитаи кор бо ҷавонон ва варзиш, дар сартосари кишвар таъсис додани рушди шабакаи волонтёрӣ, таъсиси Маҳфили технологҳои ҷавон, Маҳфили адибони ҷавон, Шӯрои духтарон, Маҳфили ҳаҷвнигорони ҷавон дар назди Кумита идеяҳои наве мебошанд, ки дар “Соли ҷавонон” роҳандозӣ гардиданд. Ва ин идеяву тасмимҳое, ки дар “Соли ҷавонон” тавлид гардиданд, дар тамоми давру замон аз ҷониби мо – масъулони Кумита амалӣ гардонида мешаванд.

Ба андешаи шахсии ман “Соли ҷавонон” бениҳоят вақти кам дошт. Баъзан орзу мекардем, ки кош як шабонарӯзи мо 50-100 соат бошад, то барои амалӣ намудани нақшаҳоямон вақт кифоягӣ кунад. Вале як нуқта барои мо муқаддас аст, ки таҳти назари неки Пешвои миллат ва чунин як сиёсати хирадмандона тамоми солу моҳ барои тамоми миллати тоҷик ҳамчун айёми зебои даврони ҷавонӣ боқӣ мемонад.

- Зиракии сиёсии ҷавонони кишварро чӣ гуна баҳогузорӣ мекунед? Оё ҷавонони мо ба қадри даркорӣ аз равандҳои сиёсӣ огоҳанд?

- Танҳо кам гардидани гаравиши ҷавонон ба ҳаракатҳои тундгаро, огоҳ будани ҳар як оилаи тоҷик аз оқибатҳои шомил шудан ба ҳизбу ҳаракатҳои иртиҷоӣ, пешгирии ҷинояткорӣ, кам гардидани ҷинояткорон аз ҳисоби наврасону ҷавонон, баланд гардидани эҳтиром нисбати калонсолон, гиромӣ доштани арзишҳои миллӣ, муқаддас шуморидани фарҳанги миллӣ ва даҳҳо хислатҳои дигар имрӯз дар ҷавонони тоҷик дида мешавад, ки аз зиракии сиёсии онҳо дарак медиҳад. Ҳар як лаҳзае, ки мо бо ҷавони тоҷик суҳбат мекунем, онҳо бо як меҳру муҳаббат ва масъулияти баланд гапи моро гӯш мекунанд. Дар ин ҷараён кору заҳмати мақомоти ҳифзи ҳуқуқи кишвар, дигар вазорату идораҳо ва ниҳодҳои ҷомеаи шаҳрвандӣ низ сазовори таҳсин аст. Вақте ки мо дар оромгоҳҳо аксияи “Ба гузаштагони худ эҳтиром мегузорем”-ро гузаронидем, он дар замири ҳар як ҷавон ҳисси эҳтиром ба гузаштагонро бедор намуд. Вақте аксияи “Салом, модар! Ман туро дӯст медорам.”-ро баргузор кардем, дар ҳамагӣ ду ҷумла чӣ қадар меҳру муҳаббат миёни фарзандону волидон афзуд. Зиракии сиёсии ҷавони тоҷик дар доираи сиёсати пешгирифтаи Пешвои миллат бо назардошти фароҳам овардани шароитҳои мусоид батадриҷ боло рафта истодааст. Кумитаи кор бо ҷавонон ва варзиш баланд бардоштани зиракии сиёсии ҷавонони тоҷикро вазифаи аввалиндараҷаи худ медонад. Дар баробари ин, тамоми вазорату идораҳо дар ин самт ҳамарӯза кор карда истодаанд. Ва баҳри расидан ба ҳадафҳои худ мо чандин чорабиниҳо баргузор намудем ва ин раванд минбаъд низ идома меёбад.

- “Соли ҷавонон” бо кадом хусусиятҳояш аз солҳои қаблӣ фарқкунанда буд?

- Умуман, ҷавонони тоҷик дар асл, насли хушбахту саодатманд мебошанд, чунки онҳо аз лаҳзаҳои аввали соҳибистиқлолии кишвар то имрӯз аз ғамхорӣ, меҳру муҳаббати беандоза ва дастгириҳои беназири Пешвои муаззами миллат баҳравар ҳастанд. Имсол барои ҷавонон соли хеле муҳиму фарқкунанда ва фаромӯшношуданӣ буд. Эълон гардидани соли 2017 ҳамчун “Соли ҷавонон” нишонаи олии дар меҳвари сиёсати иҷтимоии Ҳукумати кишвар қарор доштани ҷавонон буда, дар ҳаёти онҳо ҳамчун соли тарҳрезӣ ва банақшагирии орзуҳои зебо, устувории мавқеашон дар ҳаёти сиёсӣ ва иҷтимоию иқтисодии кишвар, инчунин, масъулияти басо бузургашон дар ободию созандагии Ватани маҳбуб ҷовидона боқӣ мемонад. Аз аввали солҳои соҳибистиқлолӣ ба ҷавонон диққати махсус дода мешавад. Ҷиҳати фарқкунандаи соли мазкур аз солҳои қабл ин буд, ки дар “Соли ҷавонон” дар партави сиёсати хирадмандонаи Пешвои миллат ба ин қишри ояндасози ҷомеа таваҷҷуҳи дучанд зоҳир гардид, ки тамоми сохторҳои кишвар баҳри дар сатҳи баланд ҷашн гирифтани ин соли таърихӣ фаъолияти худро ба роҳ монданд. Ҳамин гуна таваҷҷуҳу иқдомҳо буд, ки дар “Соли ҷавонон” Кумитаи кор бо ҷавонон ва варзиш 24872 чорабинӣ бо фарогирии 6 810 545 нафар баргузор намуд.

- Ба фикри Шумо Кумита ба таври бояду шояд ва дар сатҳи зарурӣ ин солро ҷашн гирифта тавонист, ё шояд иқдому ташаббусҳое низ доштед, ки дар “Соли ҷавонон” амалӣ гардонида натавонистед?

- Дар тамоми чорабиниҳое, ки мо гузаронидем, ҳадаф ин муттаҳид намудани ҷавонон дар атрофи арзишҳои миллӣ, муқаддас шуморидани Ватану ватандорӣ, масъулияти баланд доштан баҳри аз худ кардани донишҳои замонавӣ, эмин будан аз ҳар гуна ҷараёнҳои номатлуби ҷомеа ва таъмин намудани мустақилияти ҳаётии ҷавонон буд. Дар маҷмуъ, дар баргузории чорабиниҳо мо тавонистем, ки зиёда аз 6 млн. нафарро фаро гирем. Албатта, инсон ба пуррагӣ аз фаъолияти худаш ҳеҷ гоҳ қаноатманд нест. Аммо бо чоп ва тақсим кардани садҳо ҳазор маводи иттилоотӣ, бо дастрасӣ аз рӯзномаи “Ҷавонони Тоҷикистон”, сомонаи рӯзномаву Кумита ва фаъол будан дар шабакаҳои иҷтимоӣ тавонистем, ки ҳамарӯза бо ҷавонони тоҷик дар тамос бошем. Мо дар “Соли ҷавонон” кӯшиш кардем, ки ҳам бо ҷавонони тамоми касбу кор, ҳам ятиму маъюбон, ҳам нафарони дар хориҷи кишвар буда ва ҳам бо нафарони душвортарбия кор кунему дар иртибот бошем. Фикр мекунам, мо тавонистем, ки дар ин самт баъзе корҳои асосиро ба анҷом расонем.

Тамоми иқдомҳое, ки ҷиҳати дар сатҳи баланд таҷлил намудани соли 2017 ҳамчун “Соли ҷавонон” ба нақша гирифта будем, хеле дар сатҳи олӣ баргузор гардиданд. Кумита бо дарки он ҳама масъулияте, ки дар соли мазкур ба зимаи хеш дошт, бо тамоми нерӯ талош намуд, то онро хотирмону фаромӯшношуданӣ сипарӣ созад.

- Роҳбари давлат дар Паёмашон аз вазъи ногувори ҷомеаи ҷаҳонӣ, бахусус терроризму экстремизм изҳори нигаронӣ карданд. Ва аксари онҳое, ки фирефтаи гурӯҳҳои ифротӣ мешаванд, ҷавононанд. Кумитаи кор бо ҷавонон ва варзиш дар ин самт чӣ роҳҳо ва иқдомҳои наверо дар соли 2018 роҳандозӣ менамояд?

- Дар мулоқотҳои хеш Президенти мамлакат доир ба масъалаи ҷавонон суханронӣ намуда, мудом таъкид менамоянд, ки ояндаи кишвар дар дасти ҷавонон аст. Дар воқеъ, ҷавонон яке аз қишрҳои фаъоли ҷомеа ба ҳисоб мераванд ва рушди минбаъдаи ҷумҳурӣ аз ҷавонон вобастагии калон дорад. Хатаре, ки имрӯз на танҳо ба ҷомеаи Тоҷикистон, балки ба ҷомеаи ҷаҳонӣ таҳдид менамояд, ин шомилшавии ҷавонон ба равияҳои гуногуни экстремистӣ мебошад, ки аъзоёни он бо мақсади ҷудоиандозӣ дар байни мардум ва ангехтани иғвою дасиса миёни мардуми кишварҳои ҷаҳон талош менамоянд. Кумитаи кор бо ҷавонон ва варзиш дар барнома ва нақшаҳои соли 2018 чорабиниҳои гуногунро ҷиҳати пешгирии шомилшавии ҷавонон ба гурӯҳҳои ифротӣ баргузор хоҳад кард. Инчунин, корҳои фаҳмондадиҳӣ дар миёни ҷавонон ҷоннок карда хоҳад шуд. Доир ба масъалаи терроризму ифротгароӣ Пешвои миллат дар Паёми навбатиашон зикр намуданд, ки “Дар ҳамкорӣ бо Созмони Милали Муттаҳид, Иттиҳоди Аврупо, Созмони Амният ва Ҳамкорӣ дар Аврупо ва дигар шарикони рушд моҳи майи соли 2018 дар Душанбе баргузории Конфронси байналмилалии сатҳи баланд дар мавзӯи муборизаи муштарак бо терроризму ифротгароӣ ва тундгароии хушунатомез ба нақша гирифта шудааст”. Бовар дорам, ки ин ҳамоиши бузург дар роҳи мубориза бо терроризму ифротгароӣ як гардиши куллиеро ба миён хоҳад овард.

- Кӯтоҳ таассуроти Шумо аз Паёми имсолаи Президенти кишвар ба Маҷлиси Олии Ҷумҳурии Тоҷикистон...

- Дар Паёми имсолаашон Президенти кишвар, Ҷаноби Олӣ, муҳтарам Эмомалӣ Раҳмон тамоми паҳлӯҳои сиёсати давлатӣ дар соҳаҳои хоҷагии халқро мавриди таҳлили амиқ қарор дода, дар иртибот ба масъалаҳои иҷтимоӣ таъкид намуданд, ки “бо дарназардошти саҳми созандаи ҷавонон дар мамлакат мо соли 2017-ро “Соли ҷавонон” эълон намудем. Ин иқдом дар татбиқи сиёсати давлатӣ оид ба дастгирии ҷавонон нақши назаррас бозид. Ташаббуси мазкур, инчунин, барои боло рафтани ҳисси ватандӯстӣ, ташаккули тафаккури ҷавонон оид ба масъалаҳои ифтихори миллӣ ва худогоҳиву худшиносӣ такони ҷиддӣ бахшид. Боиси қаноатмандист, ки ҷавонони бонангу номус ва боиродаи мо ҳамчун нерӯи созанда дар маъракаҳои муҳими давлативу ҷамъиятӣ фаъолона иштирок карда, дар корҳои ободонӣ ва бунёдкорӣ ҳиссаи сазовор гузошта истодаанд. Ғамхории Ҳукумат нисбат ба ҷавонон танҳо бо “Соли ҷавонон” маҳдуд намешавад. Баръакс, ҳалли масъалаҳои вобаста ба наврасону ҷавонон минбаъд низ самти муҳимтарини фаъолияти мо хоҳад буд”. Ин таъкидҳо аз як тараф ифодагари оғоз шудани марҳилаи нави сиёсати давлатии кор бо ҷавонон ва ғамхорӣ нисбати ин қишри фаъоли ҷомеа буда, аз ҷониби дигар ин суханон бори дигар аз меҳру муҳаббати самимии Пешвои миллат нисбат ба насли наврасу ҷавони кишвар гувоҳӣ медиҳад, ки масъулияти ҳар як корманди мақомоти кор бо ҷавононро баҳри дар сатҳ ва сифати баланд иҷро намудани вазифаҳои хизматӣ ва ҳар як ҷавони кишварро ҷиҳати содиқона амалӣ намудани рисолати фарзандиашон дар назди Ватан тақозо менамоянд. Боварии комил дорам, ки мо якҷо, таҳти сиёсати хирадмандони Сарвари давлат баҳри боз ҳам ободу зебо кардани Ватани маҳбубамон тадбирҳои зарурӣ меандешем.

- Барои як суҳбати самимӣ ва пурмуҳтаво ба Шумо изҳори миннатдорӣ менамоем.