Дар шаҳри Хуҷанд, санаи 9 июл, ҳамоиши гирандагони стипендияҳои Президентӣ таҳти унвони “Пайравони Пешвои миллатем” баргузор гардид.

Дар ҳамоиш раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдуллозода Аҳтам Рустам ва муовини раиси вилояти Суғд Баҳодурзода Баҳоваддин иштирок ва суханронӣ намуданд.

Аҳтам Абдуллозода, раиси Кумитаи кор бо ҷавонон ва варзиш зимни баромади хеш иброз дошт, дар заминаи сиёсати хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ҷавонон дар самтҳои мухталифи соҳаҳои иқтисодию иҷтимоии кишвар пайваста дастгирӣ ёфта, сиёсати давлатии кор бо ҷавонон дар меҳвари сиёсати иҷтимоии давлат ва Ҳукумати кишвар қарор гирифтааст.

Номбурда дар идома қайд намуд, ки таъсис ёфтани стипендияи Президенти Ҷумҳурии Тоҷикистон барои наврасону ҷавонон намунаи олии таваҷҷуҳи Пешвои муаззами миллат нисбат ба насли ояндасози кишвар буда, барои ҳавасманд намудани насли ҷавон ҷиҳати ба таҳсилотт муносиб фаро гирифтани онҳо ва ташаккул додани маҳорат ва малакаю истеъдоди онҳо мусоидат менамояд.

Пас аз суханронӣ аз ҷониби раиси Кумита маблағҳои ҷудогардида аз Фонди махсуси Президенти Ҷумҳурии Тоҷикистон ба ҳар як гирандаи стипендияи Президентӣ тақдим гардид. 

Дар охир аз ҷониби гирандагони стипендияҳои Президентӣ ба Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон муроҷиатнома бо ҳамовозиву якдилӣ қабул гардид.