ё фаъолияте, ки бидуни музд аст

Имрӯзҳо дар шабакаҳои иҷтимоӣ гапу калочаҳо нисбати фаъолияти блогерон ниҳоят зиёд аст. Бархе аз мардум нисбати алфози қабеҳи онҳо ва теъдоди дигар барои наворҳои бемаъние, ки дар шабакаҳои иҷтимоӣ мегузоранд, шикоят доранд. Аммо бо вуҷуди ин ҳастанд блогероне, ки барои манфиати халқу миллати хеш талош менамоянд ва дар фикри пешрафти кишвари худанд. Вобаста ба ин мавзуъ суҳбате анҷом додем, бо Саъдӣ Тоирзода, масъули саҳифаи “ZABONOMUZ”, ки муҳтавои онро пешниҳоди шумо менамоем.

- Ҳадафи шумо аз ташкил кардани чунин саҳифа дар чӣ буд?

- Ҳадафи асосии ташкили ин саҳифа дар он буд, ки мехостам, маводҳои таълимӣ бо забони тоҷикӣ бештар шавад. Имрӯзҳо дар аксари ҷойҳо забономӯзиро бо маводҳо ва забони русӣ ба роҳ мемонанд. Ин боис мегардад, то он нафароне, ки забони русиро ба таври кофӣ намедонанд, аз омӯхтани забон даст бикашанд. Бинобар ин, тасмим гирифтам, то бо ташкил кардани ин саҳифа ба он нафароне, ки мехоҳанд, забони англисиро омӯзанд, кумаке карда бошам.

- Оё дар ин роҳ нафаре буд, ки шуморо аз ҷиҳати молиявӣ дастгирӣ карда бошад?

- Тӯли ду соле, ки дар маркази амрикоии шаҳри Кӯлоб будам, маркази мазкур маро бо дастгоҳи наворбардорӣ, компютер, интернет ва китоб таъмин карда буд. Дигар касе то ба ҳол дар алоҳидагӣ дастгирии молиявӣ накардааст.

- Шумо худ забони англисиро бо кадом роҳ омӯхтед: ба таври худомӯзӣ ё дарсҳои иловагӣ?

- Ман се сол дарси иловагӣ хондам. Баъдан ба таври худомӯзӣ тавонистам, забони англисиро омӯзам. Дар вақти худомӯзӣ бештар ба блогҳои дигар забономӯзон таваҷҷуҳ зоҳир мекардам ва дар ин баробар филмҳо бо забони англисӣ тамошо мекардам.

- Сабаб дар чӣ буд, ки шумо рӯ овардед, ба шабакаҳои иҷтимоӣ?

- Ман худ омӯзгори забони англисиям. Вақте хонанда аз дарсҳо натиҷаи мусбат мегирад, бароям бисёр писанд аст. Дидам, ки вақте ба тадрис дар синфхона машғул шавам, танҳо метавонам ба 20-30 нафар ё каме зиёдтар дарс диҳам. Аммо вақте дар шабакаҳои иҷтимоӣ баромад мекунам, ҳар он нафаре, ки майл ба омӯхтани забони англисӣ дорад, метавонад, бо пайгирӣ аз дарсҳои ҳаррӯза забонро ба таври осон ва ройгон аз худ кунад. Бинобар ин, тасмим гирифтам, ки дар шабакаҳои иҷтимоӣ саҳифаи худро боз карда, на танҳо ба 30 нафари синфхона, балки ба тамоми он нафароне, ки хоҳиши омӯхтани забони англисиро доранд, то ҳадди имкон кумак карда бошам.

- Ба назари шумо чаро нисбат ба “Ютуб” ва “Фейсбук” саҳифаи шумо дар “Инстаграм” зиёдтар машҳур шуд, гарчанде, ки саҳифаи “Инстаграм”-ро охир аз ҳама боз намуда будед?

- Вақте дар “Ютуб” барнома омода мекардам, бо забони адабӣ сӯҳбат ва ҷиддӣ баромад мекардам. Аммо аз он боздид камтар мешуд. Касе дастгирӣ намекард. Баъд аз он якчанд блогҳои машҳурро дидам, ки ҳамагӣ ба таври ҳаҷв барнома омода мекунанд ва истиқболи мардум низ хуб буд. Бинобар ин, саҳифаи худро дар “Инстаграм” боз кардам ва тасмим гирифтам, то ба таври сода, фаҳмо ва шавқовар дарсҳои забони англисиро фаҳмонам. Ҳамакнун ҳам дастгирӣ ҳаст ва ҳам боздиди хубе мешавад, аз дарсҳое, ки дар саҳифаи инстаграми худ мегузорам.

Сабаби дигар дар он аст, ки имрӯз бисёр ҷавонон маҳз дар “Инстаграм” вақти зиёди хешро мегузаронанд.

- Тавре ки муайян шуд, шумо бештари вақти худро дар “Инстаграм” мегузаронед. Оё аз фаъолияти худ дар ин сомона даромаде ба даст меоред?

- Ман аз ин самт даромаде надорам. Ин бароям ҳамчун як машғулияти иловагӣ аст. Зеро хату савод омӯзонидан ба насли наврас қарзи шаҳрвандии ҳар яки мост. Даромади асосии ман аз ҳисоби омӯзгорӣ ва курсҳои онлайние, ки ташкил мекунам, ба ҳисоб меравад.

- Дар шабакаҳои иҷтимоӣ саҳифаҳое, ки ба забономӯзӣ машғуланд, хеле зиёданд. Оё миёни шумо равобити дӯстӣ ҳаст?

- Бале, имрӯзҳо дар шабакаҳои иҷтимоӣ саҳифаҳои забономӯзӣ бениҳоят зиёданд. Ҳар яки онҳо роҳу равиши хоси худро доранд. Аммо дар баробари ин байни ҳамаи мо робитаи дӯстӣ пойбарҷост ва дар ҳама ҳолат ба якдигар кумак мекунем. Мақсади мо забон омӯзонидани насли ҷавони кишвар аст. Бинобар ин, ҳамдигарро то ҳадди имкон дастгирӣ мекунем, то ҷавонон тавонанд, ба маводҳои тоҷикӣ бештар дастрасӣ дошта бошанд.

- То ҷое огаҳӣ дорем, шумо тренингҳо низ гузаронидаед. Мегуфтед, ки теъдоди онҳо чӣ қадар аст?

- Бале, ман ҳам тренингҳо гузаронидаам ва ҳам дар тренингҳои дигарон иштирок кардаам. Теъдоди тренингҳое, ки ман гузаронидаам, зиёда аз 30 адад мебошад.

- Фикри шумо дар мавриди блогероне, ки бо ҳар роҳу восита мехоҳанд, сафи обуначиёни худро зиёд созанд, чист?

- Дар блог, албатта, сафи обуначиён бис-ёр нақши калон мебозад ва вақте як нафари бегона ба саҳифа дохил мешавад, блогерро аз рӯи обуначиёнаш баҳо медиҳад. Аксарияти мардум низ дар ҳамин ҷо ба хатоҳо роҳ медиҳанд. Онҳо блогерро аз рӯи теъдоди обуначиён баҳо медиҳанд, вале ба мазмун ва муҳтавои маводҳои ӯ аслан таваҷҷуҳ зоҳир намекунанд. Аммо шахсан барои ман дар ҷои аввал мазмун меистад. Вақте барномаҳои мо дорои мазмуни баланд шуд, сафи обуначиён низ худ аз худ зиёд мегардад. Шояд аз ҳамин сабаб бошад, ки дар як муддати муайян обуначиёни саҳифаи ман низ зиёд шуд. Мақсади асосии ман ин доштани обуначӣ нест, балки агар як нафар ҳам бошад, тавонам ба ӯ чизе омӯзонида бошам. Барои ман ҳамчун як муаллим - блогер сабақ гирифтани як нафар хонанда аз 100 ё 1000 нафар обуначӣ беҳтар аст.

Дар баробари ин, як мавзуи дигар ҳам ҳаст, ки бояд ба назар гирифт. Ҳар шахс метавонад, то бо харидорӣ намудани обуначиёни қалбакӣ сафи обуначиёни саҳифаи худро зиёд намояд. Бинобар ин, мо набояд, блогер ва ё ягон нафари дигарро аз рӯи теъдоди обуначиён баҳо диҳем.

- Дар оянда боз чӣ нақшаҳо доред?

- Дар оянда нақша дорам, то дарсҳои саҳифаи худро боз ҳам бештар намоям ва дар баробари ин курсҳои онлайниро ташкил мекунам. Зеро тоҷиконе ҳастанд, ки дар Амрико ё Англия қарор доранд, вале забони англисиро намедонанд. Мехоҳам бо ташкили курсҳои онлайнӣ кумаке карда бошам, ба он нафарон, то дар ҳамон соҳаи худ ҳам кор ва ҳам таҳсил кунанд. Ҷиҳати мусбати курсҳои онлайнӣ дар ҳамин аст, ки ҳар кас метавонад, пас аз кор дар ҳама ҷо ба омӯхтани забон машғул шавад.

Ҳошим РАҲМАТУЛЛОЕВ, “ҶТ”