ҶАВОНОН
Панҷшанбе 30 Май 2024 01:28
8028
Боиси ифтихору сарфарозии тамоми ҷавонону варзишгарони мамлакат, аз ҷумла ҷавонону варзишгарони вилояти Хатлон аст, ки аз солҳои аввали давлатдории навини тоҷикон Пешвои муаззами миллат ба самти ҷавонон ва рушду инкишофи соҳаи варзиш таваҷҷуҳи махсус зоҳир карда, дар ин муддати кӯтоҳ як қатор комёбиву муваффақиятҳоро ноил гардидаанд.

Дар зарфи қариб 30 соли соҳибистиқлолии мамлакат дар самти баланд бардоштани нақши ҷавонон дар ҳаёти ҷомеа, муҳайё сохтани шароити мусоид барои таълиму тарбияи онҳо, илму касбомӯзӣ, аз худ кардани забонҳои хориҷӣ ва технологияҳои муосири иттилоотию коммуникатсионӣ тамоми шароити зарурӣ муҳайё карда шудааст.

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳри фароҳам овардани беҳтарин шароиту имконият ба ҷавонон дар самти кору таҳсил доиман дастуру супоришҳои қатъӣ дода, аз ташаббусу ибтикороти онҳо ҳамеша истиқбол менамоянд. Хусусан, дар Паёми солонаи худ ба Маҷлиси Олӣ бо таваҷҷуҳ ба масъалаҳои ҷавонон Пешвои муаззами миллат изҳор доштанд, ки: “Насли ҷавони кишвари мо бо дарки масъулияти баланд, иродаи мустаҳкам, садоқату муҳаббати ватандорӣ, эътиқод ба арзишу муқаддасоти миллӣ ва ақлу заковати худ исбот намуд, ки роҳи интихобкардаи мо дар масири ватансозиву ватандорӣ дуруст мебошад.

Мо иштироки фаъолонаи ҷавонони мамлакатро дар сохтмони неругоҳу корхонаҳои азими кишвар, аз ҷумла дар неругоҳи барқи обии “Роғун” ва корҳои бунёдкориву созандагӣ баръало мушоҳида менамоем. Сафи ҷавонон дар соҳаҳои дигар, аз ҷумла саноату сохтмон, маорифу тандурустӣ ва кишоварзӣ низ торафт афзоиш ёфта истодааст. Саҳми ҷавонон дар ҳифзи Ватан - Модар шоистаи таҳсин буда, онҳо дар тамоми ҷузъу томҳои Қувваҳои Мусаллаҳ ва дигар сохторҳои ҳарбӣ содиқона хизмат мекунанд ва дар ҳимояи сарҳади давлатӣ низ нақши бузург мебозанд”.

Дар вилояти Хатлон низ ба масъалаҳои таҳсил, фаъолият, зиндагӣ, касбу ҳунаромӯзии ҷавонон диққати махсус дода мешавад. Таъсиси стипендияи раиси вилояти Хатлон барои олимону муҳаққиқони ҷавон, хонандагону донишҷӯёни аълохони муассисаҳои таълимӣ, таъсиси Ҷоизаи махсуси вилоятӣ барои дифои рисолаҳои номзадию докторӣ дар соҳаи илмҳои тиб, табиатшиносӣ ва риёзӣ, бунёди мактабҳои варзишӣ, марказҳои ҷавонон, ташкили курсҳои махсуси омӯзишӣ аз ҷумлаи иқдомҳоеанд, ки ба рушди ҷавонони вилоят равона карда шудааст.

Бо мақсади иҷрои дастуру супоришҳои Президенти мамлакат муҳтарам Эмомалӣ Раҳмон дар масъалаи дастгирии кадрҳои ҷавони роҳбарикунанда диққати махсус равона гардида, 219 нафар ҷавонони фаъолу кордон дар ташкилоту муассисаҳои вилояти Хатлон чун роҳбар фаъолият доранд. Боиси ифтихор ва сарфарозист, ки дар ҳамаи самтҳо ҷавонон дастгирӣ меёбанд ва ин онҳоро ҳавасманд карда, саҳмгузории ҷавононро дар рушду пешрафти Тоҷикистон ва ободонию бунёдкориҳо бештар менамояд. Ҳамин чиз боис гардида, ки то имрӯз вакилони маҷлиси вакилони халқи шаҳру ноҳияҳо 238 нафар ҷавонон мебошанд. Дар ҳайати маҷлиси вакилони халқи ҷамоатҳо бошад, ҷавонон 765 нафаранд. Ин гувоҳӣ аз он медиҳад, ки сол аз сол дар самти дастгирӣ ва рушди соҳаи ҷавонон муваффақтар мегардем ва барои онҳо имконоти бештар фароҳам оварда мешавад.

Дар доираи “Барномаи миллии рушди иҷтимоии ҷавонон дар Ҷумҳурии Тоҷикистон барои солҳои 2019 - 2021” ва “Барномаи давлатии тарбияи ватандӯстӣ ва таҳкими ҳувияти миллии ҷавонони Тоҷикистон барои солҳои 2018 - 2022” корҳои муайяне анҷом дода шудаанд. Инчунин, бо маблағгузории умумии “Барномаи миллии рушди иҷтимоии ҷавонони вилояти Хатлон барои солҳои 2019 - 2021” тибқи қарори раиси вилояти Хатлон, 746000 сомонӣ пешбинӣ гардида, дар 4 моҳи соли ҷорӣ 74500 сомонӣ иҷро гардидааст. “Барномаи тарбияи ватандӯстӣ ва таҳкими ҳувияти миллии ҷавонони вилояти Хатлон барои солҳои 2019 - 2022” дар соли 2021, тибқи қарори раиси вилояти Хатлон 564 000 сомонӣ пешбинӣ гардидааст.

Мақомоти иҷроияи ҳокимияти давлатии вилояти Хатлон, Раёсати кор бо ҷавонон ва варзиш дар якҷоягӣ бо дигар сохторҳои дахлдор баҳри пешгирии ҷавонон аз шомилшавӣ ба гурӯҳҳои террористию экстремистӣ, даст задани онҳо ба ҷинояту ҷинояткорӣ ва дигар амалҳои номатлуб кор бурда истодааст.

Бо шуғл фаро гирифтани ҷавонон ва фароҳам овардани имкониятҳо барои ҷавонони бешуғл, бекор ва ба ин васила баланд бардоштани сатҳи зиндагии ин қишри ҷомеа яке аз масъалаҳои умдаи рӯз ба ҳисоб меравад. Ба ин хотир дар чор моҳи соли ҷорӣ 1183 нафар ҷавон ба кор таъмин карда шуданд.

Мавриди зикр аст, ки барои пешгирии омилҳои номатлуби иҷтимоӣ, аз қабили нашъамандию нашъаҷаллобӣ, пешгирии бемориҳои сироятӣ, майнӯшӣ, тамокукашӣ, сил, пешгирии фарбеҳӣ ва ташвиқу тарғиби ғизои солим дар байни ҷавонон сохторҳои марбутаи вилоят кор бурда истодаанд.

Гирандагони Стипендияи президентӣ дар вилоят сол ба сол бо инобати таваҷҷуҳи пайвастаи давлат ба соҳа афзоиш ёфта истодааст. Агар соли аввали таъсиси ин стипендия солона 108 нафар ҷавонони вилоят шарафёб ба ин имтиёз мешуданд, ҳоло ба 143 нафар расидааст. Гирандагони стипендияи раиси КҶВ дар вилоят 5 нафар, гирандагони стипендияи раиси вилоят дар соли аввали таъсисаш агар 35 нафарро ташкил дода бошад, ин шумора ҳоло ба 130 нафар расидааст. Гирандагони стипендияи раисони шаҳру ноҳияҳо низ сол ба сол зиёд карда мешаванд, ки таваҷҷуҳи хосса нисбати ин қишри созандаи ҷомеа аст. Дар солҳои таҳсили 2019 - 2020 458 нафар гирандагони стипендияи раисони шаҳру ноҳияҳо буда, 27 нафар ҷавон аз ҷониби сарпарастон ба дигар стипендияҳо таъмин шудаанд, ки назар ба солҳои аввали соҳибистиқлолии Ҷумҳурии Тоҷикистон даҳчанд зиёд мебошад.

Аз соли 1997 то инҷониб наздик ба 8730 нафар ҷавонони вилояти Хатлон дар баробари дигар ҷавонони кишвар тибқи Квотаи президентӣ дар 16 муассисаи олии касбии ҷумҳурӣ таҳсили илм намуда, аз ин шумора беш аз 5690 нафарашон муассисаҳои таҳсилоти олиро хатм намуда, дар соҳаҳои гуногуни хоҷагии халқ фаъолият намуда истодаанд.

Бо таваҷҷуҳ ба сиёсати муваффақонаи Пешвои миллат дар самти ҷавонон соли 2016 дар вилояти Хатлон Шӯрои олимони ҷавон таъсис ёфт, ки дар самти ҷалби ҷавонон ва ҳимояи ташаббусҳои илмии онҳо дар ҷомеа амал намуда истодааст.

Дар давраи солҳои 1996 - 2020 ҷиҳати амалигардонии имтиёзҳои муқарраргардидаи омӯзгорони ҷавон ва тақвияти ҳифзи иҷтимоии мутахассисони ҷавон, алалхусус омӯзгорони деҳот, дар маҷмӯъ ба 2718 нафар, аз ҷумла ба 2070 нафар қитъаи замин барои сохтмони манзили истиқоматӣ, ба 145 нафар қитъаи замин барои полезкориву боғдорӣ ва ба 503 нафар омӯзгорони ҷавон қарзи имтиёзноки бонкӣ дода шудааст.
Соли 2020 муассисаҳои таҳсилоти олӣ, миёна ва ибтидоии касбии ҳудуди вилоят дар маҷмӯъ 15 ҳазор нафар мутахассисони сатҳи таҳсилоти олӣ, миёна ва ибтидоии касбӣ тайёр намуданд, ки аз ин шумора наздик ба 300 нафари онҳо муассисаҳои таълимии касбиро бо диплом ва шаҳодатномаи аъло хатм карданд.

Ҳоло дар ҳудуди вилояти Хатлон 11 адад Марказҳои фарҳангии ҷавонон дар ноҳияҳои Ёвон, Шаҳритус, Ховалинг, Темурмалик, Н. Хусрав, Данғара, Балҷувон, Дӯстӣ, Фархор ва шаҳрҳои Кӯлобу Бохтар фаъолият доранд. Мувофиқи маълумоти оморӣ то соли 2000 дар сатҳи вилоят ягон адад маркази ҷавонон арзи вуҷуд надошта, аз соли зикргардида, то соли 2013 дар ҳудуди вилояти Хатлон 4 адад марказҳои фарҳангӣ фаъолият менамуданд, ки дар солҳои баъдӣ 7 адади дигар ин марказҳо афзоиш ёфтаанд. Айни ҳол дар ноҳияҳои Хуросон, Восеъ, Муъминобод ва ноҳияи Ш. Шоҳин корҳои сохтмони бинои марказҳои ҷавонон идома доранд.
Дар сатҳи вилоят натиҷаҳо дар самти варзиш низ назаррас мебошанд. Агар дар 70 соли даврони шӯравӣ дар ҳудуди вилояти Хатлон 26 адад варзишгоҳ, 1128 майдончаи варзишӣ, 284 толори варзишӣ, 11 ҳавзи шиноварӣ, 2 маҷмааи варзишӣ, 30 мактаби варзишӣ вуҷуд дошта бошад, имрӯз ин нишондод бамаротиб рушд карда, теъдоди варзишгоҳҳо ба 35 адад, майдончаҳои варзишӣ ба 3078 адад, толорҳои варзишӣ ба 538 адад, ҳавзҳои шиноварӣ 34 адад, маҷмааи варзишӣ 8 адад, мактабҳои варзишӣ 34 адад ва дигар иншооти махсуси варзишӣ ба 223 адад расидааст, ки ин нишондод гувоҳи дастгириҳои Пешвои миллат ба ҳисоб меравад.

Маблағгузории соҳаи варзиш танҳо дар 10 соли охир 6 баробар афзоиш ёфта, қабули Барномаи рушди тарбияи ҷисмонӣ ва варзиш, Барномаи рушди футбол дар ду марҳила барои пешрафти кори соҳа такони ҷиддӣ бахшид.

Маҳз таҳти роҳбарии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мардум даст ба ҷабҳаи меҳнат ва ободкорӣ зада, дар зарфи 30 соли соҳибистиқлолӣ ба комёбиҳои назаррас ноил гардиданд.

Қурбон ҲАКИМЗОДА, раиси вилояти Хатлон

Эзоҳи худро нависед



Рамзҳо дар расм