МУАЛЛИФ: УМЕД МИРЗОЕВ

Бо ташаббуси Мақомоти иҷроияи ҳокимияти давлатии вилояти Хатлон бахшида ба “Соли ҷавонон” байни донишҷӯдухтарони муассисаҳои таҳсилоти олии вилоят озмуни “Зан - сарвар” ҷамбаст шуд, ки 51 нафар номзади арзанда интихоб шудаанд.

Озмун ба хотири пайдо кардани ҷавонодухтарони боистеъдод ва арзанда барои вазифаҳои роҳбарӣ баргузор шуд.

Дар озмун беш аз 140 нафар донишҷӯдухтарон аз ҳама шаҳру навоҳии вилоят иштирок карданд ва 78 нафар ба даври дуюм роҳхат гирифтанд.

Муқаддас Сатторова, масъули Раёсати кор бо занон ва оилаи вилоят гуфт, ки ҳадаф пайдо намудани духтарони болаёқат дар вилоят барои ишғоли вазифаҳои роҳбарикунада дар оянда аст.

Иштирокчиён аз рӯи чор шарт - санъати суханварӣ, фарҳанги либоспӯшӣ, санҷиши дониши ҳуқуқу сиёсии донишҷӯён ва малакаи сарварӣ миёни ҳам рақобат карданд.

Ғолибон ба захираи кадрии МИҲД вилояти Хатлон шомил гашта, дар оянда ба вазифаҳои роҳбарӣ таъин хоҳанд шуд.