Имрӯз мо ҷавонони донишманду соҳибтахассуси зиёд дорем ва бо онҳо ифтихор бояд кард. Зеро онҳо дар ҷавонӣ аз шароитҳои имрӯзаи кишвар хуб истифода бурда, барои беҳбудии зиндагии худ берун аз кишвар фаъолияти хуб нишон медиҳанд.

Бахтиёр Гадоев аз зумраи ин гуна ҷавонони фаъолест, ки айни ҳол дар шаҳри Истанбули Туркия дар яке аз корхонаҳои калонтарин ба ҳайси тарҷумон кор мекунад. Дар бораи фаъолият ва муваффақияти ин ҷавони забондон суҳбате доштем, ки фишурдаашро пешкаши хонанда мегардонем.

- Пеш аз ба Истанбул рафтан, дар Тоҷикистон ба чӣ кор машғул будед?

- Баъди хатми факултаи рӯзноманигории Донишгоҳи миллии Тоҷикистон дар шуъбаи матбуотии Маркази тадқиқоти сотсиологии М-Вектор фаъолият кардам. Ман, ки донишгоҳро бо ихтисоси рӯзноманигор-тарҷумон хатм намудам, аз аввал ба забонҳои хориҷӣ аҳамият медодам. Дар баробари шуруи кор барои тақвияти забондониам дар марказҳои забономӯзӣ дарс мехондам. Ҳамин тавр забони рӯсӣ, англисӣ ва туркиро хуб аз бар намудам. Шояд забондониам буд, ки бе ягон мушкил дар кишвари бегона соҳиби ҷойи кори хуб гаштам.

- Ба фикри шумо барои аз худ кардани забонҳои хориҷӣ ҷавононро чӣ лозим аст?

- Фикр мекунам, дар шароити имрӯзаи кишвар аз худ намудани забони хориҷӣ хеле қулай аст. Зеро дар Тоҷикистон ҷиҳати ин масъала ҳама шароитҳо муҳайё шудааст. Ҷавонон бояд аз он хуб истифода баранд. Ҷавоне, ки забони хориҷиро хуб медонад, ҳангоми сафар ба дигар кишварҳо ба ягон мушкил дучор намешавад.

- Чӣ чиз шуморо ба Истанбул бурд?

- Вақте ки бо дӯстонам суҳбат мекардам, онҳо маслиҳат медоданд, ки бояд аз забондонии худ истифода бурда, берун аз кишвар фаъолият намоям. Ҳамин тавр, бо розигии наздиконам ба Туркия сафар намудам.

- Дар ибтидои омадан ба мулки бегона бо чӣ мушкилиҳо рӯ ба рӯ шудед?

- Чун маълум аст, то инсон азоб накашад, роҳаташро намебинад. Ростӣ, ҳама он мушкилиҳое, ки пеши роҳам меомад, ба осонӣ аз онҳо раҳо ёфтам. Чунки забони туркиро хуб медонистам. Барои пайдо намудани ҷойи кор забондониамро хуб истифода бурдам. Дигар бе ягон мушкилӣ фаъолиятамро оғоз намудам. Инчунин Туркия аз руйи урфу одат, расму русум ба мо хеле наздик аст. На фақат ман, балки дигар мардуми тоҷик низ дар ин ҷо бароҳат кору фаъолият мекунанд.

- Ба фикри шумо чӣ бояд кард, ки ҷавонони тоҷик дар кишвари бегона ба мардикорӣ камтар машғул шаванд?

- Ҷавонони тоҷик бисёр фаъоланд, аммо худро ақиб мекашанд. Бисёре аз онҳо дар муҳоҷирати меҳнатӣ фақат дар сохтмонҳо ва ба монанди ин гуна корҳо машғуланду халос. Онҳо фикр намекунанд, ки донишманданд ва бояд аз дониши худ хуб истифода баранд.

Шахсан ман аз рӯзи аввали омаданам ҳуҷҷатҳоямро дар корхонаҳои шаҳри Истанбул барои тарҷумон шудан, пешниҳод намудам. Ва ҳамин гуна бе ягон мушкилӣ дар корхонаи калонтарини шаҳри Истанбул “Longford”, ки дар он либоси мардона истеҳсол мешавад, ба ҳайси тарҷумон корамро оғоз намудам. Ин корхона муштариёни зиёд дошта, он бо давлатҳои Ӯзбекистон, Қирғизистон, Қазоқистон, Тоҷи-кистон, Русия, Доғистон, Грузия, Арабистон, Африқо ва Италия ҳамкории зич дорад. Азбаски муштариёни зиёд бо русӣ ва англисӣ муошират мекунанд, ба тарҷумон эҳтиёҷ доранд.

- Дар оянда чӣ нақша доред?

- Гарчанде ки имрӯз дар мулки бегона хеле муваффақ гаштаам, аммо боз дуриро аз Ватани азизамон эҳсос мекунам. Ба фикрам дар мулки бегона муваффақ гаштан, ин маънои онро надорад, ки мо қарзи ватандориро адо кардем. Куҷое бошем, бояд дар ободкориҳои кишвари маҳбубамон саҳм гузорем.
Аз ин рӯ, нақша дорам, ки як корхонаи либос бо матои тозаи пахтаи ватанӣ бунёд намоям. Барои ин кӯшиши зиёд дорам ва умед дорам, ки дар оянда орзуҳоям амалӣ мешаванд.

- Ташаккур барои суҳбат.

- Саломат бошед.