Бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Раёсати агентии мубориза бо коррупсия дар ВМКБ дар толори умумии мақомоти иҷроияи маҳаллии ҳокимияти давлатии шаҳри Хоруғ семинари омӯзишӣ гузаронида шуд.

Чорабинӣ бо мақсади пешгирии ҳама гуна ҳолатҳои коррупсионӣ миёни кормандону мутахассисони соҳаи кор бо ҷавонон ва дигар идораҳои дахлдор, таъмину иҷрои сифатноки Стратегияи нави мубориза бо коррупсия дар Ҷумҳурии Тоҷикистон ташкил гардида, дар он масъулини Кумитаву раёсатҳо ва зертобеъони онҳо иштирок доштанд.

Шаҳзод Раҳимзода, сардори Раёсати кор бо ҷавонони Кумита қайд кард, ки ҷиҳати мӯшикофона мубориза бурдан бо фасод ҳар як кормандро зарур аст, ки дар фаъолияти ҳаррӯзаи хеш софдилонаю аз рӯи виҷдони пок амал намояд, то иҷрои сифатноки соҳа мувофиқи талабот таъмин гардад.

Маҷидзода Ҳусейн, намояндаи агентӣ оид ба қабул шудани як қатор баромаҳои муҳим аз тарафи Ҳукумати кишвар дар самти пешгирии фасод ва дигар нозукиҳои соҳа ба ҳозирин маълумот дода гуфт, ки баҳри мақсаднок истодагарӣ кардан бо ин зуҳуроти номатлуб талошҳои зиёд ва ҳамкориҳои судмандро тақозо дошта, ҳамаи мо бояд дастаҷамъона садди роҳи онро гирем.