Имрӯз - 1 март дар шаҳраки донишҷӯёни Донишгоҳи миллӣ ҷиҳати татбиқи Қонуни Ҷумҳурии Тоҷикистон “Дар бораи тарбияи ватандӯстии шаҳрвандон” хониши сиёсӣ доир гардид.

Дар ин чорабинӣ Зулфиқор Гулаҳмадзода, раиси Кумитаи кор бо ҷавонон ва варзиш, Далер Қурбонов, намояндаи КДАМ, Нилуфар Имомзода, ноиби ректори ДМТ, Мавзуна Бекназарова, намояндаи Кумитаи дин, танзими анъана ва ҷашну маросим, Илҳом Бандаев, намояндаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва омӯзгорону донишҷӯён иштирок доштанд.

Зимни баргузории чорабинӣ Зулфиқор Гулаҳмадзода зикр намуданд, ки “бақои ҳар миллату давлат ва рушди озодонаи ҳар як фард ба худшиносиву ҳисси баланди ватандӯстӣ вобастагии мустақим дорад ва ҳифзи манфиатҳои миллӣ, таҳкими пояҳои давлатдорӣ, таъмини амнияту суботи ҷомеа ва ободиву пешрафти Тоҷикистон вазифаи муқаддаси ҳар як шаҳрванд мебошад”.
Ҳамин тариқ, иштирокчиёни ин чорабинӣ вобаста ба масоили муҳими ҳаёти ҷавонон ва ватандӯстии шаҳрвандон суханронӣ карда, аз ҷавонон даъват ба амал оварданд, ки зиракии сиёсиро аз даст надиҳанд ва дар рушди ватан саҳмгузор бошанд.

Ба гуфтаи масъулини Кумитаи кор бо ҷавонон ва варзиш ин нахустин хониши сиёсӣ дар соли 2024 буда, давоми нимсолаи аввал 571 мулоқоту хонишҳои сиёсӣ дар назар аст.

Ҳадаф аз роҳандозии чунин чорабиниҳоро масъулин дар руҳияи ватандӯстиву ватанпарастӣ, ифтихор аз давлату давлатдорӣ тарбия намудани ҷавонон маънидод мекунанд.

Гулафшон КАРИМОВА, “ҶТ”