Дар нимсолаи аввали соли 2023 дар вилояти Хатлон 6738 нафар ҷавон бо кори доимӣ ва мавсимӣ таъмин гардиданд.

Ин нуктаро 1 августи соли равон сардори Раёсати кор бо ҷавонон ва варзиши вилояти Хатлон, Рамазон Насриддинзода зимни нишасти хабариаш баён дошт.

Ӯ таъкид намуд, ки дар нимаи аввали соли 2023 аз ҷониби мақоми ваколатдори давлатӣ дар соҳаи кор бо ҷавонон, дар ҳамкорӣ бо Раёсати Агентии меҳнат, муҳоҷират ва шуғли аҳолии вилояти Хатлон 260 маротиба ярмаркаҳои ҷойҳои кории холӣ ва вазифаҳои озод гузаронида шуда, дар ин муддат 6738 нафар ҷавонон ба кори доимӣ ва мавсимӣ таъмин гардиданд.

Дар ин давра шумораи ҷавонони бекор ва қобили меҳнат дар ҳудуди вилояти Хатлон 7088 нафар ба қайд гирифта шудааст.

Ҳамзамон, зикр гардид, ки бо мақсади дастгирии иҷтимоии ҷавонони маъюб, бепарастор ва ниёзманд дар доираи “Барномаи миллии рушди иҷтимоии ҷавонон дар Ҷумҳурии Тоҷикистон барои солҳои 2022 - 2026” дар доираи маблағҳои барномаҳои соҳавӣ ва бо ҷалби шахсони саховатпеша чанде аз ҷавонони ниёзманд ба маблағи 53100 сомонӣ кумак гирифтанд.