ҶАВОНОН
Панҷшанбе 04 Март 2021 02:41
7696
Дар замони муосир ва раванди ҷаҳонишавӣ илмҳои табиию техникӣ ва иттилоотию коммуникатсионӣ босуръат вусъат ёфта истодаанд. Аз ҷумла, технологияи информатсионӣ ва ихтирооти навин дар сайёраи замин доман афрохта, ҷузъе аз ҳаёти сокинони он гардидааст. Дар радифи дигар кишварҳо Ҳукумати Тоҷикистон низ вобаста ба ин самти афзалиятноки кишвар бетараф набуда, барои таъмин ва пешрафти соҳаҳои илму маориф имконоти мавҷударо истифода бурда, аҳамияти аввалиндараҷа медиҳад.    

Ҳамарӯза дар ин соҳа ихтироот ва навгониҳо, инчунин корҳои илмӣ-таҳқиқотӣ ва ташвиқи ғояҳои навовариву ихтироъкорӣ аз ҷониби мутахассисони соҳа ва ҷавонони соҳибистеъдод таҳия ва пешниҳод мегарданд. Ҳамин аст, ки ҳамасола конфронсу форум ва олимпиадаҳои сатҳи ҷумҳуриявию байналмилалӣ миёни наврасону ҷавонон гузаронида мешавад. Хонандагони болаёқат пайи омӯзиш ва ихтирооту навгонии соҳаи технология буда, аз саросари кишвар дар ин гуна чорабиниҳо ширкат варзида, сазовори ҷойҳои намоён мегарданд.  

Хушбахт Шоймардонов аз зумраи хонандагони болаёқате мебошад, ки ҳанӯз аз хурдсолӣ завқи барномасозӣ дар дилаш ҷӯш зада, то инҷониб пайи омӯзиш ва пурра аз худ намудани ин касб аст. Ӯ дар синфи 11 – и гимназияи хусусии Тоҷикистон таҳсил намуда, зиёд болои худ кор мекунад. Фориғ аз дарс ба мутолиаи китобҳои тахассусӣ машғул гардида, кӯшиш менамояд, ки тамоми нозукиҳои технологияи иттилоотӣ ва забони барномасозиро аз устодон омӯзад. Дар тамоми чорабиниҳое, ки вобаста ба технология ва ихтироъкорону барномасозон баргузор мешаванд, Хушбахт малакаи худро санҷида, соҳиби диплому ифтихорномаҳо мегардад.

Хушбахт Шоймардонов тӯли ду сол аст, ки зери роҳбарии устодони гимназия дар форуми наврасону ҷавонони шаҳри Душанбе аз рӯйи номинатсияи барномасозӣ бо лоиҳаҳои “Personal assistant” (ёрдамчии шахсӣ) ва “jbook mytest” иштирок карда, сазовори ҷойи 1-ум мегардад.

Ӯ мегӯяд: “Ҳеҷ гоҳ ягон касб ва ё ихтисоси бароям мувофиқро намеҷустам, чунки аз овони хурдӣ нисбати технология ва ихтироъкорӣ майл доштам. Ҳангоми дар синфи 8 таҳсил карданам барои ҳалли масъалаҳои математикӣ ва ташкили веб-сайтҳо шавқам бештар гардид. Аз он замон назди худ мақсад гузоштам, ки мустақилона ба хондани китобҳо оид ба омӯзиши забонҳои барномасозӣ машғул гардам. Пас аз як соли таҳсил ман ба таҳияи барномаҳои воқеӣ шурӯъ кардам. Аммо ин бароям кифоя набуд. Новобаста аз ин мехостам, ки барномаҳоям аз ҷиҳати касбият аз дигарон фарқ кунанд.

Бо кӯшишҳои зиёд ӯ то ин замон лоиҳаю барномаҳои зиёди иттилоотиро тарҳрезӣ ва коркард кардааст. Инчунин сомонаи асосии гимназияи хусусии Тоҷикистонро бо номи “gymnasium.tj” сохта ба истифода додааст. “Сомонаи дигари тарҳрезинамудаам оид ба фаъолияти мактабҳо ва донишкадаҳои шаҳри Душанбе мебошад, ки дар марҳилаи анҷомёбӣ қарор дошта, дар наздиктарин фурсат фаъолияти худро дар интернет фаъол месозад. Ҳадафи асосии ин сомона шиносоии довталабону ниёзмандон аз рафти таълим дар муассисаҳои таълимии пойтахт ва ихтисосҳои донишкадаҳо мебошад”, - мегӯяд Хушбахт.

Соли гузашта Хушбахт Шоймардонов дар олимпиадаи даври шаҳрӣ ширкат варзида, бо соҳиб гаштани ҷойи намоён ба олимпиадаи сатҳи ҷумҳуриявӣ роҳхат гирифт. Новобаста аз оне ки ӯ вақти зиёди худро барои омӯзиши фанни информатика сарф менамояд, барои омӯхтани дигар фанҳо низ кӯшиш менамояд. Бо ахлоқи намунавӣ ва тарбияи хуб дар гимназия миёни ҳамсолон ва устодон мавқеи хосро ишғол кардааст. Ҳамин аст, ки устодон хислатҳои хуби инсонии Хушбахтро ёдовар шуда, аз доштани чунин шогирд ифтихор доранд.

Ҷамшед Сафаров, омӯзгори фанни технологияи иттилоотии гимназияи мазкур оид ба қувваи зеҳнӣ ва малакаи Хушбахт Шоймардонов чунин иброз дошт: “ Тӯли ду сол аст, ки шогирдам Хушбахт бо кӯшишҳои зиёд таҳти роҳбарии банда дар озмунҳои фаннӣ ва техникӣ иштирок менамояд. Дар ин муддат ман дар симои Хушбахт як навраси бисёр ғаюру бебокро дарёфтам. Ӯ новобаста ба ҷавониаш зиёд талош дорад. Пайваста кӯшиш менамояд, ки дар касби интихобнамудааш пешсаф бошад. Ҳамарӯза бо идея ва пешниҳодҳои наву ҷолиб ба наздам омада, барои беҳбудии кору лоиҳаҳояш маслиҳат мепурсад. Инчунин, аз ман супоришҳои иловагӣ низ талаб менамояд. Бо эълон гардидани солҳои 2020-2040 ҳамчун “Бистсолаи рушди фанҳои дақиқ, табиатшиносӣ ва риёзӣ” Хушбахт барномаҳоеро пешниҳод намудааст, ки барои ҳалли мисолу масъалаҳои математикию физикӣ ва геометрӣ хело муфиданд ва дар марҳилаи коркард қарор доранд.

- Барномасозӣ ҷузъи ҳаёти ман гардида, бо иродаи қавӣ ва идеяҳои нав нақша дорам, ки ҳади аққал барномаеро созам, ки раванди кори корбарони интернетиро осонтар намояд. Сохтани чунин барномаҳои интернетӣ ва таҳияи лоиҳаҳои ҷадид бароям неруи тозае мебахшад. Ҳар як навгоние, ки дар соҳаи технологияи информатсионӣ менамоям, бароям ниҳоят гуворост. Чунки маҳсули эҷодам шояд ба нафаре муҳим бошаду аз он чизе омӯзад. Айни ҳол ман таҳиягар ва барномасоз буда, дар оянда низ мақсад дорам, ки дар ин соҳа рушду равнақ ёфта, мавқеи худро ишғол намоям. Аз ин рӯ, тасмим гирифтам, ки пас аз хатми гимназия барои мукаммал намудани касби интихобнамудаам таҳсилро дар хориҷ аз кишвар идома диҳам, – мегӯяд, Хушбахт Шоймардонов.

Ҷавонон қишри ояндасози ҷомеа буда, ба дастгирии давлату ҳукумат ва омӯзгорони соҳавӣ ниёз доранд. Барои баланд бардоштани сатҳу сифати таълим, таҳия ва ихтирооти ҷолиби ҷавонон мақомотҳои дахлдорро лозим аст, ки шароити мусоидро боз ҳам бештар фароҳам оваранд. Умед бар он дорем, ки ҷавонони ватандӯсту соҳибилм барои рушди соҳаи маориф ва технология сидқан кӯшиш намуда, ном ва Парчами Тоҷикистонро дар арсаи байналмилалӣ баланд мебардоранд.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Март 2021 c.