Бо ташаббуси Кумитаи кор бо ҷавонон ва варзиши назди Ҳукумати кишвар, 31 май, дар муассисаи таҳсилоти миёнаи умумии №31-и шаҳри Душанбе ҳамоиши ҷумҳуриявии гирандагони стипендияи Президентӣ таҳти унвони “Пайравони Пешвои миллатем” баргузор гардид.

Дар ҳамоиш гирандагони стипендияҳои Президентӣ аз тамоми шаҳру ноҳияҳои кишвар иштирок намуданд.

Аҳтам Абдуллозода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, зимни суханронии хеш доир ба иқдомҳои наҷиб ва ғамхоронаи Пешвои миллат нисбат ба насли наврасу ҷавон ёдовар шуд.

Гуфта шуд, ки аз рӯзҳои нахустини соҳибистиқлолии кишвар ба хотири рӯҳбаланд намудани наврасону ҷавонон ва бо мақсади таъмини таҳсилоти муносиби ҳар яки онҳо як қатор имтиёзу имкониятҳои фаррох фароҳам оварда шуданд ва стипендияи Президентӣ низ яке аз рукнҳои муҳими дастгирии давлату Ҳукумат нисбат ба насли наврасу ҷавон мебошад, ки бо фармони дахлдори Президенти Ҷумҳурии Тоҷикистон таъин гардидааст ва ҳамасола ба беҳтарин наврасон супорида мешавад. Ин ибтикороти шоиста ба хотири беҳтар шудани сифати таҳсилот ва тайёр кардани насли соҳибихтисос равона шудааст ва имтиёзҳое, ки дар доираи он муқаррар гардидаанд, баҳри баланд бардоштани сифати дониши толибилмон ва ҳамчун пайрави асили Пешвои миллат дар ободу зебо гардонидани ватани азизамон саҳмгузор буданашон мусоидат хоҳад кард. 

Аз ҷавонон даъват ба амал оварда шуд, ки бояд ватандӯст бошанду ҳамчун фарди бонангу номус саҳми хешро дар рушди Ватан гузоранд.

Пас аз суханронӣ ба чанд нафар гирандаи стипендияи Президентӣ стипендияи навбатӣ аз ҷониби раиси Кумитаи кор бо ҷавонон ва варзиш тақдим гардида, барномаи фарҳангӣ анҷомбахши чорабинӣ гардид.