ҶАВОНОН
Ҷумъа 21 Июн 2024 07:56
9670
Дар он перомуни ҷавонон чӣ гуфта шуд?

Имрӯз дар Китобхонаи миллии Тоҷикистон дар доираи Вохӯрии панҷуми машваратии сарони давлатҳои Осиёи Марказӣ Форуми роҳбарони мақомоти давлатии кор бо ҷавонони кишварҳои Осиёи Марказӣ доир гардид.

Дар форуми мазкур роҳбарони кор бо ҷавонони давлатҳои Осиёи Марказӣ - Тоҷикистон, Қазоқистон, Туркманистон ва Узбекистон ширкат намуданд.

Нахуст Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон намояндагони кор бо ҷавонони давлатҳои зикргардидаро ба ҳузур пазируфта, бо онҳо мулоқоти судманд анҷом дод.

Зимни суҳбат намояндагони кишварҳои О. Марказӣ барои меҳмондорӣ ва пешвозгирии самимӣ изҳори миннатдорӣ намуда, аз ҳамкории хуб дар самти кор бо ҷавонон ёдоварӣ карданд.

Сипас Форуми роҳбарони мақомоти давлатии кор бо ҷавонони кишварҳои Осиёи Марказӣ доир гардид.

Дар форум Абдулло Раҳмонзода, раиси КҶВ баромад намуда, иброз дошт, ки давоми солҳои соҳибистиқлолии мамлакат бо талошу дастгириҳои Президенти Ҷумҳурии Тоҷикистон муҳтарам Эмомалӣ Раҳмон нақши ҷавонон дар сиёсат, рушди соҳаҳои иҷтимоӣ, иқтисодӣ ва фарҳангӣ баръало эҳсос мегардад. Ӯ гуфт:
“Аз ҷониби давлату Ҳукумати мамлакат сол то сол барои дастгирии иҷтимоии ҷавонон ва боло бурдани ҳисси ватандӯстии онҳо стратегияҳо ва барномаҳои соҳавӣ қабул ва амалӣ мешаванд. Аз ҷумла, бо мақсади фароҳам овардани шароити мусоиди таъсиркунанда ҷиҳати тарбияи маънавию ҷисмонии ҷавонон, инкишофи ҳисси ватандӯстӣ ва муҳаббати онҳо дар руҳияи ватандӯстӣ, маърифатнокӣ, худогоҳӣ, инсондӯстӣ, ифтихор ва арҷгузорӣ ба арзишҳои миллӣ, эмин нигоҳ доштани насли ҷавон аз таҳдидҳои замони муосир “Барномаи давлатии тарбияи ватандӯстӣ ва таҳкими ҳувияти миллии ҷавонони Тоҷикистон барои солҳои 2023 – 2027” дар сатҳи ҷумҳурӣ ва маҳал амалӣ гардида истодааст. Илова бар ин, ҷиҳати амалишавии 10 самти афзалиятноки сиёсати давлатии кор бо ҷавонон, ки аз Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон” бармеояд, “Барномаи миллии рушди иҷтимоии ҷавонон дар Ҷумҳурии Тоҷикистон барои солҳои 2022 - 2026” дар сатҳи ҷумҳурӣ ва маҳал амалӣ гардида истодааст”.

Баъди баромади раиси КҶВ, ҳамчунин намояндагони давлатҳои Узбекистон, Қазоқистон ва Туркманистон атрофи пешрафт ва мушкилотҳои ҷавонони давлатҳои Осиёи Марказӣ суханронӣ намуданд.

Гуфта шуд, ки мақсад аз баргузории форум мубодилаи масъалаҳои ҷавонон бо ҷомеаи ҷаҳонӣ, тақвияти ҳамкорӣ ҷиҳати ҳалли мушкилоти ҷавонон дар сатҳи минтақавӣ ва таъмин намудани воситаҳои мубодилаи байналмилалӣ барои ҳамкории доимӣ мебошад.

Дар охири форум ба ҳар як иштирокчӣ тоқиҳои миллӣ бо навиштаҷоти Тоҷикистон аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон тақдим гардид.

Эзоҳи худро нависед



Рамзҳо дар расм