Бо ташаббуси Вазорати мудофиаи Ҷумҳурии Тоҷикистон дар ҳамкорӣ бо Кумитаи кор бо ҷавонон ва варзиши назди Ҳукумати Ҷумҳурии Тоҷикистон аз 9 - 10 апрели соли 2019 дар шаҳри Душанбе Форуми ҷумҳуриявии хизматчиёни ҳарбӣ ва ҷавонони синни даъватӣ баргузор гардид.

Дар доираи форуми мазкур субҳи 9 апрел дар Боғи ғалабаи шаҳри Душанбе маросими гулчанбаргузорӣ бо иштироки намояндагони Вазорати мудофиа, Кумитаи кор бо ҷавонон ва варзиш, афсарону сарбозон ва ҷавонони фаъол дар назди қаҳрамонони тоҷик, ки синаи хешро барои ҳифзи якпорчагии давлат дар солҳои 1941-1945 қаҳрамонона сипар намудаанд, баргузор шуд.

Қисмати расмии Форуми ҷумҳуриявии хизматчиёни ҳарбӣ ва ҷавонони синни даъватӣ дар бинои Вазорати мудофиаи Ҷумҳурии Тоҷикистон бо иштироки муовини вазири мудофиа Латифзода Асрор, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода, афсарону сарбозон, ҷавонони фаъол ва ҷавонони синни даъватӣ ифтитоҳ гардид.

Латифзода Асрор, иштирокчиёни форумро хуш омадед гуфта, миннатдории худро ба роҳбарияти Кумитаи кор бо ҷавонон ва варзиш барои ҳамкориҳои доимӣ ва судманд баён намуд: - Бо боварии комил гуфта метавонам, ки иштирокчиён аз баромадҳо ва чорабиниҳои форуми мазкур баҳра бурда, онро дар фаъолияти ҳамарӯзаи хизматии худ истифода мебаранд, - гуфт Л. Асрор. 

Раиси Кумитаи кор бо ҷавонон ва варзиш, зимни баромади хеш қайд намуд, ки дар марҳилаи пурҳаводиси таҳавулоти имрӯза Ваҳдати миллӣ ва сулҳу суботи сартосарӣ барои мардуми кишварамон беш аз пеш аҳамияти ҷиддӣ пайдо менамояд. Тағйиру дигаргуниҳое, ки дар тамоми олам ба вуҷуд омадаанд, ба вазъи сиёсию иҷтимоии ҷумҳурии мо низ бетаъсир намемонанд: “Ҳифзу гиромидошти ваҳдат, ягонагӣ, иттиҳоду якпорчагӣ, дӯстию рафоқату ҳамдилӣ, ки аз рисолатҳои аслии мардуми мо маҳсуб меёбанд, бояд ҳамаҷониба ривоҷ ва чун гавҳараки чашм ҳифз карда шаванд. Чунин амали муқаддасу сарнавиштсоз бо мақсади талқини арзишҳои миллӣ дар вуҷуди ҳар яки шумо ва дар ин замина тарбияи ҷавонони кишвар дар руҳияи ватандӯстию меҳанпарварӣ бо ташкили Форуми хизматчиёни ҳарбӣ ва ҷавонони синни даъватӣ соли дуюм аст, ки дар асоси нақшаи чорабиниҳои якҷояи Вазорати мудофиаи Ҷумҳурии Тоҷикистон ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон роҳандозӣ карда мешавад,”-изҳор дошт раиси Кумитаи кор бо ҷавонон ва варзиш.

Шоираи халқии Тоҷикистон Зулфия Атоӣ, дар чорабинии мазкур барои афсарону сарбозон ва ҷавонони синни даъватӣ дар мавзӯи забону миллат, меҳри модару ватан порчаҳои шеърӣ қироат намуд.

Ҳамчунин дар доираи Форуми ҷумҳуриявии хизматчиёни ҳарбӣ ва ҷавонони синни даъватӣ рӯзҳои 9 - 10 апрел як қатор чорабиниҳо, аз қабили боздиди иштирокчиёни форум аз фаъолияти қисми низомии 07033-и Вазорати мудофиа, мусобиқаҳои варзишӣ зери унвони “Майдон аз далер аст!” миёни хизматчиёни ҳарбӣ ва навдаъватшудагон дар қисми ҳарбии 07033, машқҳои пагоҳирӯзӣ, силсилаи чорабиниҳо дар “Боғи Фирдавсӣ”, маросими тантанавии гусели 70 нафар ихтиёриёни ҷавонон (маъракаи даъвати баҳорӣ) ба хизмати ҳарбӣ, дидан намудан аз Вазорати мудофиа “Дар меҳмонии вазири мудофиа” ва тамошои дастаҷамъонаи намоишномаи театрӣ дар Театри академӣ - драмавии ба номи А.Лоҳутӣ баргузор гардиданд.