Табрикоти раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Абдуллозода Аҳтам Рустам бахшида ба 24-умин солгарди Рӯзи Артиши миллӣ

Ҳомиёни шуҷои Ватан, ҷавонони хушиқбол!

Бо камоли ифтихор 24-умин солгарди Рӯзи таъсисёбии Артиши миллиро ба ҳамаи Шумо ва дар симои Шумо кулли ҷавонони Тоҷикистонро самимона шодбош мегӯям.

Амнияти давлатӣ ва тартиботи ҷамъиятӣ, таъмини Истиқлолияти давлатӣ, ҳифзи боэътимоди марзу буми кишвар ва осоиштагии мардум яке аз рукнҳои муҳимтарини давлатдорӣ мебошад. Сулҳу оромии мамлакат, тамоми пешрафти ҷомеа ва таҳкими иқтидори иқтисодиву иҷтимоии давлат ба сатҳи таъмини амнияту тартибот вобаста аст.

Бояд гуфт, ки ҳеҷ як давлат бе таърих, бе фарҳанг ва бе Артиши миллӣ арзи вуҷуд карда наметавонад. Артиши миллӣ маҳз бо заҳмату талошҳои Пешвои муаззами миллати тоҷик, Сарфармондеҳи Олии Қувваҳои Мусаллаҳи Ҷумҳурии Тоҷикистон, муҳтарам Эмомалӣ Раҳмон ба такягоҳи асосии давлат ва сипари боэътимод табдил ёфтааст.

Воқеан, ҳифзи Ватан, ҳимояи манфиати давлат мактаби бузурги ҷасорату мардонагӣ ва далериву шуҷоат аст, ки ин вазифаи муқаддас ва пурифтихори на танҳо хизматчиёни ҳарбӣ, балки ҳар як фарди солимфикр ва бонангу номуси кишварамон, махсусан мо - насли ҷавон мебошад. Барои мо - ҷавонон яке аз муҳимтарин мактаби обутоби ҳаёт хизмат дар сафи Қувваҳои Мусаллаҳи мамлакат аст. Маҳз дар ҳамин ҷо ҳар яки мо шуҷоату мардонагӣ омӯхта, муқаддастарин арзиши ҳаёт – дӯст доштан ва содиқона муҳофизат кардани хоки поки Ватани азизро ёд мегирем. Хизмат дар сафҳои Артиши миллӣ бояд қарзи виҷдон ва ҳаққи фарзандии ҳар як ҷавони далер бошад.

Имрӯз мо - ҷавонони саодатманди кишвар ҳамчун пайравони асили Пешвои миллат бо ҳисси баланди ватандӯстию ватанпарастӣ ва нангу номуси миллӣ амалҳои ҷавонмардонаи Пешвои муаззами миллатро ҳамчун мактаби сулҳпарварона сармашқи фаъолияти хеш интихоб намуда, баҳри нигаҳдошти марзу буми Тоҷикистон ҷони хешро дареғ намедорем.

Бори дигар ҳамаи Шумо ҷавонони хушиқболи кишварро ба ифтихори ҷашни 24-умин солгарди таъсисёбии Қувваҳои Мусаллаҳ табрик гуфта, ба ҳамаи Шумо сиҳатмандиву хушбахтӣ, азму иродаи қавӣ, ғурури баланди ҷавонмардӣ ва дар роҳи расидан ба ҳадафҳои нек барори кор орзу менамоям.