- Акси одамони машҳурро бо истифода аз сангчаҳо тасвир кардан нияти аслии ман аст, - мегӯяд Умед Саидов, рассоми ҷавон, ки ба шеваи ҷолиб тасвиргарӣ мекунад. - Аз ҷумла, имрӯз бар сари офаридани портрети Пешвои миллат андеша дорам.

Умед Саидов, ҷавони 30-сола аз шаҳри Қӯрғонтеппа, истеъдод ва ҳунари нотакрор дорад. Ӯ дар замони наврасӣ, вақте танҳо мемонд, ҳамеша рӯи авроқи сафед аксҳоро тасвир мекард. Ҳамагӣ дар синфи сеюм мехонд, ки шавқи рассомӣ ӯро ба мактаби санъати ба номи Парманқулови шаҳри Қӯрғонтеппа бурд. Умед тӯли чоруним сол дар он мактаб таҳсил карду ҳунари худро сайқал дод. Баъдтар Умед роҳ сӯи Коллеҷи рассомии ба номи Мирзораҳмат Олимови шаҳри Душанбе пеш гирифт. Соли 2007 коллеҷи мазкурро хатм кард. Устоди Умед дар коллеҷ Ахмед Юсупов, рассоми чирадасти тоҷик буд. Кори дипломиашро Умед дар мавзӯи “Рассомони гузаштаи тоҷик” ҳимоя кардааст.

Умед ба монанди дигар рассомони давр манзараҳоро танҳо бо обу ранг тасвир намекунад. Диду услуби Умеди ҷавон тамоман дигар аст. Ӯ андеша дорад, ки бояд истеъдоду ҳунараш аз дигарон ба куллӣ фарқ кунад. Агар Иван Айвазовский, рассоми машҳури рус, баҳрро бештар тасвир мекард, агар гравёр-аквафортист Иван Шишкин ҷангалзору табиатро пайваста мунъакис мекард, Умед фирқаи махсуси санъати рассомиро пеш гирифтааст. Расмҳои кашидаи Умед аз хурдсолӣ то ба имрӯз беҳисобанд, аммо асаре, ки моро бештар ҳайрон намуд, тасвире бо истифода аз сангчаҳои хурди мармарӣ буд. Ин акс бо сарфи 3445 кубик сохта шуда, барои ба итмом расиданаш Умед тӯли шаш моҳ заҳмат кашидааст.

Рӯи тасвири кубикӣ симои сарояндаи машҳури рус, Ҳунарпешаи мардумии ИҶШС Алла Пугачёва ба чашм мерасад. Ҷолибияти асар он аст, ки агар аз наздик истода назар андозед, Пугачёваро ба зудӣ намешиносед, зеро он бо шумораи зиёди кубикҳои ранга сохта шудааст. Вале вақте Умед тасвирро ба масофаи 30-40 метр дуртар бурду намо дод, дар ҳақиқат ба таври барҷаста маълум гардид, ки акси зебои Алла Пугачёва будааст. Мутахассисони баҳодиҳанда ба асарҳои рассомӣ ба тасвири Алла Пугачёва, ки Умед тӯли шаш моҳ ба офариданаш вақту неру сарф кардааст, 20 ҳазор доллари амрикоӣ арзиш додаанд.

Аксҳои дигари офаридаи Умед низ аҷибанд. Асарҳои “Паи захми ишқ”, “Маҷнун”, ки дар назари аввал чун шамъ менамоянд, аз ҷиҳати маъно пурбор буда, дар асл силуэти ду шахси дилдода дида мешавад. Ҳамин тавр, дар асарҳои ӯ техникаи кубизм, сюреализм ва мозаика мушоҳида мешавад, ки аз маҳорати баланди тасвиргарӣ ва ҷаҳони ғановатманди ботиниаш ҳувайдост.

Умед ғолиби якчанд озмуни рассомӣ дар кишвар аст. Ба андешаи ӯ, мардум ба услуби рассомӣ ва асарҳои ӯ чандон таваҷҷуҳи зиёд зоҳир намекунанд, шояд ба дарки маънии офаридаҳо ва паёмҳои ӯ намерасанд. Аз ҳамин хотир, Умед асарҳои офаридаи хешро, ки дар Осорхонаи вилоятии ба номи “Авасто” ба маъраз гузошта буд, дубора пас гирифт.

Дар мамлакатҳои пешрафтаи дунё ин гуна асарҳои тасвириро бо шавқи тамом тамошо мекунанд, таҳлилу арзишдоварӣ менамоянд ва ҳунармандон қадрдонӣ мешаванд. Аммо Умед дилмонда нест, зеро ӯ аввалин ҷавонест, ки дар Тоҷикистон ин шева ё тарзи рассомиро пеша кардааст. Пикассо, Малевич барин рассомони оламшумулро ҳам, ки дар санъати тасвирӣ бо тозаназарию дунёи хаёлоти рангинашон дар соҳаи табаддулот карда буданд, дар оғоз мардум чандон қабул надоштанду намефаҳмиданд.

Умед дар оянда нақшаҳои зиёд дорад. Орзу дорад, ки асарҳояшро рӯзе дар намоишгоҳҳои байналмилалӣ ба тамошо гузорад. Ӯ ҳамчунин мехоҳад, ки дар тасвири симои Пешвои миллат Эмомалӣ Раҳмон муваффақ шавад. “Эмомалӣ Раҳмон чеҳраи барҷастаи таърихист. Ӯ ҳамеша ба ҷавонон такя мекунад ва боиси хурсандист, ки имсол “Соли ҷавонон” эълон гардид. Мехоҳам ба рамзи иззату эҳтиром портрети Пешвои миллатро биофарам”, - мегӯяд Умед Саидов.

Мо ба ин ҷавони навҷӯву навовар дар ҷодаи ҳунар барору комёбӣ мехоҳем. Орзу мекунем, ҳунари ӯ рушд кунад ва дар “Соли ҷавонон” сафи чунин ҷавонони соҳибистеъдод натанҳо дар вилояти Хатлон, балки дар Тоҷикистони азиз зиёд гардад.