ҶАВОНОН
Душанбе 25 Июн 2018 09:21
4476
Таҳти ин унвон чорабинии идона ва барномаи ҷолибе, рӯзи 1 июн, бахшида ба Рӯзи байналмилалии ҳифзи кӯдакон бо ташаббуси Кумитаи кор бо ҷавонон ва варзиши назди Ҳукумати кишвар зери сарпарастии президенти Федератсияи футболи Тоҷикистон, муҳтарам Рустами Эмомалӣ бо мақсади ҳифзи ҳуқуқу озодиҳои кӯдакон ва гиромӣ доштани арзишҳои ҷаҳони маънавии онҳо, дар сатҳи баланд гузаронидани Рӯзи байналмилалии ҳифзи кӯдакон бо ҷалби беш аз 100 нафар кӯдакони ятиму бепарастор ва аз оилаҳои камбизоати шаҳру ноҳияҳои тобеи марказ дар шаҳри Душанбе баргузор гардид.

Мутобиқи барнома дар ин рӯз аввалан барои сад нафар иштирокчии чорабинии идона дар ошхонаи варзишгоҳи пойтахт суфраи идона ороста шуда, пас аз хӯроки нисфирӯзӣ бо рақсу хурсандӣ дар назди Бинои асосии Кумита иштирокчиён ба сайри ҷойҳои фарҳангии шаҳри Душанбе баромаданд.

Дар ибтидо кӯдакону наврасон бо мақсади шиносоӣ аз таърихи миллати тоҷик аз Осорхонаи миллии ҷумҳурӣ ва ҷиҳати рӯ овардан ба хонишу ҷалби кӯдакону наврасон ба китобу китобхонӣ аз Китобхонаи миллӣ дидан намуданд.

Зимни боздиди Осорхонаи миллӣ иштирокчиён ба худ маълумоти мушаххас дар бораи таърихи халқи хеш гирифта, бо давраҳои инкишофи таърихи инсоният шиносоӣ пайдо намуданд.

Бобоҷон Давлатов, хонандаи Мактаби таҳсилоти ҳамагонии №1-и дорои парваришгоҳи ноҳияи Рӯдакӣ, яке аз иштирокчиёни ин барномаи хотиравӣ буд. Чун хостем бо ӯ ҳамсуҳбат шавем, маълум гардид, ки аллакай барои худ маълум намудааст, ки инсон бояд ба дигарон ғамхору мададгор бошад ва ба халқу кишвараш нафъовар. Ӯ гуфт: “Мехоҳам мактабро ба итмом расонида, дар оянда духтур шавам ва баҳри солимии ҳамватанони худ саҳми худро гузорам”.

Чӣ хӯш аст, ки имрӯз кӯдакону наврасони мо дар қалби поку кӯчаки хеш орзуҳои бузургеро чун саҳм доштан дар ободии Ватан мепарваранд. Вақте ки кӯдакону наврасони мо имрӯз чунин ниятҳои накӯ доранд, пас бо итминони комил метавон гуфт, ки ояндаи кишвар боз ҳам обод ва шукуфонтар хоҳад шуд.

Баҳори Иззатулло, хонандаи МТМУ №1-и шаҳри Турсунзода аз баргузории Рӯзи байналмилалии ҳифзи кӯдакон хело хушҳол аст. Номбурда зимни суҳбат иброз дошт: “Имрӯз иди кӯдакон аст. Аввалан ҳамаи ҳамсолони худро ба ин рӯз муборакбод мегӯям. Имрӯз ҳамаи моро сарҷамъ намуда, баҳри дар сатҳи зарурӣ таҷлил сохтани идамон ба шаҳри Душанбе оварданд. Ман ба раиси шаҳри Душанбе, муҳтарам Рустами Эмомалӣ миннатдорӣ мекунам, ки маҳз бо сарпарастиашон ба тамошои ин шаҳри зебо омадем. Мо Осорхонаи миллӣ ва Китобхонаи миллиро тамошо кардем. Дар осорхона ба мо дар бораи таърихи замони гузашта маълумот доданд. Ба ҳамаи онҳое, ки иқдоми мазкурро амалӣ намуданду моро дар пойтахти кишварамон сарҷамъ намуданд, ташаккур мегӯям”.

Чун аз ӯ вобаста ба кӯдакону наврасоне, ки ба дарс беомодагӣ меоянду душвортарбияанд пурсон шудем, гуфт: “Ба чунин кӯдакону наврасон тавсияи ман ин аст, ки бояд онҳо омӯзанд. Зеро онҳо барои ояндаи худашон мехонанд. Онҳо бояд беҳудагардӣ накарда, бештар китоб хонанд”.

Боиси хушҳолист, ки имрӯзҳо таваҷҷуҳи Сарвари давлат нисбати ятимон ва маъюбону бепарасторон назаррас мебошад. Имрӯз ятимон худашонро танҳо эҳсос намекунанд. Зеро ғамхор ва дастгиру мададгори ҳамешагии онҳо Президенти кишвар мебошад, ки онҳоро аз ҳама ҷиҳат дастгирӣ менамоянду ҳуқуқҳои онҳоро ҳифз месозанд.

Ҳусейн Нуров, яке аз сад иштирокчии барномаи идона бахшида ба Рӯзи байналмилалии ҳифзи кӯдакон бо як рафиқаш аз ҷойҳои дидааш қисса мекард. Ҳангоми пурсон гардидани таассуроташ аз сайругашти идона аён гардид, ки ӯ маҳз дар ин рӯзи таърихӣ дӯсти нав ёфтааст:

“Ман хеле хурсандам, ки имрӯз моро ба тамошои ҷойҳои фарҳангии шаҳри Душанбе оварданд. Ҳамин сарҷамъ шудани кӯдакону наврасон боис гардид, ки ман дар ин ҷо дӯсти нав пайдо намоям. Дар мактаб бештар фанни математикаро дӯст медорам. Калон ки шудам, мехоҳам корманди ҳифзи ҳуқуқ, яъне милиса шавам. Ба ҳамсолони худ гуфтаниям, ки дониш омӯзанд ва беҳудагардӣ накунанд”, - иброз дошт Ҳусейн Нуров.

Пешвои миллат ҳамеша барои рушду инкишофи кӯдакону наврасон чун ояндагони насли кишвар таваҷҷуҳи махсус зоҳир менамоянд. Президенти кишвар якуми июни соли 2011 зимни суханронӣ ба муносибати Рӯзи байналмилалии ҳифзи кӯдакон аз муҳимияти ин рӯз ёдовар шуда, иброз дошта буданд:

“Барои рушди ҳаматарафаи кӯдак ва инкишофи ҷисмониву зеҳнии вай фазои орому озод, муҳити пурмуҳаббат ва эҳсоси ғамхорӣ нисбат ба ӯ лозим аст. Ояндаи ҷомеа дар дасти кӯдакони имрӯз аст, ки фардо ба воя расида, ҷомеаро идора мекунанд. Кӯдакро мо бояд барои ҳаёти мустақилона дар ҷомеа ба таври шоиста омода кунем. Ӯро бояд дар рӯҳияи сулҳдӯстӣ, меҳнатдӯстӣ, таҳаммулпазирӣ ва ахлоқи неку ҳамида тарбия намоем. Ин сана ба мо - калонсолон ҳамеша ҳушдор медиҳад, ки масъулияти саломатӣ, тарбияи маънавии кӯдакону наврасон, фароҳам овардани шароити мусоиди таълиму тарбияи онҳо дар мактаб ва оила, инкишофи эҷодиёти бачагон ва тайёр намудани онҳо ба зиндагии оянда ба дӯши мост. Мо онҳоро бояд дӯст дорем ва меҳру муҳаббати худро дар вуҷуди поки кӯдакон ҷой диҳем”.

Пас аз тамошои Осорхонаи миллӣ ва Китобхонаи миллӣ иштирокчиён тибқи барномаи муайяншуда роҳ сӯи Боғи фарҳангӣ-фароғатии ба номи устод Садриддин Айнӣ пеш гирифтанд. Зеро дар он ҷо баҳри дар сатҳи зарурӣ таҷлил намудани Рӯзи байналмилалии ҳифзи кӯдакон ва болида гардонидани табъи иштирокчиёни чорабинии идона барномаи фарҳангӣ бо иштироки санъаткорони ҷавон доир гардид.

Аҳмадзода Дилноза, муовини раиси Кумитаи кор бо ҷавонон ва варзиш, чорабинии фарҳангиро ифтитоҳ бахшида, ҳамаи кӯдакону иштирокчиёнро аз номи раиси Кумитаи кор бо ҷавонон ва варзиш бо таҷлили Рӯзи байналмилалии ҳифзи кӯдакон табрик намуда, аз ҷумла иброз дошт:

“Рӯзи байналмилалии ҳифзи кӯдакон ҳамасола бо шукӯҳу шаҳомати хосса дар сартосари ҷумҳурӣ таҷлил карда мешавад. Боиси ифтихор аст, ки имрӯз дар чорабинӣ беш аз сад нафар наврасону кӯдакон аз шаҳру ноҳияҳои тобеи марказ ҷамъ оварда шудаанд. Тамоми имконият ва шароити зарурие, ки имрӯз муҳаёст, маҳз дар заминаи сиёсати сулҳпарваронаи Пешвои миллат ба тамоми насли созандаву бунёдкори ояндаи кишвар фароҳам оварда шудааст”.

Пас аз ифтитоҳи чорабинии фарҳангӣ ба сад нафар кӯдакони иштирокчӣ туҳфаҳо супорида шуда, дар охир аз ҷониби ҳунармандон баҳри хотирмон таҷлил гардидани Рӯзи байналмилалии ҳифзи кӯдакон барномаи ҷолиби фарҳангӣ пешкаши ҳозирин гардонида шуд.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
28 29 30 31 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 1

Июн 2018 c.