Фардо, санаи 13 июл, бо иштироки Аҳтам Абдуллозода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ноҳияи Кӯҳистони Мастчоҳи вилояти Суғд чорабиниҳои гуногуни маърифатӣ-фарҳангӣ ва варзишию иттилоотӣ доир мегарданд.

Бино ба иттилои бахши таҳлилу иттилооти кумита дар ин рӯз нахуст дар маркази ноҳияи Кӯҳистони Мастчоҳ намоиши варзишгарони ноҳия доир гардида, дар он варзишгарони риштаҳои гуногуни варзиш, аз қабили шашкаву шоҳмот, ҷудо, футболу волейбол ва дигар навъҳо дастовардҳои худро муаррифӣ менамоянд.

Гуфта мешавад, дар идомаи рӯз Аҳтам Абдуллозода, раиси Кумитаи кор бо ҷавонон ва варзиш аз иншоотҳои варзишии ноҳия дидан намуда, сипас роҳпаймоии 1000 нафараи сокинон, аз ҷумла ҷавонон баргузор мегардад ва дар охир муроҷиатномаи сокинону ҷавонони ноҳия ба Президенти кишвар муҳтарам Эмомалӣ Раҳмон қабул карда мешавад.

Бегоҳи ҳамин рӯз дар маркази ноҳия вохӯрии раиси Кумитаи кор бо ҷавонон ва варзиш бо сокинон, собиқадорон, варзишгарон ва ҷавонони фаъол доир гардида, сипас баргузории чорабинии фарҳангӣ дар назар дошта шудааст.  Дар интиҳои он ба ҷавонони фаъоли ноҳия сипосномаи Кумитаи кор бо ҷавонон ва варзиш супорида мешавад.

Ба таъкиди бахши таҳлилу иттилооти кумита дар доираи сафари кории худ Аҳтам Абдуллозода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ноҳияи Кӯҳистони Мастчоҳ ҳамзамон бо ҷавонони имконияташон маҳдуд вохӯрӣ намуда, ба онҳо туҳфаҳои яквақтаинаи пулию молӣ тақдим менамояд.