Ё Шаҳзода чӣ гуна тавонист ба китоби “Донишҷӯи беҳтарини ИДМ-2021” роҳ ёбад?

Солҳои охир ҷавон-духтарони мо барои таҳсил кардану дар оянда як фарди муҳиме дар ҷомеа шинохта шудан, аз ҷониби худ ташаббусҳои назаррасе карда истодаанд. Яке аз ин ҷавондухтарони муваффақи ташнаи илму дониш Шаҳзода Эшонова мебошад. Мо бо ӯ доир ба таҳсилу кораш суҳбат намудем, ки пешкаши хонанда мегардад.

- Соли 2021 номи шумо дар сеюмин нашри китоби байналмилалии “Донишҷӯи беҳтарини Иттиҳоди Давлатҳои Мустақил-2021” дарҷ гардид ва худи ҳамон сол шумо коромӯз дар Барномаи рушди Созмони Милали Муттаҳид (БРСММ) дар Тоҷикистон қабул гардидед. Мегуфтед, ки чӣ гуна ба ин муваффақиятҳо ноил шудед?

- Рӯзе дар як саҳифаи интернетӣ ба эълони озмуни “Донишҷӯи беҳтарини ИДМ” вохӯрдам. Аввал фикр кардам, ки ҳоло то ба он дараҷае нарасидаам, ки дар ин озмун иштирок кунам, аммо наздикону дӯстонам барои иштирокам маро бовар кунониданд.

Ҳамаи ҳуҷҷатҳои лозимаро ҷамъоварӣ намуда, ба ҷойи зарурӣ равон кардам. Баъд аз чанд муддат ба почтаи ман ҷавоб омад, ки яке аз донишҷӯёни беҳтарини ИДМ интихоб гардидаам. Хурсандиам ҳадду канор надошт. Аз тарафи маъмурияти ДМТ ва устодонам низ дастгириҳои зиёд ёфтам.

Кор ва фаъолият дар ташкилотҳои байналмилалӣ яке аз орзуҳои деринаам буд. Ҳамеша нишонаи БРСММ-ро дида, фикр мекардам, ки чӣ гуна одамон дар он ҷо кор мекунанду дар пушти он панҷараҳо чӣ пинҳон аст. Фикри супоридан ба коромӯзиро ба ин ташкилот доштам, аммо баъди хатми донишгоҳ.

Бади хатми курси 3 фаъолиятамро ҳамчун волонтёр дар ташаббуси “Startup Choikhona” оғоз кардам. Ин як зина ва таконе шуд ба ман то ба ҳайси коромӯз ба БРСММ дар Тоҷикистон қабул гардам.

Фаъолият дар дафтари БРСММ дар Тоҷикистон бароям хело писанд буд, дар он ҷо беҳтарин одамонро вохӯрдам ва бисёр чизҳои навро омӯхтам. Коромӯзиам 9 моҳ давом кард.

- Шумо гирандаи Стипендияи фахрии донишгоҳ, Стипендияи президентӣ Стипендияи саҳми оқилона ва Стипендияи JACAFA будед. Гирифтани якчанд намуди стипендия ба шумо чӣ имкониятҳоро фароҳам овард?

- Хело хурсандиовар аст, ки ба донишҷӯён ва хонандагон чунин имкониятҳо пешниҳод мегарданд. Баъди соҳиб гаштани ҳамаи стипендияҳои номбурдашуда фаҳмидам, ки хонишу дониши хуб дар ҳама ҷо гарон аст. Гарчанде новобаста аз ҳамаи стипендияҳоям кору фаъолият пеш мебурдаму падарам низ ҳамеша дастгириам мекард, аммо маблағи аз ҳисоби стипендия ба даст овардаам, руҳияи маро бештар омӯхтан, шавқманд мекард.

- Волонтёрӣ ба шумо чӣ имкониятҳо дод?

- Волонтёр будан бароям шараф аст. Аллакай тӯли 6 сол мешавад, ки дар ташкилотҳои гуногун волонтёрӣ мекунам. Дар тӯли волонтёр буданам дӯстони нави зиёде пайдо кардам, донишҳои нав гирифтам ва ба бисёр одамон ёрӣ расонида тавонистам.

- Ғолибиятҳоятон дар олимпиадаи байналмилалии “Соҳибкори ҷавон” Москва-2017 ва олимпиадаи байналмилалии “InfoMatrix Asia-2018”-Қазоқистон ба руҳияи шумо то кадом андоза таъсиргузор буд?

- Иштирок дар озмуну олимпиадаҳоро ҳамеша барои худ ҳатмӣ медонистам. Ҳамеша хунам дар ҷӯш буд ва мехостам ҳамеша аз ҳар гӯша донишҳои нав гирам. Иштирок ва ғолибият дар озмуни “Соҳибкори ҷавон”, ки дар шаҳри Москва баргузор гардид, бароям руҳияи нав бахшид. Дар давоми озмун дӯстони зиёдеро аз давлатҳои гуногуни дунё пайдо кардам ва ҳоло ҳам бо онҳо дар алоқа ҳастам. Ин озмун бароям як имконияти бузурге буд, зеро аз байни чандин давлатҳои дунё номи маро гирифтанд ва ба саҳнае, ки ба он қариб 20 ҳазор нафар нигоҳ мекарданду чанде пеш Ник Вуйчич ва Майк Тайсон дар он ҷо сухан ронда буданд, маро даъват карданд. То ҳол дидани сабти видеоии ҳамон лаҳза маро ба ваҷд меорад.

Олимпиадаи байналмилалии “InfoMatrix Asia-2018”-ки дар Қазоқистон баргузор гардид, бароям як чизи нав буд. Олимпиада аз рӯйи сабти филмҳои кӯтоҳ мегузашт ва ман бори аввал худро дар ин самт месанҷидам. Новобаста аз ин, филми сабткардаи мо ҳамроҳи тимам интихоб гардид ва мо барои иштирок дар даври финалӣ ба Донишгоҳи Suleyman Demirel, ба Қазоқистон даъват гардидем. Ман ҳеҷ бовар надоштам, ки ғолиб меоям, аммо он медали вазнин дар гардан маро бовар кунонд, ки кӯшишҳо ҳамеша меваи ширин медиҳанд.

- Мо хабар ёфтем, ки шумо ба наздикӣ тӯйи арӯсӣ кардед. Қадам гузоштан ба зиндагии мустақилона ба нақшаҳои кориатон монеа эҷод намекунад?

- Аз хурдӣ маро шахсоне иҳота мекарданд, ки ба ман боварии зиёд доштанду дастгириам мекарданд. Падару модарам беҳтарин шахсонеанд, ки маҳз бо дастгирии онҳо айни ҳол дар зиндагӣ қадамҳои устувор мегузорам. Онҳо ҳамеша ба ман бо чашми фахр менигаристанду барои пешравиам талош меварзиданд. Чанд моҳ қабл падарам аз олам даргузаштанд. Ин ҳодиса маро хело сахт шикаст дод, зеро ҳар мушкилиамро бо як суханашон ҳал мекарданд. Ин ҳам сабаби он гардид, ки камтар аз кору фаъолиятам дур гаштам, зеро бароям қабул кардани ин ҳақиқат хело душвор буд. Ҳоло оҳиста - оҳиста боз ба тарзи пештараи зиндагиам баргашта истодаам ва оилаи навам низ маро дастгирӣ мекунад. Шавҳарам то ҳадде ҳаракат мекунад, ки ман норасоии падарамро эҳсос накунам ва ҷонибдори пешравию фаъолиятам ҳастанд. Ҳар рӯзе шукр мекунам, ки дар зиндагиам одамони беҳтаринро ҳамеша вомехӯрам, хоҳ дар оила, хоҳ дар ҷойи кор ва хоҳ дар роҳи донишомӯзӣ.

- Чуноне медонем, шумо гоҳ-гоҳ ба эҷоди шеър низ машғул ҳастед. Ин шуғли шумост ва ё истеъдоде, ки аз овони кӯдакӣ доштед?

- Эҷоди шеър бароям як шуғли дӯстдоштанист. Ин истеъдодро дар ман модарам кушодаанд, зеро он нафар як шахси бомаърифату сухандон ҳастанд. Дар ёдам ҳаст, ки шеъри аввалинамро дар 7- солагӣ эҷод карда будам ва ҳамаро ба ҳайрат овардам. Як ҳодисаи хандаовар рух дода буд: дар мактаб вазифа дода буданд, ки дар бораи бойчечак шеър ёфта, аз худ карда биёем, аммо ҳарчанд кофтам, дар ин мавзӯъ шеъре пайдо накардам. Сипас тасмим гирифтам, ки худам эҷод мекунам ва бе душворӣ ин корро анҷом додам. Баъди ин ҳодиса шавқи шеърнависӣ дар ман пайдо шуд.

Зуҳро РИЗОЗОДА, “ҶТ”