ҶАВОНОН
Шанбе 25 Май 2024 04:19
9456
Сиёсати давлатии ҷавонон дар даврони соҳибистиқлолии кишвар зери таваҷҷуҳи пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дош-та, дар меҳвари сиёсати иҷтимоии Ҳукумати кишвар мақоми хосаи худро касб намудааст. Ҳамин аст, ки ба ин қишри ҷомеа диққати бештар зоҳир гардида, барои рушди ҳамаҷонибаи ҷавонон рӯз то рӯз шароитҳои соз-гор фароҳам оварда мешавад. Ҳамчунин, барои дар руҳияи ватандӯстӣ ва меҳанпарастӣ тарбия намудани ҷавонон сохторҳои дахлдор пайваста чорабиниҳои гуногун гузаронида, ба ин васила ҷиҳати рушди фардии онҳо саҳм мегузоранд.

Аз ҷумла, бахшида ба Рӯзи ҷавонони Тоҷикистон бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар тамоми минтақаҳои кишвар аз ҷониби раёсату бахшҳои вилояту шаҳру навоҳӣ дар доираи моҳвораи ҷавонон нақша-чорабиниҳо тартиб дода шуда, чорабиниҳои гуногун баргузор шуда истодааст. Дар ин радиф, дар вилояти Хатлон низ, ки яке аз вилоятҳои калонтарини мамлакат аст, чорабиниҳои зиёде ба нақша гирифта шудаву гузаронида истодаанд. Мо дар ин матлаби худ аз маҷмуи чорабиниҳое хоҳем гуфт, ки дар доираи моҳвораи ҷавонон дар ин вилоят доир гардида истодаанд.

БОХТАР: ҶАВОНОН УЗВИ ЯК ОИЛА

1-уми май дар майдони Парчами давлатии шаҳри Бохтар бо иштироки васеи ҷавонони касбу кори гуногун чорабинии ифтитоҳӣ ба муносибати Рӯзи ҷавонони Тоҷикистон таҳти унвони “Ҷавонон узви як оила” доир гардид. Дар ин бора аз Раёсати кор бо ҷавонон ва варзиши вилояти Хатлон иттилоъ доданд.
Тибқи иттилои манбаъ, дар чорабинии мазкур Фирӯза Шарифӣ, муовини раиси вилояти Хатлон иштирок намуда, иброз дошт, ки ба ҷавонони вилоят эътимод ва умеди зиёд доранд.

- Ҷавонони ҳушманду закӣ ояндаи давлату миллат дониста мешаванд ва мо ба ҷавонони фаъоли вилояти Хатлон ва неруву дониши онҳо эътимоду умеди зиёд дорем, - гуфтааст Ф. Шарифӣ.

Дар охир ба хотири болидаруҳии иштирокчиёни чорабинӣ аз ҷониби ҳунармандони раёсати фарҳанги вилоят суруду таронаҳои ватандӯстона пешкаши ҳозирин гардонида шуд.

МУЪМИНОБОД: ПЕШВОЗИ ҚАҲРАМОН

2-юми май дар ноҳияи Муъминобод сокинон дар фазои мутантан аз Нигораи Амирхон, ғолиби ҷойи сеюми Чемпионати Осиё оид ба варзиши сабук байни наврасон, ки дар шаҳри Тошкенти Ҷумҳурии Узбекистон баргузор гардида буд, пазироӣ карданд. Дар ин бора Бахши кор бо ҷавонон ва варзиши ноҳияи Муъминобод иттилоъ медиҳад.

Дар ҷараёни пешвозгирӣ намояндагони мақомоти иҷроияи ҳокимияти давлатии ноҳияи Муъминобод, кормандони шуъбаҳои маорифу фарҳанг ва ҷавонону варзишгарони ноҳия иштирок намуда, бо суруру шодмонӣ қаҳрамондухтарро пазироӣ намуданд.

Бояд зикр намуд, ки Нигораи Амирхон дастпарвари Муассисаи давлатии мактаби варзишии ноҳияи Муъминобод буда, дар ин чемпионат Тоҷикистонро сазовор муаррифӣ кард.

ҚУБОДИЁН: ҶАВОНОН, ПАЁМ ВА МАНФИАТҲОИ МИЛЛӢ

3-юми май дар доираи нақша - чорабиниҳои муштараки Бахши кор бо ҷавонон ва варзиши ноҳияи Қубодиён бо мақомоти иҷроияи ҳокимияти давлатии ноҳия, бо мақсади ташаккули мафкураи сиёсию ҳуқуқии ҷавонон таҳти унвони “Ҷавонон, Паём ва манфиатҳои миллӣ” дар чанд деҳаву маҳаллаи ноҳия хонишҳои сиёсӣ баргузор гардид.

Бино ба иттилои Бахши кор бо ҷавонон ва варзиши ноҳия дар рафти хонишҳои сиёсӣ вобаста ба дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон, ки дар Паёми ахирашон ба Маҷлиси Олии Ҷумҳурии Тоҷикистон ироа гардид, маърӯзаҳо хонда шуда, ҳамзамон перомуни тарғиби васеи дастовардҳо ва созандагиҳои Пешвои миллат дар тӯли беш аз 31 соли соҳибистиқлолӣ суханронӣ карда шуд.

Инчунин, дар доираи ин суҳбатҳо масъулин вобаста ба пешгирии шомилшавии баъзе ҷавонон ба ҳизбу ҳаракатҳои террористиву экстремистӣ, ҷинояткорӣ миёни нав-расону ҷавонон ва даъвати ҷавонон ба сафи Қувваҳои Мусаллаҳ ибрози назар карданд.

Ҷиҳати ҷоннок намудани фаъ-олияти пурсамари ҷавонон дар чанд деҳа намояндагии филиали Иттифоқи ҷавонони Тоҷикистон таъсис дода шуд.

ФАРХОР: БА ЗАБОНОМӮЗИИ ҶАВОНОН ТАВАҶҶУҲИ ХОСА ЗОҲИР КАРДА ШУД

4-уми май дар Муассисаи таҳсилоти миёнаи умумии №2-и ноҳияи Фархор аз ҷониби Бахши кор бо ҷавонон ва варзиши ноҳия, Маркази ҷавонон ва мақомоти ҳифзи ҳуқуқ бо омӯзгорон ва хонандагон вохӯрии судманд доир гардид. Дар ин бора Бахши кор бо ҷавонон ва варзиши ноҳияи Фархор иттилоъ медиҳад.
Ба иттилои манбаъ, дар рафти вохӯрӣ аз ҷониби масъулин оид ба дастуру ҳидоятҳои Пешвои муаззами миллат ҷиҳати донишомӯзии ҷавонон, омӯхтани забонҳои хориҷӣ, таваҷҷуҳи зиёд додан ба фанҳои дақиқ, гиромӣ доштани дастовардҳои даврони соҳибистиқлолӣ, пешгирии ҷинояткорӣ миёни ҷавонон, тарбияи насли наврасу ҷавон дар руҳияи меҳанпарастӣ сухан карда шуд.

Та таъкиди масъулин, нақши Пешвои миллат дар таъмини сулҳу субот ва ободии ҷумҳурӣ, ҳифзи амният ва оромии ҷомеа, тарбияи ҷавонон дар руҳияи садоқат ба Ватан, ихтиёран хизмат намудан дар сафи Қувваҳои Мусаллаҳ, пешгирии ҷавонон аз шомил шудан ба гурӯҳҳои ифротӣ ва иззату эҳтироми омӯзгорон аз мавзуъҳои меҳварии ин нишаст буду мавриди таваҷҷуҳи иштирокчиён қарор гирифт.

ДӮСТӢ: БАРГУЗОРИИ ХОНИШҲОИ СИЁСӢ

4-уми май дар ноҳияи Дӯстӣ аз рӯйи самтҳои афзалиятноки сиёсати давлатии ҷавонон бо қишри ояндасози ин ноҳия хонишҳои сиёсӣ гузаронида шуд. Дар ин бора Бахши кор бо ҷавонон ва варзиши ноҳияи Дӯстӣ иттилоъ медиҳад.

Ба иттилои манбаъ, ба ҷавонон доир ба муҳтавои Паёми Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ, пешгирии шомилшавии ҷавонон ба ҳизбу ҳаракатҳои террористиву экстремистӣ, тарғиби ҳамаҷонибаи либосҳои миллӣ, пешгирии ҳуқуқвайронкуниҳо дар байни ноболиғон, худкушӣ ва сӯиқасд ба ҷони худ, зӯроварӣ дар оила, дурусту мақсаднок истифодабарии телефонҳои мобилӣ, ҷалби ҷавонон ба хизмати Модар-Ватан, меҳнатдӯстию садоқатмандӣ, илмомӯзию забондонӣ, пешгирии бемориҳои сироятӣ маърӯзаҳо ироа карда шуд.

Ҳамзамон, дар ин радиф ба онҳо муҳтавои Қонунҳои Ҷумҳурии Тоҷикистон “Дар бораи масъулияти падару модар дар таълиму тарбияи фарзанд”, “Дар бораи танзими анъана ва ҷашну маросимҳои миллӣ” ва дигар санадҳои меъёрӣ – ҳуқуқӣ фаҳмонида шуд.

ШАҲРИТУС: МАҲФИЛИ “БЕҲТАРИН ХОНАНДАИ РӮЗНОМАИ “ҶАВОНОНИ ТОҶИКИСТОН” ДОИР ГАРДИД

8-уми май дар ноҳияи Шаҳритус дар доираи моҳвораи ҷавонон маҳфили “Беҳтарин хонандаи рӯзномаи “Ҷавонони Тоҷикистон”” баргузор гардид.

Тавре масъулини Бахши кор бо ҷавонон ва варзиши ноҳияи мазкур иттилоъ дод, мақсад аз баргузории чунин чорабиниҳо ҷалби бештари ҷавонон ба хондани рӯзнома ва ба ин васила таҳрик додани онҳо ҷиҳати гирифтани иттилои дурусту санҷидашуда ва дар умум ҳифзи амнияти иттилоотӣ мебошад.

Гуфта мешавад, ки дар доираи ин чорабинӣ аз ҷониби масъулини Бахши кор бо ҷавонон ва варзиши ноҳия, аъзои Ташкилоти ҷамъиятии “Пайравони Пешвои миллат” ва ҷавонони фаъол дар боғи фарҳангию фароғатии Тӯсӣ ба хонандагони макотиби миёна ва дигар ҷавонони фаъол шумораҳои рӯзнома ройгон дастрас гардида, тариқи дастаҷамъӣ маводҳои рӯзнома хондаву баррасӣ карда шуд. Инчунин, перомуни маводҳои таҳлилӣ баҳсҳо сурат гирифт.

БАЛҶУВОН: БАРГУЗОРИИ ЧОРАБИНИҲОИ ВАРЗИШИИ ДЕҲА БА ДЕҲА

Дар ноҳияи Балҷувон оиди иҷрои саривақтии дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон доир ба оммавигардонии варзиш ва тарзи ҳаёти солим бахшида ба Рӯзи ҷавонони Тоҷикистон чорабиниҳои варзишии деҳа ба деҳа оид ба намуди волейбол баргузор гардид.

Дар ин бора Бахши кор бо ҷавонон ва варзиши ноҳияи Балҷувон иттилоъ медиҳад.

- Лозим ба ёдоварист, ки масъулин ва мураббиёни муассисаи давлатии мактаби варзишии ноҳия ҳамарӯза мусобиқаҳои варзиширо дар сатҳи хуб роҳандозӣ ва баргузор намуда истодаанд. Бо ҳамин мақсад мусобиқаҳои варзишии волейбол ва хониши сиёсӣ байни деҳаву маҳаллаҳо баргузор карда шуд,- гуфтанд аз Бахши кор бо ҷавонон ва варзиши ноҳия.

Ҳамзамон гуфта мешавад, масъулини мактаби варзишӣ кӯшиш доранд, ки давоми соли равон, дар байни ҷавонону наврасон ва сокинони гуногунсоли деҳаву маҳаллаҳо ҳар гуна мусобиқаҳоро ба роҳ монда, тарзи ҳаёти солим ва оммавияти варзишро миёни сокинон ва аҳолӣ рушд диҳанд.

ҶАЙҲУН: ИДОМАИ МУСОБИҚАҲОИ ВАРЗИШӢ

Дар ноҳияи Ҷайҳун ба истиқболи Рӯзи ҷавонони Тоҷикистон мусобиқаҳои варзишӣ оид ба волейбол, гӯштини миллӣ, футболи хурд, саққобозӣ, тенниси рӯи миз ва шашкаю шоҳмот байни ҷавонону наврасон бо маром идома дорад.

Ба иттилои Бахши кор бо ҷавонон ва варзиши ноҳияи Ҷайҳун мақсад аз ташкил ва баргузории чунин мусобиқаҳо пеш аз ҳама таъмини оммавияти варзиш миёни наврасону ҷавонони деҳа ва маҳаллаҳои аҳолинишин, инчунин тарғибу ташвиқи тарзи ҳаёти солим, пешгирии шомилшавии баъзе ҷавонону нав-расон ба ҳар гуна ҳизбу ҳаракатҳои ифротгаро мебошад.

Гуфта мешавад, ки ин мусобиқаҳо дар арафаи Рӯзи ҷавонон ҷамъбаст гардида, ғолибон дар як чорабинии тантанавӣ, ки бо иштироки роҳбарияти ноҳия рӯзи 23 май баргузор мегардад, бо туҳфаҳои хотиравӣ қадр карда мешаванд.

КӮЛОБ: БАРГУЗОРИИ МАШҚИ ПАГОҲИРӮЗӢ

Давоми ҳафтаи сипаригардида зери шиори “Варзиш - саҳнаи номуси миллат!” аз ҷониби Муассисаи давлатии мактаби варзишии шаҳри Кӯлоб дар маркази шаҳр машқҳои пагоҳирӯзӣ баргузор гардид. Дар ин бора Бахши кор бо ҷавонон ва варзиши шаҳри мазкур иттилоъ дод.

Ба иттилои манбаъ, мақсад аз баргузории чунин чорабиниҳо рушду оммавияти варзиш ва тарғиби тарзи ҳаёти солим миёни аҳолӣ мебошад. Машқҳои дастаҷамъонаи пагоҳирӯзӣ бо ҷалби васеи варзишгарон ва кормандони ташкилоту корхонаҳои шаҳр, дар варзишгоҳи марказии шаҳри Кӯлоб ва чанд нуқтаи дигар гузаронида шуд.

Гуфта мешавад, дар ин машқҳои пагоҳирӯзӣ садҳо нафар варзишгарон ва кормандони ташкилоту корхонаҳои шаҳр иштирок намуданд.

ЁВОН: БАРГУЗОРИИ ХОНИШҲОИ СИЁСӢ

Дар ноҳияи Ёвон дар доираи нақша - чорабиниҳо аз рӯи даҳ самти афзалиятноки сиёсати давлатии ҷавонон, бо мақсади ташаккули мафкураи сиёсию ҳуқуқии ҷавонон таҳти унвони “Ҷавонон, Паём ва манфиатҳои миллӣ” хонишҳои сиёсӣ баргузор гардид. Дар ин бора Бахши кор бо ҷавонон ва варзиши ноҳияи Ёвон иттилоъ медиҳад.

Дар рафти суҳбатҳо аз ҳаёти сиёсии мамлакат ва равандҳои нави ҷомеаи ҷаҳонӣ мисолҳои равшану дақиқ барои ҷавонон оварда шуда, ба онҳо ёдрас карда шуд, ки мебояд дар ин давраи ҳассос, ки ҷомеаи ҷаҳонӣ ба буҳронҳо ва чолишҳои зиёде гирифтор шуда истодааст, зиракии сиёсиро аз даст надиҳанду зери сиёсати инсондӯстонаву ватанпарваронаи Пешвои миллат муттаҳид бошанд.

Лозим ба ёдоварист, ки дар доираи моҳвораи ҷавонон дар вилоят чунин чорабиниҳо то 30 майи соли равон ҳамарӯза бо баргузории маҳфилҳои илмиву эҷодӣ, фарҳангӣ - фароғатӣ ва варзишӣ идома хоҳад ёфт.

БАРОИ МАЪЛУМОТ:

Вилояти Хатлон яке аз сернуфустарин минтақаҳои маъмурии кишвар ба ҳисоб рафта, шумораи умумии ҷавонон дар сатҳи вилояти мазкур ба 1 миллиону 39 ҳазору 300 нафар мерасад, ки аз он 509 ҳазору 994 нафарашонро ҷавондухтарон ташкил медиҳанд.

Дар партави сиёсати ҷавонпарваронаи Пешвои муаззами миллат имрӯзҳо аз вилояти Хатлон дар хориҷи кишвар бо Стипендияи байналмилалии Президенти Ҷумҳурии Тоҷикистон - “Дурахшандагон” 2460 нафар таҳсили илм намуда истодаанд, ки ин дар оянда барои рушди соҳаҳои гуногуни хоҷагии халқи вилоят такони ҷиддӣ хоҳад бахшид. Шумораи кадрҳои роҳбарикунанда аз ҳисоби ҷавонон дар вилоят ба 721 нафар мерасад.

Имрӯз дар шаҳру навоҳии вилоят 35 мактаби варзишӣ фаъолият менамояд, ки дар ин муассисаҳо аз рӯи 35 намуди варзиш 17 ҳазору 106 нафар варзишгар, аз он ҷумла, 2438 нафар бонувон дар 1330 гурӯҳи машқӣ ҳамарӯза ба машғулиятҳои варзишӣ фаро гирифта мешаванд.

Эзоҳи худро нависед



Рамзҳо дар расм