Раиси шаҳри Хуҷанд Маъруф Муҳаммадзода се нафар муҳассилини муассисаҳои таълимии шаҳрро, ки аз рӯйи натиҷаи ҷамъбастии соли таҳсили 2017-2018-и Вазорати маориф ва илми Ҷумҳурии Тоҷикистон медалҳои тилло ва нуқраро ба даст оварданд, ба ҳузур пазируфт.

Раиси шаҳри Хуҷанд Маъруф Муҳаммадзода зимни суҳбат барандагони медалҳои тиллою нуқра ва сарварони муассисаҳои таълимӣ, ки хонандагонашон ба чунин шарафмандӣ комёб шудаанд, табрику таҳният намуда, аз ҷумла афзуд, ки соҳаи маориф нақши калидӣ дар ҳамаи соҳоти хоҷагии халқ дорад. Маҳз аз ин нукта маориф дар меҳвари асосии сиёсати давлатдории Асосгузори сулҳу ваҳдати миллат-Пешвои миллат, Президенти мамлакат муҳтарам Эмомалӣ Раҳмон қарор гирифтааст.

Ҳамасола таваҷҷӯҳи доимӣ зоҳир гардидан ба соҳаи маориф, таҳким бахшидан ба пойгоҳи илмию техникии соҳа, қадршиносии неруи зеҳнӣ имконият фароҳам овардааст, ки дар муассисаҳои таълимӣ насли ҷавони баркамол мусаллаҳ бо донишҳои муосир таълиму тарбия гиранд.

Барандагони медали тилло Некрӯз Шораҷабов, муҳассили гимназияи №1, медалҳои нуқра Нилуфар Ғоибназарова, хонандаи гимназияи №4 ва толибаи МТМУ №16 Зебо Солибоева аз истиқболи гарми раиси шаҳри Хуҷанд миннатдорӣ баён намуда, таъкид доштанд, ки ин дастоварди тамоми муҳассилини шаҳр аст.