Маъруф Муҳаммадзода, раиси шаҳри Хуҷанд субҳи имрӯз ба 100 нафар муҳассилини макотиби миёна, муассисаҳои олӣ ва варзишгароне, ки ба натиҷаҳои назаррас ноил гардидаанд, стипендияи Раиси шаҳрро тақдим намуд.

Дар ибтидо Раиси шаҳри Хуҷанд гирандагони стипендияи Раиси шаҳрро бо дастовардҳояшон самимона табрик намуда, иброз дошт, ки маҳз сиёсати ояндабинони Асосгузори сулҳу ваҳдати миллӣ, Пешвои миллат, Президентии Ҷумҳурии Тоҷикистон Эмомалӣ Раҳмон барои рушду ташаккули ҷавонону наврасон дар тамоми соҳаҳои хоҷагии халқи кишвар имкониятҳои мусоид фароҳам оварда шудааст.

Баъдан дар лаҳзаи тантанавӣ ба ҷавонону наврасони дар озмуни стипендияи Раиси шаҳр ғолибомада, шаҳодатнома ва корти бонкь бо маблағи ҳазор сомонӣ супорида шуд.

Лозим ба ёдоварист,ки стипендияи Раиси шаҳри Хуҷанд соли 1997 таъсис ёфтааст. Бахшида ба эълон гаштани соли 2017 чун «Соли ҷавонон» бо дастгирии Мақомоти иҷроияи ҳокимяти давлатии шаҳри Хуҷанд шумораи гирандагони стипендияи мазкур аз 60 нафари солҳои қаблӣ ба 100 нафар муқаррар гашта, маблағи он низ аз 900 сомонӣ ба ҳазор сомонӣ зиёд карда шуд. Бо ташаббуси Раиси шаҳри Хуҷанд бори нахуст 20 нафар варзишгарон низ барои дастовардҳои варзишӣ дар мусобиқаҳои умумиҷумҳуриявӣ ва байналмиллалӣ ба гирифтани стипендияи Раиси шаҳр шарафёб шуданд.

Шералӣ АЗИМӢ, “ҶТ”