Бо ибтикори Бахши кор бо ҷавонон ва варзиши шаҳри Хоруғ дар маркази ВМКБ конфронси амалӣ таҳти унвони “Ҷавонон ва падидаҳои нав” баргузор гардид, ки дар он намояндагони Мақомоти иҷроияи маҳаллии ҳокимияти давлатии шаҳр, Шуъбаи маориф ва илм, Бахши кор бо занон ва оила, прокуратура ва ҷавонону донишҷӯён ширкат намуданд.

Имомёрбек Имомёрбеков, мудири Бахши кор бо ҷавонон ва варзиши шаҳр зимни баромади хеш оид ба зуҳуроти худкушӣ, бегонапарастӣ, нашъамандӣ ва шомилшавии ҷавонон ба ҳизбу ҳаракатҳои ифротгаро нақл карда, гуфт ки наврасону ҷавонон набояд бетаҳаммул ва сустирода бошанд: “Сарнавишти инсониятро бидуни мушкиливу ихтилофот тасаввур кардан ғайри имкон аст, вале пеш аз ҳама ҷавонон бояд зиракии сиёсиро аз даст надиҳанд ва муқобили падидаҳои номатлуби ҷомеа пайваста истодагарӣ намоянд.”

Дар конфронс ҳамчунин Кишвар Амиршоев, корманди Муассисаи давлатии маркази ҷавонони ВМКБ, Ёралӣ Холдоров, донишҷӯи курси 3 – и факултаи биологияи Донишгоҳи давлатии Хоруғ ба номи М. Назаршоев, Сураҷ Чоршанбиев, муовини сардори Раёсати кор бо ҷавонон ва варзиши вилоят дар мавзӯъҳои “Ҷавонон - захираи тиллоии кишвар”, “Бархурди ҷавонон бо зуҳуроти нав” ва “Нақши ҷавонон дар суботу оромии мамлакат” маърӯза карданд.

Машҳур ИМОМНАЗАРОВ, “ҶТ”