Соли 1997 Президенти мамлакат дар Анҷумани сеюми иттиҳодияҳои занон - созмонҳои ғайриҳукуматии занони ҷумҳурӣ масъалаи таъсиси квотаи Президенти Ҷумҳурии Тоҷикистонро ба миён гузошта, таъкид карданд, ки барои ҳарчи бештар ба ҳаёти ҷамъиятию сиёсӣ ва роҳбарии истеҳсолӣ ҷалб намудани занон бояд аз ҳисоби духтарон мутахассисони соҳаҳои гуногуни хоҷагии халқ барои таъмин намудани ноҳияҳои дурдаст бо кадрҳои маҳаллӣ тайёр карда шавад. Маҳз ин иқдоми наҷибонаи Президенти мамлакат ба орзуи нафароне, ки дар дил хоҳиши таҳсил доштанд, ҷомаи амал пӯшонд ва имкон фароҳам овард, то онҳо ба қуллаҳои баланди муваффақият бирасанд.

Дар мавриди ҷалби духтарони деҳот тибқи Квотаи президентӣ ва имкониятҳои он Наврӯз Мирзо, сухангӯи Вазорати маориф ва илм мегӯяд:

- Имрӯз ҷалби духтарони ноҳияҳои дурдаст тариқи Квотаи президентӣ ба муассисаҳои таҳсилоти олии кишвар дар сатҳи хуб ба роҳ монда шудааст. Ва донишҷӯдухтароне, ки аз минтақаҳои кӯҳистон ҳастанду тибқи Квотаи президентӣ дар донишгоҳу донишкадаҳо таҳсил мекунанд, бо стипендия ва хобгоҳ таъмин карда мешаванд. Инчунин, нафарони хоҳишманд метавонанд, дар хобгоҳи ҷумҳуриявии занон - “Сарвар”, ки дар назди Вазорати маориф ва илми кишвар фаъолият мекунад, истиқомат кунанд. Ҳамзамон, дар доираи барномаи фаъолияти хобгоҳи мазкур ба дигар машғулиятҳои таълимӣ машғул шаванд. Бояд гуфт, ки хатми чордаҳ ҳазор духтарон тариқи Квотаи президентӣ гувоҳи он аст, ки иқдоми мазкур имкони хубе барои духтарони деҳот аст, то онҳо битавонанд, дар муассисаҳои таҳсилоти олии кишвар таҳсили худро идома диҳанд.

Яке аз чунин духтарони хушбахт Қурбонбӣ Балучаева, сокини шаҳри Кӯлоб мебошад, ки соли 2019 тариқи Квотаи президентӣ ба факултети журналистикаи Донишгоҳи миллии Тоҷикистон дохил шудаву онро бомуваффақият хатм намудааст. Қурбонбӣ айни ҳол ба зодгоҳаш баргашта, дар Маркази фарҳангии ҷавонони шаҳри Кӯлоб ба ҳайси директори марказ фаъолият намуда истодааст. Тавре худи ӯ қайд кард:

- Ман яке аз ҷавонони хушиқболам, ки тариқи Квотаи президентӣ ба донишгоҳ дохил шудам. Квотаи президентӣ ба ҷавондухтарон имконият фароҳам овард, ки ба донишгоҳу донишкадаҳои олӣ дохил шуда, дониши худро сайқал диҳанд ва дар оянда мутахассиси хуби соҳаҳои гуногун шуда, ба халқу миллат содиқона хизмат кунанд.

Тавре аз оморҳо бармеояд, давоми 26 соли ба роҳ мондани Квотаи президентӣ 14 ҳазор ҷавондухтар, муассисаҳои таҳсилоти олии касбии кишварро хатм кардаанд. Ҳамин тариқ, шумораи зиёди духтарон тибқи он дар донишгоҳу донишкадаҳо ройгон таҳсил намудаву ҳамзамон гирандаи стипендия низ мебошанд.

Зулола Қамарова низ аз шумори ҷавондухтаронест, ки соли 2019 тибқи Квотаи президентӣ ба факултети журналистикаи Донишгоҳи миллии Тоҷикистон дохил шуда, онро соли 2023 бо дипломи аъло хатм намудааст. Ӯ айни замон ба ҳайси мутахассиси пешбари шуъбаи рушди иҷтимоӣ ва робита бо ҷомеа дар ҷамоати деҳоти Саразми шаҳри Панҷакент фаъолият мекунад. Зулола дар мавриди имкониятҳои Квотаи президентӣ чунин ибрози андеша намуд:

- Аз хурдӣ орзу доштам, тариқи Квотаи президентӣ таҳсил намоям ва хушбахтона муяссарам шуд, ки ба ин хос-таи худ бирасам. Бояд гуфт, ки истиқлолияти давлатӣ ба ҷавонони кишвар имкониятҳои зиёде барои расидан ба ҳадафҳои созанда, илмомӯзӣ ва рушди неруи зеҳнӣ фароҳам сохт ва дар қатори он таъсиси Квотаи президентӣ дорои арзиши ҳаётӣ мебошад. Квотаи Президенти Ҷумҳурии Тоҷикистон бо мақсади дастгирӣ ва ҷалби духтарону писарони болаёқати деҳоти дурдасти шаҳру ноҳияҳои ҷумҳурӣ ба муассисаҳои таҳсилоти олии касбӣ, таъмини минтақаҳо бо мутахассисони соҳибкасб ва ба низом даровардани раванди қабули донишҷӯён ба муассисаҳои таҳсилоти олӣ равона гардидааст ва имконияти беҳтаринро барои онҳое, ки мехоҳанд таҳсилро идома диҳанд, фароҳам сохтааст, то онҳо ройгон таҳсил намоянд.

Муниса Сафарова, муҳаррири хурди раёсати барномаҳои ҳунармандии Муассисаи давлатии телевизиони “Сайёҳӣ ва ҳунарҳои мардумӣ” бо истифода аз ин иқдом айни ҳол дар ДМТ таҳсил мекунад.

- Худро яке аз нафарони хушбахт меҳисобам, ки тавассути Квотаи президентӣ дар Донишгоҳи миллии Тоҷикистон таҳсил карда истодаам ва дар баробари ин гирандаи стипендияи аъло низ ҳастам. Ин иқдоми хуби Президенти мамлакат имконият фароҳам овард, ки мо - духтарони ноҳияҳои дурдаст бе ягон мушкилӣ ба донишгоҳ дохил шуда, таҳсил намоем. Фикр мекунам, агар квота намебуд, аз куҷо маълум буд, ки ман ба донишгоҳ дохил мешудам ё не, - мегӯяд М. Сафарова.

Дар қатори ҷавонон волидон низ аз ин иқдоми наҷиби Сарвари давлат изҳори қаноатмандӣ менамоянд.

- Таъсиси Квотаи президентӣ аз ҷониби муҳтарам Эмомалӣ Раҳмон иқдоми муҳим ва саривақтӣ буд. Чун дар ноҳияҳои дурдаст ҷавононе ҳастанд, ки дониши хуб доранд, аммо шароити зиндагӣ имкон намедиҳад, ки онҳо баъди хатми мактаб таҳсилро дар донишгоҳу донишкадаҳои олии кишвар идома диҳанд. Аз ин рӯ, Квотаи президентӣ имконияти хубест барои онҳо, то битавонанд ройгон таҳсил намоянд. Тавре ҳамагон медонем, Президенти кишвар дар баромадҳои худ пайваста қайд мекунанд, ки ҷавонон ояндаи миллатанд. Таъсиси Квотаи президентӣ аз он гувоҳӣ медиҳад, ки Сарвари давлат ҳамеша ба ҷавонон таваҷҷуҳи махсус зоҳир намуда, дастгиру мададгори онҳо ҳастанд, - қайд намуд, Шарофиддин Қамаров яке аз волидоне, ки фарзандаш тариқи Квотаи президентӣ таҳсил мекунад.

Мувофиқи нақшаи қабули донишҷӯён ба муассисаҳои таҳсилоти олии касбии ҷумҳурӣ дар соли таҳсили 2023-2024 барои таҳсили писарону духтарони деҳоти дурдасти мамлакат 1279 квота ҷудо шуда, аз ин теъдод 60%-и квота барои духтарон ихтисос дода шудааст.
Зикр бояд намуд, ки вобаста ба амалӣ гардидани барномаи “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” (солҳои 2020-2040), ки бо қарори Ҳукумати Ҷумҳурии Тоҷикистон аз 30 июли соли 2020, №427 тасдиқ шудааст, теъдоди роҳхатҳои квотаи Президенти Ҷумҳурии Тоҷикистон барои соли таҳсили 2023-2024 дар самти ихтисосҳои илмҳои табиӣ, дақиқ ва риёзӣ зиёд карда шудааст.

Хулоса, таъсиси Квотаи президентӣ иқдоми хуб ва туҳфаи арзишманд барои ҷавонон аз ҷониби Президенти кишвар буда, нафароне ки тариқи он таҳсил мекунанд, бояд ба қадри ин ғамхории Роҳбари давлат расанду хубу аъло таҳсил намоянд ва мутахассиси хуб гардида, ба давлату миллати хеш хизмати содиқона намоянд.

Гулафшон КАРИМОВА, “ҶТ”