Таҳти унвони “Ҷавонон – арҷгузори фарҳанги миллӣ”, аз 16 то 20-уми сентябри соли ҷорӣ дар вилояти Суғд барои ҷавонони фаъоли кишвар лагери ҷумҳуриявӣ ташкил гардид.

Дар асоси нақша-чорабиниҳои тасдиқнамудаи Кумитаи кор бо ҷавонон ва варзиши назди Ҳукумати ҷумҳурӣ ва сарпарастии Федератсияи футболи Тоҷикистон, ҷиҳати ҳарчӣ хубтар огоҳӣ пайдо кардани ҷавонон аз фарҳанг ва расму оинҳои миллӣ дар истироҳатгоҳи солимгардонии кӯдакон, наврасон ва ҷавонон, урдугоҳи “20-солагии Истиқлолияти давлатии Ҷумҳурии Тоҷикистон” воқеъдар ноҳияи Ҷаббор Расулови вилояти Суғд, таҳти унвони “Ҷавонон – арҷгузори фарҳанги миллӣ” лагери ҷумҳуриявии омӯзишии ҷавонони фаъол доир карда шуд.

Субҳи рӯзи 16-уми сентябр дар Кумитаи кор бо ҷавонон ва варзиш ҷавонони фаъол аз минтақаҳои гуногуни кишвар ба ҳам омада, омодаи сафар гардиданд. Пеш аз сафар Аҳтам Абдуллозода, раиси Кумита, ба ҷавонон барои сафар ва истироҳат комёбӣ таманно намуда, аз ҷумла афзуд: “Яке аз масъалаҳои муҳим дар шароити тамоюли ҷомеа ҷиҳати ҳавасмандгардонии ҷавонон бо мақсади иштироки фаъолона дар татбиқи сиёсати давлатии ҷавонон ташкили лагерҳои тобистонаи фароғатӣ ва омӯзишӣ маҳсуб меёбад. Ташкили чунин чорабиниҳо бо иштироки наврасону ҷавонони фаъоли кишвар аз тадбири муҳим ҷиҳати болидахотирӣ, ташаккули малакаҳои муҳими ҳаётӣ, такмили донишҳои нав, ташкили фароғат, дӯстиву рафоқат ва иштироки фаъол дар ҳаёти ҷамъиятӣ мебошад”.

Тавре таъкид гардид, ташкили чунин чорабиниҳо дар таҳкимёбии дӯстию ҳамдилии ҷавонони ҷумҳурӣ саҳми арзанда хоҳад гузошт. Дар воқеъ, иқдоми мазкур дар шароити тамоюли ҷомеа саривақтӣ буда, дар асл ба баланд гардидани сатҳи ҷаҳонбинӣ, худшиносӣ ва ҳисси ватандӯстии ҷавонон ҳамчун омили таъсирбахш муҳим мебошад. Ташаббуси мазкур имкон медиҳад, ки ҷавонони фаъол дар фазои ҳамдилӣ зери шиори муттаҳидӣ, дӯстӣ, сулҳу осоиштагӣ ҷамъ омада, аз дастовардҳои солҳои соҳибистиқлолии Тоҷикистон шукрона намоянд.

Лагер шароити мусоид оид ба табодули таҷриба, шиносоӣ, фароғат, саёҳат ва таҳкими дӯстиро миёни ҷавонони минтақаҳои гуногуни кишвар такмил бахшида, дар умум, ҷиҳати иштироки ҷавонони кишвар дар татбиқи сиёсати пешгирифтаи Ҳукумати Ҷумҳурии Тоҷикистон дар самти сиёсати давлатии ҷавонон заминаҳои муассир фароҳам меорад.
Ҷавононро роҳбарияти истироҳатгоҳ бо хушнудӣ ва эҳтироми хосса истиқбол намуда, изҳор доштанд, ки баҳри фароғати ҷавонон тамоми шароитҳои лозимаро муҳайё хоҳанд кард.
Шоми ҳамин рӯз дар толори фарҳангии муассиса таҳти унвони “Шоми истеъдодҳо” тренинги омӯзишӣ-фарҳангӣ баргузор карда шуд. Дар қисмати омӯзишӣ ба иштирокчиён раванди баргузор кардани чорабиниҳои фарҳангӣ ва тарзи ташкили он омӯзонида шуд.

Дар тренинг иштирокчиён, ки зиёда аз 70 нафарро ташкил медоданд, ба чор гурӯҳ ҷудо шуда, барномаҳои фарҳангӣ-фароғатӣ доир намуданд. Дар ин қисмат ҳар як иштирокчӣ маҳорат ва ҳунари худро ба якдигар намоиш дода, як шоми пур аз фароғатро барои ҳам тақдим доштанд.

Кушодашавии расмии лагер рӯзи 17-уми сентябр, пас аз машқҳои пагоҳирӯзӣ ва хуроки субҳгоҳӣ оғоз шуд. Зимни кушодашавии расмӣ Самандар Абдуллозода, роҳбари гурӯҳ ҷавононро барои лоиқ гаштанашон дар чунин истироҳатгоҳҳо ва ҳамчун ҷавонони фаъол эътироф гардиданашон аз ҷониби ҷомеа табрик намуда, инчунин, даъват ба амал овард, ки барои дар сатҳи баланд ҷараён гирифтани истироҳату фароғат заминагузор бошанд. Гуфта шуд, ки мақсад аз баргузор намудани лагери ҷавонон андӯхтани донишҳои нав ва малакаҳои муҳими ҳаётӣ дар самтҳои тарзи ҳаёти солим, пешбурдани ғояҳои худ, худдорӣ аз зуҳуроти номатлуб, муаррифии қобилияту истеъдодҳои худ, фароҳам овардани шароити мусоид барои мубодилаи малака байни онҳо мебошад.

Пас аз ифтитоҳи расмӣ дар мавзӯи “Нақш ва иштироки ҷавонон дар тарғиби ғоя ва арзишҳои миллӣ” тренинги дигари омӯзишӣ, ки барои насли наврас ва ҷавон басо аҳамиятнок аст, оғоз гардид. Дар ҷараёни омӯзиш С. Абдуллозода дар мавзӯи худшиносии миллӣ ва арҷ гузоштан ба фарҳанг ва арзишҳои миллӣ суханронӣ намуда, ҷавононро барои баланд бардоштани сатҳи худшиносии миллиашон даъват кард.

Дар идоми дарс санъати дарсгузарӣ ба иштирокдорон фаҳмонида шуда, инчунин ба онҳо имконият дода шуд, ки мустақилона барои ҳамсолони худ дарс гузаранд.
Дар қисмати дигар ҷавонон аз слайд-презентатсияҳо истифода бурда, дар мавзӯҳои “Тарзи тарғибу ташвиқи фарҳанги миллӣ”, “Тавлиди ғояҳои нав баҳри ҳифзи арзишҳои миллӣ”, “Нақши ҷавонон дар риояи фарҳанги миллӣ” ва “Маданияти ҷаҳонишавӣ ва арзишҳои миллии тоҷикӣ” дарсҳои шавқовареро баргузор намуданд.
Шоми ҳамин рӯз таҳти унвони “Шоми шеър ва ҷавонӣ” дар атрофи гулхани афрӯхта шабнишинии ҷавонон доир карда шуд.

Дар лагери мазкур ҳамчунин тренинг ва семинарҳои омӯзишии гуногуни варзишӣ, маърифатӣ, фарҳангӣ гузаронида шуда, инчунин, чорабиниҳои зиёде оид ба тарзи ҳаёти солим, интихоби фарҳанги миллӣ, ташаккули тафаккури ҳуқуқӣ, боло бурдани маърифати оиладории ҷавонон, рушди малакаҳои зеҳнӣ ва равнақ бахшидан ба фаъолияти волонтёрӣ баргузор гардиданд.

Дар рӯзи чоруми сафар иштирокчиёни лагер аз ҷойҳои тахрихӣ ва фарҳангии шаҳри бостонии Хуҷанд дидан намуданд, ки ин ба худогоҳӣ ва худшиносии миллии ҷавонон нақши муассир хоҳад гузошт. Иштирокчиён аз ҷумла аз муассисаи давлатии “Қасри Арбоб”, ки дар таърихи навини миллати тоҷик нақши ҳалкунанда дошт, дидан намуда, сипас МД Маҷмааи таърихӣ-фарҳангии “Истиқлол” ва дар идома осорхонаи шаҳри Хуҷандро тамошо карданд.

Иштирокчиёни лагер дар рӯзи панҷуми сафар, 20-уми сентябр, озими пойтахт гардида, зимни мулоқот бо муовини аввали раиси Кумитаи кор бо ҷавонон ва варзиш Ризо Назарзода таассуроти худро аз сафар баён намуда, ба дастандаркорони лагер изҳори миннатдорӣ карданд.

Хуршед ХОВАРӢ, “ҶТ”, Душанбе – Ҷ.Расулов – Хуҷанд – Душанбе