Дар Театри давлатии ҷавонон ба номи Маҳмудҷон Воҳидов, санаи 11 март, бахшида ба 80-солагии адиби достонсарои зиндаёд Саидҷон Ҳакимзода намоишгоҳ оиди зиндагӣ, ашъор, осори безаволи шоир ва маҳфили адабӣ баргузор шуд.

Барои гиромидошти ашъори волои шоир дар маҳфил аз ҷониби ҷавонони фаъол намоишномаи ҳаёт ва фаъолияти шоири зиндаёд пешниҳод карда шуд.

Зикр шуд, ки устод Саидҷон Ҳакимзода дар эҷодиёташ бештар дар мавзуъҳои ватан, модар, худшиносию худогоҳӣ, ростию ростқавлӣ, ахлоқи ҳамидаи инсонӣ эҷод намудааст. Шоир ҳанӯз аз давраҳои аввали саҳибистиқлолӣ президенти кишварро дар эҷодиёташ Пешвои миллат ном бурдааст.

Дар маҳфил китобдорон ба хонандагон оид ба қадру манзалати шеъри равони устод С. Ҳакимзода маълумот дода, иброз доштанд, ки устод дар ватансароӣ ҳамчун донишманди комил шинохта шуда, шеърҳои ватанпарваронаи ӯ донишмандию таърихдонии шоирро собит месозад. Ин ашъор бо истифода аз ишора даҳҳо номҳои таърихӣ хонандаи закиро талқин мекунанд, ки фазилати андешаашро бедор намояду ба бузургии шоир офарин хонад. Устод дар шинохти Ватан, эътирофу эҳтиром ва ситоиши бузургии он шарҳу баён намеҷӯст, балки ибораю ифодаҳо ва образҳо аз дили саршори муҳаббати ӯ рӯ мезаданд.

Дар интиҳои маҳфил Аҳтам Абдулозода, раиси Кумитаи кор бо ҷавонон ва варзиш аз баргузории чунин маҳфил, ки бо ташаббуси бевоситаи ҷавонони фаъоли назди кумата доир гардид, изҳори миннатдорӣ намуда, иброз дошт, насли имрӯз ба гузаштаи хеш пайравӣ менамояд, ки ин мояи ифтихор ва сарфарозист.