Нисо Рустамова, ҷавондухтари тоҷик дар озмуни “Марвориди ҷаҳон – 2023”, ки дар кишвари Тотористони Федератсияи Русия баргузор гардид, иштирок намуда, то ба даври ниҳоӣ расид. Ин озмун миёни донишҷӯёни хориҷие, ки дар шаҳри Қазон таҳсил мекунанд, ҷараён гирифта, дар он 36 бону аз 15 мамлакати ҷаҳон иштирок намуданд. Дар зимн доир ба ин ва дигар дастовардҳояш суҳбат намудем.

– Ба даври ниҳоии озмуни мазкур роҳ ёфтед ва кадом эҳсосҳо фарогиратон шуд?

– Эҳсоси шодию фараҳ ва қаноатмандӣ.

– Чӣ гуна ба озмун роҳ ёфтед?

– Аз ин пеш дар озмуни “Зебосанам” ширкат варзида, соҳиби шоҳҷоиза гардидам ва мустақиман ба озмуни “Марвориди ҷаҳон – 2023” роҳ ёфтам.

– Бисёр ҷавондухтарон ҳаваси дар озмунҳои зебоӣ ширкат варзиданро доранд, шумо чӣ?

– Не, ман аз хурдӣ танҳо орзуи мусиқинавози ҳирфаӣ шуданро дош-там. Аз ин рӯ, дар Консерваторияи давлатии Қазон таҳсил дорам.

– Чаро маҳз мусиқӣ?

– Модарам навозанда аст. Шавқи мусиқинавозӣ аз хурдӣ фарогири вуҷудам буд.

– Таҳсил дар Қазону муносибати мардуми он ҷо бо хориҷиён, аз ҷумла тоҷикон чӣ гуна аст?

– Муносибати мардуми он ҷо бо хориҷиён, аз ҷумла бо тоҷиконе, ки он ҷо таҳсил мекунанд, дар қиёс ба шаҳрҳои Москва ва Санкт-Петербург тафовут дорад. Қазон шаҳри байналмилалист. Дар ин ҷо мо мардуми дигар мамлакату миллатҳоро хеле зиёд мушоҳида менамоем. Шояд аз ҳамин сабаб бошад, бо якдигар муносибати дӯстонаву бародарона дорем. Якдигарро хуб дарк мекунем ва мекӯшем бо ҳам муносибати хуб дошта бошем.

Дар ин ҷо ташкилоте бо номи “Хонаи дӯстии халқҳо” мавҷуд аст, ки моро барои гузаронидани озмунҳо, чорабиниҳои фарҳангӣ ва ғайра дастгирӣ мекунанд. Шахсан маро барои омодагӣ дидан ба озмун дастгирӣ намуда, рафти озмунро дуруст фаҳмониданд.

– Кадом намуди асбобҳои мусиқиро навохта метавонед?

– Ҳама намуди асбобҳои зарбии мусиқиро менавозам. Вале зиёдтар асбоби мусиқии миллӣ - таблак навохтанро дӯст медорам. Дар ин озмун ҳам истеъдоди таблакнавозии худро бо як эҳсоси баланд нишон додам. Барои ҳамин аъзои ҳакамони озмуни мазкур ба ман унвони “Бонуи ҳассос”-ро раво диданд.

– Аъзои ҳакамон бештар ба чӣ аҳамияти хосса медоданд ё чӣ барояшон муҳимтар буд?

– Ҳарчанд озмуни зебогӣ ҳам бошад, бештар ба маҳорату истеъдоди духтарон баҳо медоданд. Ин озмун аз шаш марҳила иборат буд ва барои гузаштан аз як марҳила ба марҳилаи дигар аз рӯи мизони ҳунар буд.

– Иҷрои кадом шартҳои озмун ҷолиб буд?

– Ба мо супориш доданд, ки дар бораи худам нақл кунам ва ҳамзамон як таоми миллиро омода созам. Ин манзараро дар фазои кушод наворбардорӣ карданд. Раванди ин супориш бароям хеле писанд омад. Ман он ҷо яке аз ғизоҳои дӯстдоштаи худ – қурутобро тайёр кардам. Бароям ин шарт хеле ҷолиб ва хотирмон буд.
Ҳамзамон, моро ба яке аз мактабҳои миёнаи шаҳри Қазон бурданд. Бояд ба хонандагон дар бораи Тоҷикистони азиз маълумот медодам. Дар синф 25 нафар толибилм мехонданд. Онҳо аз қавму миллатҳои мухталиф, вале ҳама бо забони русӣ ҳарф мезаданд. Ман ҳамроҳи худ парчами Тоҷикистонро бурдам. Сипас, дар бораи кишварамон маълумоти дақиқу муфассал додам, ки ин масъулияти баланд буд.

– Дар оянда чӣ нақша доред?

–Мехоҳам Консерваторияи давлатии Қазонро бо муваффақият хатм намоям. Баъдан ба Тоҷикистон баргашта, дар меҳанам кору фаъолият намоям. Орзу дорам, ки дар соҳаи худ, яъне навозандагӣ беназир бошам.

– Ба ҳамсолонатон чӣ гуфтаниед?

– Бархе аз ҷавонон вақте дар самте муваффақ намешаванд, дарҳол хаставу дилшикаста мегарданд ва аз мақсаду орзуҳои хеш даст мекашанд. Ба онҳо гуфтаниям, ба худ ва истеъдоди худ бовар дошта бошанд. Зеро вақте ба худ боварӣ доред, ба комёбиҳои бузург мерасед.


Фараҳноз САФАРОВА,
“ҶТ”