Шоми 5-уми май дар амфитеатри Боғи Садриддин Айнӣ бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва мақомоти иҷроияи ҳокимияти давлатии шаҳри Душанбе шоу-барномаи фарҳангӣ-фароғатӣ таҳти унвони “Ҷовидон бод, ҷавонӣ ва ҷавонон!” бахшида ба Рӯзи ҷавонон баргузор гардид.

Дар чорабинии мазкур Абдулло Раҳмонзода, раиси КҶВ, муовинони раис, сарбозону афсарони сохторҳои қудратӣ ва ҷавонони касбу кори гуногун иштирок карданд.

Дар оғози чорабинӣ Абдулло Раҳмонзода ҳозиринро ба Рӯзи ҷавонон табрик карда, гуфт, ки имрӯз ҷавонони мо такягоҳ, умед ва ифтихори давлату ҷомеа ба шумор рафта, дар рушди соҳаҳои иқтисодиву иҷтимоии кишвар нақш ва мавқеи басо муҳимро касб кардаанд.

- Вокеан, имрӯз ҷавонони ватандӯсту ватанпарвар, ворисони асили миллати тамаддунофари тоҷик, матину қавиирода ва далеру шуҷои кишвар, дар тамоми самту соҳаҳои Тоҷикистони соҳибистиқлол бо боварии комилу ғайратмандона фаъолият намуда, дар пешрафти мамлакат ҳиссаи муносиб гузошта истодаанд,- илова кард раиси Кумита.

Пас аз суханронии А. Раҳмонзода қисмати фарҳангии чорабинӣ оғоз гардид. Дар ин қисмат ҳунармандони шинохтаи кишвар аз қабили Шуҳрат Сайнаков, Дилшоди Файзулло, Фариддуншоҳ Иброҳимзода, Давлат Назриев ва дигарон сурудҳои худро баҳри ҳозирин пешкаш карданд.

Дар охири чорабинӣ аз ҷониби Кумитаи кор бо ҷавонон ва варзиш ба сарояндагон сипоснома ва туҳфаҳои хотиравӣ тақдим карда шуд.