Нимаи дуюми рӯзи 1-уми октябр дар толори фарҳангии “Кохи Суруш”-и шаҳри Душанбе дар доираи нақшаи чорабинии муштараки Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо раиси Комиссияи марказии интихобот ва раъйпурсии Тоҷикистон бо ҷавононе, ки бори аввал дар интихобот ширкат менамоянд, мулоқот баргузор гардид.

Дар мулоқоти мазкур раиси Комиссияи марказии интихобот ва раъйпурсии Ҷумҳурии Тоҷикистон Худоёрзода Бахтиёр оид ба тартиби иштирок дар интихоботи Президенти Ҷумҳурии Тоҷикистон, ҳуқуқҳои интихобкунанда, меъёрҳову стандартҳои интихобот ва нақши интихобот дар ҳаёти сиёсиву мадании шаҳрвандони ҳар як давлату миллат суханронӣ намуд.

Дар идома Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон таъкид намуд, ки “иштироки фаъолонаи ҷавонон дар раванди интихоботи Президенти Ҷумҳурии Тоҷикистон, фаъолияти густурдаи волонтёрони кумита дар ҳавза ва участкаҳои интихоботӣ ва омодагии волонтёрон барои роҳнамоии мушоҳидони милливу байналмилалӣ дар раванди ин маъракаи муҳими сиёсӣ дар мадди аввал аст. Ва ман бо боварии комил гуфта метавонам, ки ҳар як ҷавони ба нангу номус ба мисли шумо дар интихобот фаъолона иштирок менамояд”.