Масъулини Раёсати кор бо ҷавонон ва варзиши Вилояти Мухтори Кӯҳистони Бадахшону кормандони Раёсати Вазорати корҳои дохилӣ дар вилоят бо ҷавонону наврасони ҷамоати Вери ноҳияи Шуғнон мулоқот карданд.

Вохӯрӣ бо мақсади татбиқи Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд”, таҳкими ифтихори ватандорӣ, эҳтироми арзишҳои миллию умумибашарӣ ва фарҳангӣ, ҳифзи ҳуқуқу манфиатҳои наслҳои ояндасоз ва пешгирии ҷинояткорӣ байни ҷавонону наврасон гузаронида шуд.

Муовини сардори Раёсати кор бо ҷавонон ва варзиши вилоят Юсуф Асадбеков зимни мулоқот қайд кард, ки даст задани баъзе ноболиғону наврасон ва ҷавонон ба ҷинояткорӣ рафтори нангин буда, пешгирии он рисолати ҳамаи табақаҳои ҷомеа аст.

Ба таъкиди Ю. Асадбеков, бечуну чаро иҷро намудани ҳамаи талаботи қонунҳои амалкунандаи давлат, хоса Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” бар нафъи ҳамагон аст. Ҷавонон набояд дар ошкору пешгирӣ кардани ҳама гуна ҷинояткорӣ байни наслҳои ояндасоз бетараф бошанд. Баръакс, бояд баҳри беҳбудии ҳаёту ояндаи хеш тамоми талошҳоро ба харҷ диҳанд.

Дар фарҷом як қатор фаъолони ҷамоат бо сипосномаҳои Раёсати кор бо ҷавонон ва варзиши вилоят ва мукофоти варзишӣ қадрдонӣ гардиданд.