Дар Донишкадаи технологии Рочестери шаҳри Ню - Йорки Иёлоти Муттаҳидаи Амрико Олимпиадаи байналмилалии “GENUIS” аз рӯйи 8 равияи фанҳои табиӣ-риёзӣ ва ҷамъиятӣ - гуманитарӣ (лоиҳасозӣ) хонандагони синфҳои 8-12 бо фарогирии зиёда аз 3643 иштирокчӣ, аз 67 давлати дунё ва 34 шаҳри ИМА, бо ҳам сабқати илмӣ намуданд.

Дар ин бора аз Вазорати маориф ва илми Ҷумҳурии Тоҷикистон хабар доданд.

Бино ба иттилои манбаъ дар ин олимпиадаи сатҳи баланд мунтахаби Ҷумҳурии Тоҷикистонро 3 наврас - Алиакбаров Шаҳзод, Одинаев Имрон ва Фариддунзода Маҳмадсаид аз муассисаи таълимии хусусии Абдураҳмони Ҷомӣ аз рӯйи категорияи “Genius Robotics” муаррифӣ намуда, сазовори ҷойи 2-юм гардиданд.

Боиси тазаккур аст, ки дар олимпиадаи мазкур 2557 лоиҳа аз 8 категория, аз ҷумла категорияи роботик 63 лоиҳа, санъати тасвирӣ 578 лоиҳа, мусиқӣ 62 лоиҳа, видеоролик 138 лоиҳа, табиатшиносӣ 1014 лоиҳа, тиҷорат 140 лоиҳа, кодинг 105 лоиҳа ва маҳорати нависандагӣ 457 лоиҳа байни 1065 нафар ғолибони даври ниҳоӣ баргузор гардид.

Наҷиба МУРОДБЕКОВА, “ҶТ”