Таҳти ҳамин унвон 18 январ бахшида ба “Солҳои рушди деҳот, сайёҳӣ ва ҳунарҳои мардумӣ” дар Донишгоҳи технологии Тоҷикистон конфронси илмӣ - амалӣ баргузор гардид.

Дар он намояндагони Кумитаи кор бо ҷавонон ва варзиш, Кумитаи рушди сайёҳӣ, олимону донишмандон ва донишҷӯёни фаъоли шаҳри Душанбе, ки тибқи Квотаи президентӣ таҳсил мекунанд, ширкат доштанд.

Зарина Юсупова, муовини ректор оид ба таълиму тарбияи Донишгоҳи технологии Тоҷикистон ҳамаи ширкаткунандагонро ба донишгоҳ хушомадед гуфта, зимни маърӯзаи хеш аз чанд нуктаи муҳими Паёми имсолаи Асосгузори сулҳу ваҳдати миллӣ-Пешвои миллат, Презденти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ ёдовар шуд. Аз ҷумла ӯ қайд кард, ки дар низоми давлатдории муосири тоҷикон Паёми солонаи Президенти кишвар ҳамчун ҳуҷҷати барномавии сиёсиву ҳуқуқӣ ва иқтисодиву фарҳангӣ дорои афзалиятҳои давлатдории миллӣ шинохта шудааст. Дар асл мо аз Паём то Паём шоҳиди воқеаҳои бузурге мегардем, ки дар маҷмӯъ раванди рушди бонизоми давлатдории моро таҷассум мекунад.

Сардори Раёсати кор бо ҷавонони Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Роҳимзода Шоҳзод аз дастгириҳои бесобиқаи Пешвои миллат ба насли ҷавон ёдовар шуда, аз ҷавонон даъват ба амал овард, ки ҷавобан ба ин ғамхориҳо сипосгузор бошанд: “Мо ҷавонони фаъолро мебояд, ифтихор аз он кунем, ки чунин сарвару пешво дорем. Президенти кишвар муҳтарам Эмомалӣ Раҳмон пайваста ба ҷавонон таъкид карда мегӯяд: “Мо бо ҷавонони кишвар ҳамчун нерӯи фаъолу боғайрат, ташаббускору созанда эътимоди зиёд дорем ва дар раванди бунёди ҷомеаи демократӣ ва ободу пешрафта ба онҳо такя мекунем”. Моро бояд дар ин раванд қабл аз ҳама сипосгузор бошем,”-гуфт Раҳимзода Ш.

Мадина Назарова донишҷӯи курси чоруми Донишгоҳи миллии Тоҷикистон зимни маърӯзаи хеш, ки таҳти унвони “Тоҷикистон-маҳзани таърихӣ ва мероси бойи қадима” ироа гардид, аз таърихи бою пурғановати халқи тоҷик ёдовар шуд. Ӯ аз дастрас будани ин ҳама мероси пурғановат ба насли ҷавонро фоли нек хонда, гуфт мо ҷавононро мебояд арҷгузор бошем ва дар поянда нигоҳ доштани онҳо саҳми хешро гузорем.

Дар охири конфронс миёни иштирокдорон ва маърузачиён суолу ҷавобҳо сурат гирифт.