Ҳар кас дар зиндагӣ идеал ё ормони худро дорад. Ман бо муҳаббат китобҳои Пешвои миллат, муҳтарам Эмомалӣ Раҳмонро мутолиа менамоям. Аз саҳифаҳои матбуоти даврӣ бо шавқи бемаҳдуд дар хусуси ин фарзанди фарзонаи миллат мақолаву гузоришҳои гуногунро мехонам. Бо шинос шудан ба ҷабҳаҳои гуногуни ҳаёти Пешвои миллат ифтихорам боз ҳам бештар мегардад ва шукрона аз он мекунам, ки дар чунин кишвари ободу зебо ва амн зиндагӣ дорам.

Оре, Пешвои миллат, муҳтарам Эмомалӣ Раҳмон ҳамчун шахсияти сиёсӣ ва рамзи пойдориву бардавомии давлатдории мустақили тоҷикон, сулҳу ваҳдати миллӣ ва кафили рушди босуботи ҷомеаи Тоҷикистон маҳсуб меёбанд ва ин тинҷиву амоние, ки мо дорем, ҳосили заҳматҳои эшон аст. Маҳз ҳамин фарзанди сарбаланди миллат аст, ки моро аз парокандагӣ ва давлатро аз нобудшавӣ наҷот дода, кохи муҳташами сулҳи тоҷиконро эъмор, низоми давлатдории муосири миллиро асос гузоштанд. Ҳамчунин, қобилияти ҳуқуқии давлатдории халқро эҳё намуда, ҳаққи таърихии миллатро ба давлати мустақил эълон ва татбиқ сохта, тоҷиконро ҳамчун миллати дорои Ватан, забон, фарҳанг ва таърихи қадима ба ҷаҳониён муаррифӣ намуданд.

Зиҳӣ, фарзанди бо садоқату саодатёри миллат! Шумо идеали мо – ҷавонони кишвар ҳастед. Мо феълан дар ҳама корҳоямон ба Шумо пайравӣ мекунем, зеро мо пайрави шумоем.

Ҳасан ИСМОИЛОВ, омӯзгори ҷавони МТМУ №53, деҳаи Марғедари ноҳияи Панҷакент