Паёми табрикотии раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода бахшида ба Рӯзи Президенти Ҷумҳурии Тоҷикистон

Ҷавонону варзишгарони саодатманди кишвар!

Таҷлили Рӯзи Президенти Ҷумҳурии Тоҷикистон барои ҳар як сокини кишвар боиси ифтихор буда, он чун рамзи қадрдонӣ ба хизматҳои нотакрори таърихии Асосгузори сулҳу ваҳдати миллӣ - Пешвои муаззами миллат муҳтарам Эмомалӣ Раҳмон мебошад.
Тоҷикистон дар симои Президенти маҳбуби кишвар муҳтарам Эмомалӣ Раҳмон нафареро мебинад, ки аз ҳама чиз гузашт намуда, ба хотири барқарор гардидани сулҳу ваҳдат, сарҷамъии миллат ва пароканда нашудани давлати тозабунёд ҷони худро дар хатар гузошта, ба майдони сиёсат омаданд ва бо хиради баланди инсондӯстона тавонистанд, ба ҷои бесарусомониҳо ҳаёти шоистаро ба мардум баргардонанд.

Дар он замоне, ки ҳама аз барқарор гардидани сулҳу ваҳдат ноумед гардида буданд, маҳз доир гардидани Иҷлосияи шонздаҳуми Шӯрои Олии Ҷумҳурии Тоҷикистон боис гардид, ки ҳамчун ҳадяи таърих ва пайки наҷот ба миллати тоҷик Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳбарии давлатро ба зимма гирифтанд ва шуълаи умедро дар дили ҳар як фарди миллати тоҷик фурузон карданд. Талоши шабонарӯзии ин марди миллат боис гардид, ки имрӯз Тоҷикистон чун биҳишти рӯи дунё машҳури ҷаҳон асту мардум аз доштани чунин Роҳбари фидокору барқароркунандаи сулҳу субот  мефахранд.
Пешвои муаззами миллат муҳтарам Эмомалӣ Раҳмон дар таърихи давлатдории Тоҷикистон нафаре мебошанд, ки дар ташаккули таърихи давлатдорӣ, эҳёи падидаҳои неку писандида ва арзишҳои волои фарҳанги ниёгонамон хизматҳои бузург кардаанд. Ҳамин гуна кӯшишу талошҳои пайвастаи Пешвои миллат буданд, ки имрӯз мо соҳиби давлатему мавриди эътирофу эҳтироми ҷаҳониён қарор дорем.

Дастгириву ғамхории Президенти кишвар муҳтарам Эмомалӣ Раҳмон аст, ки имрӯз баҳри насли наврасу ҷавон кулли имкониятҳои илмомӯзӣ фароҳам гардида, барои он ки ҷавонони имрӯза хондаву соҳибкасб ва мутахассиси варзида гарданд, мактабу литсей, коллеҷҳо ва донишгоҳу донишкадаҳои гуногун фаъолият намуда истодаанд. Ҷавонон аз дастгириҳои Роҳбари давлат рӯҳу илҳоми тоза гирифта, дар тамоми соҳаҳо ба кору фаъолияти назаррас машғуланду саҳми худро дар рушди кишвари азизамон Тоҷикистон гузошта истодаанд. Дар доираи дастгириҳои Пешвои муаззами миллат варзишгарони кишвар Парчами давлатро дар мусобиқаҳои сатҳи байналмилалӣ боло бардошта истодаанд.

Рӯзи Президенти Ҷумҳурии Тоҷикистонро мардуми шарафманди кишвар бо назардошти саҳми арзандаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ташаккули давлатдории навини кишвар, эҳёи давлати миллӣ, таъмини сулҳу ваҳдат ва баланд бардоштани нуфузу эътибори Тоҷикистон дар арсаи байналмилалӣ соли чорум аст, ки бо шукӯҳ ҷашн гирифта, он ҳамчун рамзи садоқату самимият ба Президент мебошад, ки сулҳу амонӣ ва Ваҳдати миллиро ба сокинони ин сарзамин оварда, зиндагии шоистаро барои хурду бузург муҳайё сохт.    

Таҷлили Рӯзи Президенти Ҷумҳурии Тоҷикистон ҳадяи беҳтарин барои ҳар як хурду бузурги кишвар аст ва онро бояд ҳифзу гиромӣ дошт ва бо тантана ҷашн гирифт.

Рӯзи Президенти Ҷумҳурии Тоҷикистонро ба ҷавонону варзишгарон ва дар симои онҳо ба кулли мардуми тоҷик муборакбод мегӯям!