Ба ифтихори “Соли ҷавонон” дар шаҳри Хоруғ роҳпаймоии донишҷӯёну хонандагони мактабҳои олӣ ва таҳсилоти ҳамагонии Вилояти Муҳтори Кӯҳистони Бадахшон доир гашт, ки дар он зиёда аз 4 000 нафар ширкат варзиданд.

Муҳассилинро Гулдаста Орумбекова, муовини раиси вилоят, Маҳтобшоҳзода Арамбегим Бозор, раиси шаҳри Хоруғ, Ризо Раҳматшоев, сардори Раёсати кор бо ҷавонон ва варзиш, Ҷонибеки Қозибек, раиси Кумитаи иҷроияи ҲХДТ дар вилоят, Ниёзалӣ Қамбаров, ноиби ректор оид ба тарбияи Донишгоҳи давлатии Хоруғ ба номи Моёншо Назаршоев ҳамроҳӣ намуданд.

Раҳпаймоии ҷавонону наврасон зери шиорҳои “Мо – ҷавонон ҷонибдори қонунҳои миллӣ”, “Танзим – баркати зиндагӣ”, “Либоси миллӣ – оини ниёгон аст”, “Ҷавонон – пайрави Пешвои миллат”, “Мо бо Пешвои хеш ифтихор дорем”, “Соли 2017–“Соли ҷавонон” аз варзишгоҳи марказӣ то боғи фарҳангӣ-фароғатии “Чорбоғ”-и шаҳри Хоруғ идома ёфт.

Қабл аз доиршавии барномаи фарҳангии “Шоми ҷавонӣ” дар боғи мазкур Гулдаста Орумбекова бо ҷавонони вилоят мулоқот намуда гуфт, ки бузургтарин рафоҳати ҷавонони даврони соҳибистиқлолӣ ин таҳкими суботу оромии комил дар кишвар аст ва онҳо бояд аз ин неъмат баҳра баранд: “Имрӯзҳо ба ҷавонони мо аз як тараф агар тамоюли ҷаҳонишавӣ асар карда бошад, аз ҷониби дигар зуҳуроти ифротгароӣ, терроризм, ҷиноятҳои фаромиллӣ ва ғайра зиндагии тамоми аҳолии сайёраи заминро нороҳат сохтаанд. Бинобар ин, ҷавонону наврасони мо бояд аз дастовардҳои пурарзиши Ваҳдату Истиқлолияти давлатии кишвар васеъ истифода баранд ва баҳри омӯзиши илм, аз худ кардани техникаву технологияҳои муосир пайваста талош намоянд, то минбаъд ҳам зиракии сиёсиро аз даст надиҳанд”.

Дар барномаи “Шоми ҷавонӣ” ҷавонони лаёқатманд, ҳунармандон ва ҳофизони шинохтаи ВМКБ ҳунарнамоӣ карда, беҳтарин намоишҳои саҳнавӣ, созу сурудро пешкаши ҳозирин намуданд.

Машҳур ИМОМНАЗАРОВ, “ҶТ”