ҶАВОНОН
Душанбе 06 Июл 2020 11:01
3529
Мария дас Грасас Силва Фостер. Ин зани барзилиягӣ бо иродаи қавӣ ва ҷидду ҷаҳди беназир тавонист, ки аз камбағаливу нодорӣ раҳо шуда, нахустин зани бонуфуз ва сарватманди сайёра гардад.

КӮДАКӢ

Овони кӯдакӣ ва наврасии Мария дас Грасас, сарвари яке аз ширкатҳои бузурги Бразилия – Petrobras, дар яке аз музофотҳои қашшоқи Бразилия сипарӣ гардидааст. Падари ӯ майзадае буду модараш шабу рӯз кор мекард. Марияи хурдсол барои каме беҳтар намудани вазъи зиндагии хонавода қоғазкуҳна ва банкаҳои алюминиро ҷамъ оварда мефурӯхт.

CAVEIRAO – АВТОМОБИЛИ ЗИРЕҲПӮШ

Муваффақияту комёбиҳои Мария дас Грасас аз зинаҳои поён оғоз гардид. Ӯ фаъолияти кории худро дар синни 25-солагӣ ба ҳайси коромӯз дар ширкати Petrobras оғоз намуд. Ӯ тамоми монеаҳоро бартараф намуда тавонист, ки нахустин зан – роҳбари ширкати бонуфуз оид ба коркарди кон гардад. Барои заҳматҳои шабонарӯзӣ ва матонату суботкориҳо ба ӯ тахаллуси Caveirao–ро доданд, ки маънояш автомобили зиреҳпӯши политсия мебошад ва аз болои тартибу низом дар маҳалҳои камбағалнишин назорат мебарад.

ЗАНИ БОНУФУЗТАРИНИ САЙЁРА

Тоҷирзани бразилиягӣ муҳандис, мутахассиси соҳаи кимиё ва директори генералии ширкати давлатии коркарди нафт – Petrobras нахустин занест дар ҷаҳон, ки роҳбарии ширкати бузурги истихроҷи газу нафтро ба уҳда дошт. Моҳи апрели соли 2013 аз рӯи тадқиқоти маҷаллаи Time ӯ ба рӯйхати 100 нафар одамони машҳур ва бонуфузи ҷаҳон шомил гардид. Моҳи августи ҳамон сол тибқи тадқиқоти маҷаллаи Forbes ӯ яке аз 20 нафар занҳои бонуфузи сайёра эътироф гардид. Моҳи апрели соли 2008 аз ҷониби вазири корҳои хориҷии Бразилия Мария Фостер бо ордени Риу-Бранку сарфароз гардонда шуд. Соли минбаъда Донишгоҳи молиявии Бразилия ӯро бо ҷоизаи Роҳбари сол сарфароз гардонид. Ҳамчунин, ӯ барои хизматҳои арзанда дар соҳаи иқтисодлиёт, иҷтимоиёт ва маданияти Бразилия сазовори чандин ҷоизаҳои давлативу ҷамъиятӣ гардидааст.

ДИРӮЗ

Мария дас Грасас соли 1953 дар шаҳри Каратингаи штати Минас-Жерайс, ки дар қисмати шарқии мамлакат воқеъ аст, ба дунё омадааст. Ӯ 8-сола буд, ки оилаи онҳо аз Каратинга ба Фавел – яке аз маҳаллаҳои ноободи камбағалон, дуртар аз Рио -де Жанейро, кӯч баст. Чунин маҳаллаҳо дар солҳои 70-уми асри гузашта бо сатҳи пасти зиндагӣ ва рӯзгори қашшоқонаи сокинонаш ном бароварда буданд. Баланд будани сатҳи ҷинояткорӣ, ҳолати бади санитарӣ, гуруснагӣ, фурӯши маводи мухаддир ва ҳар гуна бемориҳо дар қатори сатҳи баланди муриши одамон то имрӯз аз хусусиятҳои хоссаи чунин маҳаллаҳо боқӣ мондааст. Ба андешаи Фостер маҳз ҳамин гуна шеваи рӯзгор боис гардид, ки ӯ барои беҳтар сохтани сатҳи зиндагии худу наздиконаш ҷиддан камар бандад. Ӯ 12 соли ҳаёти худро дар чунин муҳити носозгор сипарӣ намуда, дар ин муддат хеле зиёд заҳмат кашид, то ба модараш кӯмак намояд. Ӯ партовгоҳҳоро тоза намуда, барои таҳсилаш маблағ ҷамъ меовард. Мария он замон намедонист, ки оё пагоҳ имкони ба мактаб рафтану барои таҳсилаш маблағ пардохтанро ёфта метавонад ё не?

ИМРӮЗ

Мария имрӯз бо аҳли оилааш - ҳамсар ва ду фарзандаш дар Копакабана ном маҳаллаи бонуфузи Рио-де-Жанейро, ки яке аз мавзеъҳои сайёҳии ин кишвар маҳсуб меёбад, умр ба сар мебарад.

Мария баъди хатми Донишгоҳи Флуминенс таҳсилашро дар Донишгоҳи федеролии Рио-де-Жанейро идома дода, дараҷаи магистратураро дар соҳаи техникаи атомӣ ҳимоя намуд. Фаъолияти густурдаи ӯ дар ширкати Petrobas барояш роҳу имкониятҳои зиёдеро кушода, ӯро ба фатҳи қуллаҳои баланди шуҳрат раҳнамун сохт.

Директори генералии ширкати бонуфузи ҷаҳонӣ Мария дас Грасас ноил шудан ба чунин комёбиҳои беназирро, пеш аз ҳама, натиҷаи заҳматталабию мушкилнописандӣ, иродаи қавию шикастнопазир ва албатта, дастгирии дӯстону наздикон меҳисобад.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
29 30 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Июл 2020 c.