Ҳоло бисёр ҷавонони тоҷик дар як қатор макотиби олии хориҷи кишвар машғул ба омӯхтани илманд. Холбоқӣ Қобилзода яке аз чунин ҷавонон аст. Ӯ донишҷӯи курси 3-и донишгоҳи шаҳри Синдаои кишвари Чин мебошад. Саъю кӯшишашро дар ҷодаи илмомӯзӣ дида, ҶДММ “Корхонаи саноатии Тоҷикистону Хитой” пас аз анҷоми таҳсил ӯро нияти ба кор гирифтан дорад. Холбоқӣ пешниҳодро пазируфта, ҳоло мехоҳад донишгоҳро бо муваффақият хатм намояд.

Ӯ гуфт: “Ман донишҷӯи Донишгоҳи давлатии Хуҷанд ба номи академик Бобоҷон Ғафуров будам. Аз хурдӣ забономӯзиро дар дил парварида, мекӯшидам, ки забондон шаваму таҳсилро дар хориҷи кишвар идома диҳам. Ҳамин тавр ҳам шуд. Ман дар донишгоҳ ихтисоси чинӣ-англисиро интихоб кардам. Забономӯзӣ, муҳити хуб ва завқу рағбати бештарро талаб мекунад. Дар донишгоҳ шароит барои забономӯзӣ хуб буд ва устодон бо роҳҳои осонтарин ба мо нозукиҳои забони хориҷиро меомӯзонданд. Ҳамеша таъкид мекарданд, ки забономӯзӣ гуфтугӯи бештарро талаб менамояд. Ин ақида маро водор намуд, ки ба донишгоҳҳои Ҷумҳурии халқии Хитой ҳуҷҷатҳоямро пешниҳод карда, дониши худро сайқал диҳам. Барои нағз омӯхтани забон ва фарҳанги чинӣ бо кӯшишҳои зиёд моҳи сентябри соли 2019, тариқи барноми Конфутсий ба Донишгоҳи шаҳри Синдао дохил шуда, то имрӯз таҳсил дорам”.

Ба ҳамагон маълум аст, ки бемории сироятии COVID-19 пеш аз ҳама дар кишвари Хитой пайдо шуд. Мардум дар таҳлуқа афтода, ҳазорон сокинони ин кишвар аз беморӣ фавтиданд. Бисёре аз донишҷӯён ба кишварҳои худ баргаштанд. Аммо Холбоқӣ ҳамроҳ бо ҳамсабақонаш он ҷо монда, худро эҳтиёт ва бемориро паси сар карданд.

“Ҳар рӯз бо падару модарам, тариқи телефон гап мезадам, онҳоро ором намуда, мегуфтам, ки мо дар ҷойи бехатар қарор дорем. Кӯшиш мекардам, ки падару модар нигарон нашаванд. Дар он рӯзҳои вазнин устодони донишгоҳ моро хуб дастгирӣ карда, аз хобгоҳ баромадан намемонданд. Чизи даркориро ба мо сари вақт дастрас мекарданд, то ба мушкилӣ дучор нашавем. Хушбахтона, рӯзҳои душворро паси сар карда, имрӯз таҳсили худро давом дода истодаем”, - афзуд Холбоқӣ.

Ӯ дар идомаи суҳбат гуфт, ки бори аввал ба хориҷи кишвар сафар намудааст. Он ҷо ҳамчунин, аз кишварҳои Туркманистон, Озарбойҷон, Русия ва дигар давлатҳо донишҷӯёни зиёд таҳсил доранд. Муошират байнашон асосан бо забони русӣ сурат мегирад. Дар ибтидо ӯ низ ҳангоми муошират каме душворӣ мекашид. Пас ҷиддан ба омӯзиши забони русӣ машғул шуд. Ҳозир бошад, бе душворӣ бо дигар ҳамсабақон ва атрофиён суҳбат мекунад. Ӯ мехоҳад, ки ҷавонони тоҷик, ҳарчи бештар забон омӯзанд ва забондон шаванд. Зеро дар хориҷи кишвар ягона мушлилоти ҷавонони мо, ин надонистани забон аст.

Ӯ дар баробари таҳсил намудан, тариқи интернет ҳамчун тарҷумон фаъ-олият дорад. Ӯ донандаи забони русӣ, англисӣ, хитоӣ буда, бо ин васила даромади хубе ба даст меорад.
“Дар оянда нақша дорам, ки донишгоҳро хатм намуда, таҳсилро дар бахши магистратура идома диҳам ва чун мутахассиси соҳибмаълумот ба зодгоҳ баргашта, баҳри пешрафти диёри азизи худ саҳмгузор бошам”, - иброз дошт, дар поёни суҳбат Холбоқӣ Қобилзода.