Барои дастгирии бештари ҷавонон ҳамчун қувваи бузургу созанда ва дорои донишҳои тоза соли 2017 аз ҷониби Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон “Соли ҷавонон” элон шуд.  Ба таҳсил фаро гирифтани ҷавонон, дар сатҳи баланд ба роҳ мондани таълиму тарбия, нигоҳ доштани ҷавонон аз ҳар гуна хатарҳо ва ба ҷои кори доимӣ таъмин намудани онҳо яке аз ҳадафҳои асосии “Соли ҷавонон” ба шумор меравад. Ба ҳамин мақсад Ҳукумати Ҷумҳурии Тоҷикистон қарори дахлдорро “Дар бораи тартиби тақсимот ва ба ҷои кор таъмин намудани мутахассисони ҷавон”-ро дар шакли нав ба тасвиб расонд. Тадбири мазкур барои ба ҷои кор таъмин намудани мутахассисони ҷавон назар ба солҳои қаблӣ як қатор тағйиротҳоро рӯи кор овард. Аз ҷумла минбаъд роҳбарони муассисаҳои таҳсилоти миёна ва олии касбии кишварро баъд аз гирифтани фармоиши роҳбари мақомоти давлатии дахлдор ва нақшаи тақсимоти хатмкунандагон вазифадор менамояд, ки пеш аз тақсимоти асосӣ маълумот оид ба эҳтиёҷоти муассисаҳои давлатиро доир ба норасоии кадрҳо дар муассисаҳои давлатӣ ва ғайридавлатӣ дархост намоянд, хатмкунандагонро бо тартиби мазкур ва шароиту хусусиятҳои ҷои кори пешниҳодшуда шинос намоянд, то оғози тақсимот варақаи шахсии ҳар як хатмкунандаро ба расмият дароранд, ки ба он ҳуҷҷатҳои зарурӣ оид ба вазъи саломатӣ ва оилавии онҳо замима гарданд ва то баргузории тақсимоти асосӣ дар факултетҳо тақсимоти пешакӣ гузаронида, ҷои кори онҳоро муайян намоянд. Умуман, дар тартиби макзкур шакли тақсимоти хатмкунандагон, бо кор таъмин кардани мутахассисони ҷавон тибқи роҳхат ва додани дипломи хатми муассисаи таҳсилоти олӣ ва миёнаи касбӣ ба мутахассисони ҷавон ва ҷавобгарии он пешбинӣ шудааст.

Бояд гуфт, ки тартиби тақсимот ва ба ҷои кор таъмин намудани мутахассисони ҷавон мутобиқи моддаи 32 Қонуни Ҷумҳурии Тоҷикистон “Дар бораи маориф” таҳия  гардидааст.