24-апрел, дар хобгоҳи Донишгоҳи давлатии тиҷоратии Тоҷикистон, мулоқоти намояндагони вазорату идораҳои гуногун бо донишҷӯён баргузор гардид.

Дар чорабини мазкур намояндагони Кумитаи кор бо занон ва оилаи назди Ҳукумати ҷумҳурӣ, Кумитаи ҷавонон, варзиш ва сайёҳӣ, Вазорати корҳои дохилӣ, Вазорати тандурустӣ ва ҳифзи иҷтимоии аҳолӣ, Кумитаи оид ба корҳои дин, танзими анъана ва ҷашну маросимҳои миллии ҷумҳурӣ иштирок ва суханронӣ намуданд.

Ҳабибулло Амирбекзода, муовини раиси Кумитаи ҷавонон, варзиш ва сайёҳии назди Ҳукумати ҷумҳурӣ, зимни суханронии худ таъкид намуданд, ки “ – Бо кӯшиш ва ташаббусҳои пайгиронаи Пешвои миллат, соли 2017 соли ҷавонон эълон гардид. Бевосита Сарвари давлат ҳангоми ироаи паёмашон иброз доштанд, ки аз лаҳзаҳои аввали ба даст овардани истиқлолияти давлатӣ ҷавонон ва сиёсати давлатии ҷавонон дар меҳвари сиёсати Ҳукумати кишвар қарор дорад. Ҳамин буд, ки баъд аз шаш моҳи ба даст овардани истиқлолияти давлатӣ, яъне моҳи марти соли 1992 аввалин санади меъёрӣ-ҳуқуқӣ қонун дар соҳаи ҷавонон қабул гардид”.

Гуфта шуд, ки соли ҷавонон такрорнашаванда аст. Ин солест, ки ҳар як ҷавон ормону орзуи худро метавонад дар амал татбиқ намояд. Аз ин рӯ мо ҷавонон бояд тавониста бошем, ки соли мазкурро дар сатҳи баланд пешвоз гирем ва барои насли оянда, ки баъди мову шумо аз ин сол ёдоварӣ мекунанд, як чизи хубе боқӣ гузорем, то онро ба некӣ ёд кунанд.

Ҳамчунин, дар ҷараёни мулоқот оид ба одобу ахлоқи ҷавонон, нақши онҳо дар ҷомеаи имрӯза ва ҳурмату эҳтиром намудани волидайн аз ҷониби ҷавонон ибрози назар гардида, аз ҷавонон тақозо карда шуд, то ватандӯст бошанду баҳри пешрафту шукуфоии ин меҳани биҳиштосо саҳми арзандаи худро гузоранд.

Дар охир байни донишҷӯён ва масъулин суҳбати озод сурат гирифт.

Беҳрӯз ХОЛМУРОДОВ, “ҶТ”