Аз 30-юми ноябр то 3-юми декабр бахшида ба Рӯзи байналмилалии волонтёрон дар маркази таълимии “Бонки миллии Тоҷикистон” дар шаҳри Гулистон лагери фарҳангӣ-фароғатӣ ва омӯзишӣ таҳти унвони “Ҷавонон-Пайравони Пешвои миллат” ташкил ва баргузор гардид.

Дар лагери мазкур ҷавонони фаъол аз 18 шаҳру ноҳияи вилояти Суғд ва муассисаҳои таҳсилоти олӣ ва касбии вилоят ҷалб гардида, дар маҷмуъ 65 нафар ҷавон муддати 4 рӯз ба омӯзиш фаро гирифта шуданд.

Бино ба иттилои Муноҷот Қаҳҳорова, мудири бахши кор бо ҷавонони Раёсати кор бо ҷавонон ва варзиши вилояти Суғд, ба иштирокчиён аз ҷониби мутахассисони соҳа перомуни мавзуъҳои самаранок истифода бурдани вақт, таҳкими зиракии сиёсӣ, истифодаи оқилонаи шабакаҳои иҷтимоӣ, таҳкими ватанпарастии шаҳрвандон, тренингу семинар доир гардида, ҳамзамон, доир ба масоили марбут ба таърихи сиёсии Ҷумҳурии Тоҷикистон дарсҳои сиёсӣ гузаронида шуд.

Ҳамзамон, давоми лагери омӯзишӣ филми “Марди роҳ” ба намоиш гузошта шуда, миёни иштирокчиён озмуну мусобиқаҳои гуногун гузаронида шуд.

Инчунин, дар доираи лагер як қатор чорабиниҳои фарҳангӣ, машқҳои дастаҷамъӣ, бозиҳои варзишӣ ва интеллектуалӣ баргузор гардиданд.

Дар фарҷом Бахтиёр Исматҷонов, сардори Раёсати кор бо ҷавонон ва варзиши вилояти Суғд иштирокчиёни лагерро бо ифтихорнома ва туҳфаи хотиравӣ қадрдонӣ намуд.