ҶАВОНОН
Якшанбе 28 Ноябр 2021 08:32
8284
Самараи неки истиқло-лият ва баракоти сулҳу суботи сиёсии кишвар аст, ки дар мамлакати азизи мо ба масоили марбут ба ҳаёт ва фаъолияти ҷавонон таваҷҷуҳи хос зоҳир мегардад. Воқеан истиқлолият ҳамчун дастоварди олӣ ва нодири мардуми шарафманди кишвар ҷиҳати тавсеаи имконот ва шароити мусоиду арзанда барои насли ояндасоз заминаи мусоид фароҳам овард.

Асосгузори сулҳу ваҳдати миллӣ - Пешвои миллат, Президенти кишвар муҳтарам Эмомалӣ Раҳмон бамаврид таъкид намудаанд, ки маҳз истиқлолият роҳи ҷавононро ба сӯи бунёдкориву созандагӣ боз кард ва замина гузошт, ки намояндагони ин қишри ояндабунёд дар рушду инкишофи мамлакат саҳми назаррас ва шоиста дошта бошанд. Имрӯз аз мо, ҷавонон ҳамчун неруи пешбари ҷомеа, қишри ояндабунёд, қувваи фардосоз, такягоҳи боэътимод, неруи фардоафрӯз ва ояндаи миллату давлат ном мегиранд. Ин эътимод, боварӣ ва умеди Пешвои муаззами миллат барои мо, насли ҷавон на танҳо ифтихор аст, балки масъулият ҳам ҳаст, ки моро ҷиҳати сазовор будан ба ин ҳама дастгирӣ ва ғамхориҳо сӯйи ташаббускориву созандагӣ ҳидоят месозад.
Аз ибтидои Истиқлолият дастгирии давлатии ҷавонон дар меҳвари сиёсати Ҳукумати кишвар қарор дошта, бобати мустаҳкамии заминаҳои ҳуқуқии сиёсати давлатии ҷавонон санадҳои меъёриву ҳуқуқӣ ва стратегияву барномаҳои милливу давлатӣ қабул ва мавриди амал қарор дода шудаанд.

Дар баробари дигар минтақаҳо дар вилояти Суғд низ ҷиҳати иҷрои қарорҳои Ҳукумати Ҷумҳурии Тоҷикистон ва дар заминаи дас-туру ҳидоятҳои Пешвои миллат тадбирҳои муҳими амалӣ андешида шуда, нақшаи чорабиниҳо тасдиқ гаштаанд.

Қобили зикр аст, ки шумораи умумии ҷавонон дар қаламрави вилоят зиёда 900 ҳазор нафарро ташкил намуда, тибқи омори расмӣ теъдоди хизматчиёни давлатӣ аз ҳисоби ҷавонон то имрӯз ба 440 нафар мерасад. Дар шаҳру ноҳияҳои вилоят 277 нафар ҷавон дар ҳайати кадрҳои роҳбарикунанда, 91 нафар дар ҳайати Маҷлиси вакилони халқи шаҳру ноҳияҳо ва 359 нафар ҷавон дар ҳайати Маҷлиси вакилони халқи шаҳраку деҳот фаъолият намуда истодаанд.

Сазовор гардидани ҷавонони фаъолу болаёқати вилоят 5 нафар бо Ҷоиза ва 4 нафар ба стипендияи Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар соли ҷорӣ боиси ифтихор мебошад. Шумораи умумии гирандагони стипендияҳо дар вилоят 788 нафар аст, ки аз ин шумора 95 нафар гирандагони Стипендияи президентӣ, 130 нафар гирандагони стипендияи раиси вилоят барои донишҷӯён, магистрантон ва докторантони муассисаҳои таҳсилоти олӣ ва миёнаи касбӣ, 519 нафар гирандаи стипендияи раисони шаҳру ноҳияҳо мебошад.

Ҳамчунин, баҳри ҳавасманд-гардонӣ ва зиёд намудани сафи ҷавонони лаёқатманд дар вилоят, тайи солҳои охир барои ғолибони олимпиадаҳои ҷумҳуриявиву байналмилалӣ ва омӯзгорони онҳо туҳфаҳои пуливу хотиравӣ тақдим карда мешаванд.

Бо мақсади дастгирии оилаҳои ҷавон, ҷудо намудани қитъаҳои замин барои сохтмони манзил аз ҳисоби заминҳои бекорхобида ва заминҳои навбунёд, ки ба шароити зист мутобиқ кунонида шудааст, то имрӯз садҳо оилаи ҷавони вилоят соҳиби манзил гардидаанд.

Ҳамин тариқ, дастгириву рушди ҷавонони вилоят дар даврони 30 соли Истиқлолияти кишвар бениҳоят назаррас аст.

Ба туфайли дастгирӣ ва ғамхории рӯзафзуни Ҳукумати ҷумҳурӣ ва Мақомоти иҷроияи ҳокимияти давлатии вилояти Суғд аз солҳои 1996 то имрӯз дар қаламрави вилоят тарбияи ҷисмонӣ ва варзиш нафаси дубора гирифт. Имрӯз мақсаду маром ва сиёсати давлату ҳукумат ва ташкилоту муассисаҳои варзишӣ ба ривоҷу равнақи тарбияи ҷисмонӣ ва варзиш, солимгардонии оммаи васеи халқ ва тарбияи ватанпарастии ҷавонон мебошад.

Дар вилоят 2745 адад иншооти варзишӣ аз ҷумла, 48 варзишгоҳ аз ин 10 варзишгоҳҳо бо теъдоди зиёда аз 5000 ҷойи нишаст ва 38 варзишгоҳ бо теъдоди то 5000 ҷойи нишаст, 602 толори варзишӣ, 1893 майдончаи варзишӣ, 37 ҳавзи шиноварӣ аз ин 10 ҳавзҳои шиноварии пӯшида ва 27 ҳавзи шиноварии одӣ, 165 адад иншооти махсуси варзишӣ аз ин 10 адад тир, 5 адад боулинг, 57 марказҳои фитнесӣ, 65 билярд, 10 тенниси рӯи миз, 1 адад яхи сунъӣ, 2 адад базаи қаиқронӣ, 1 адад базаи дучархаронӣ; 6 маҷмааи варзишӣ, 5 марказҳои солимгардонӣ ва 2 бошгоҳҳои варзишӣ фаъолият доранд.

Ҳамзамон, дар нимсолаи аввали соли 2021 дар шаҳру ноҳияҳои вилоят дар маҷмӯъ 22 иншооти варзишӣ, аз ҷумла 15 майдончаи варзишӣ, 2 толори варзишӣ ва 1 маҷмааи варзишӣ мавриди истифода қарор дода шуд.
Бо мақсади ҷалби наврасону ҷавонон ба варзиш дар вилоят 44 мактаби варзишӣ амал менамояд. Дар мактабҳои варзишӣ 1267 гурӯҳ бо фарогирии 16198 машқварзи наврасу ҷавон аз намудҳои олимпӣ ва 263 гурӯҳ аз намуди миллӣ бо фарогирии 3295 наврасу ҷавон амал намуда, дар маҷмӯъ 19493 нафар наврасу ҷавон ба машқу тамрин фаро гирифта шудаанд.

Аз ҳисоби ғолибон ва ҷоизадорони мусобиқаҳо, дастаи мунтахаби вилоят муайян гардида, дар 29 мусобиқаи ҷумҳуриявӣ дар ҳайати 1104 нафар варзишгар иштирок намуда, ба гирифтани 314 медали тилло, 216 медали нуқра ва 242 медали биринҷӣ мушарраф гардидаанд.

Варзишгарони вилоят аз солҳои 1991 сар карда, то ин дам дар мусобиқаҳо, чемпионатҳои шаҳрию ноҳиявӣ, вилоятӣ, ҷумҳуриявӣ ва байналмилалӣ, ки дар миқёси вилоят, ҷумҳурӣ ва давлатҳои мухталиф баргузор мегарданд, иштирок намуда, таҷрибаи худро бою ғанӣ мегардонанд.

Дар қатори мактабҳои варзишии давлатӣ барои ташкили клубҳо, ҷамъиятҳо, федератсияҳо, ассотсиатсияҳои варзишӣ диққати махсус дода мешавад. Дар вилоят 21 адад ташкилотҳои ҷамъиятие, ки фаъолияташон ба самти варзиш равона карда шудаанд мавҷуданд.

Ҳамасола дар қаламрави вилоят аз рӯи намудҳои гуногуни варзиш: бокс, вазнбардорӣ, варзиши сабук, гӯштини тарзи самбо, гӯштини тарзи озод, гӯштини юнонӣ - римӣ, тенниси рӯи миз, волейбол (занон, мардон), баскетбол (мардон, занон), футбол, заврақронӣ, теннис, шоҳмот ва шашка, велосипедронӣ, бадминтон, ушу, тирпарронӣ, намудҳои техникии варзишӣ ҳамагӣ беш аз 30 намуд мусобиқаҳо ва чемпионатҳои вилоятӣ баргузор мегарданд.

Аз соли 2000 то ин ҷониб 21 муассисаи тайёрии варзишӣ дар шаҳру ноҳияҳои вилоят ташкил ва ба фаъолият шурӯъ намуд, ки ҳамаи ин аз самараи Истиқлолият сарчашма мегирад.

Ҷавонони вилоят доимо мактаби бузург ва созандаи Пешвои миллатро сармашқи кори худ намуда, манфиати миллат ва амнияти давлати соҳибистиқлоли худро дар раванди пурталотуми бархӯрдҳои ҷаҳонӣ ҳимоя хоҳанд кард.

Боиси ифтихор аст, ки дар татбиқи чор ҳадафи стратегии Тоҷикистон Пешвои муаззами миллат ба нерӯи созандаи ҷавонон такя ва эътимоди бузург доранд.

Хушбахтии ҷавонон аст, ки дар фазои сулҳу суботи комил, тараннуми якдиливу якпорчагии ватани маҳбуб, таҳкими давлатдории навини миллӣ ва марҳилаи рушди устувору босуботи ҷомеа умр ба сар бурда, баҳри амалӣ намудани сиёсати дурандешона ва муваффақонаи Пешвои миллат, ки рамзи иттиҳоду сарҷамъӣ ва кафили саодату осудагии ҳар як сокини кишвар мебошад, камари ҳиммат баста, ҳамеша дар сафи пеши соҳибватанон қадамҳои устувор мегузоранд. Раванди давлатдориву давлатсозӣ ва дарки масъулият дар назди наслҳои гузашта, имрӯза ва оянда аз ҳар яки мову шумо тақозо менамояд, ки рисолати бар душ гирифтаи худро дуруст анҷом диҳем.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5

Ноябр 2021 c.