Ветеринарӣ яке аз бахшҳои муҳим дар кишоварзӣ ба шумор рафта, мутахассисони он дар рушди соҳаи кишоварзӣ саҳми бузург доранд. Аммо чи гунае ба назар мерасад, имрӯз ба соҳаи ветеринарӣ ҷавонон на он қадар майл доранд. Бо вуҷуди ин ҳастанд нафароне, ки барои рушди ин бахши кишоварзӣ талош меварзанд. Аз ҷумлаи чунин нафарон Сулаймон Назруллозода мебошад. Ӯ яке аз мутахассиони варзидаи соҳа буда, чанде пеш дар озмуни “100 ақида барои ИДМ”, ки дар шаҳри Бокуи Ҷумҳурии Озарбойҷон баргузор гардид, бо ихтирои як навъи нави дору барои ҳайвонот созовори ҷои якум шуд.

Мо доир ба ғолибият дар ин озмун ва паҳлуҳои дигари соҳаи ветеринарӣ бо Сулаймон Назруллозода, номзади илмҳои ветеринарӣ, ки айни ҳол муовини директор оид ба илм, таълим ва тайёр кардани кадрҳои илмии Институти тибби ветеринарӣ аст, суҳбат кардем.

- Дар аввал аз хусуси нозукиҳои соҳаи ветеринарӣ каме ҳарф мезадед?

- Самти асосии фаъолияти тибби ветеринарӣ ташхиси бармаҳали бемориҳои сироятии ҳайвонот ва зоонозҳо, яъне бемориҳои мансуби одамон ва ҳайвонот бо истифода аз технологияҳои муосир мебошад.

- Дар бораи озмуни дар Боку баргузоргардида ва ғолиби он шудан маълумот медодед?

- Ин озмун моро аз соҳаи ветеринарӣ ва нозукиҳои он бештар хабардор намуд. Зеро дар озмун бисёр мутахассисони хуби ин соҳа баромад намуданд. Ҳангоми ғолиб шудан дар чунин чорабиниҳои сатҳи баланд одамро эҳсосоти аҷибе фаро мегирад, яъне эҳсосоти ватандӯстию меҳанпарастӣ ва ифтихори миллӣ. Албатта, ин орзуи ҳар як иштирокчии озмун аст.

- Дар озмун чӣ чиз ба шумо кӯмак росонд, ки ғолиб шавед?

- Чун ба Академияи илмҳои кишоварзӣ мактуб омад, ки байни давлатҳои ИДМ озмуни “100 ақида барои ИДМ” барои мутахассисони беҳтарини соҳаи ветеринарӣ баргузор мегардад, устодони ин дабистон, маро пешниҳод намуда, хостанд бо ихтирооти нави дору барои ҳайвонот дар озмун ширкат варзам. Аз ҳамон рӯз сар карда, бо кӯмаки устодон барои ғолиб гаштан дар озмун ва муаррифии кишвар кӯшишҳои зиёд намудам.

Дар Институти тибби ветеринарии Академияи илмҳои кишоварзии Тоҷикистон бо дастгирӣ ва роҳнамоиҳои устодон номгӯи гуногуни маводи дорувории ветеринарӣ, аз қабили маводи дорувории “Намитаб- С”, ки бо ин намуди дору бемориҳои узвҳои ҳозимаи ҷавонаҳои ҳайвоноти кишоварзӣ, “Эхиноаллерген” барои ташхиси барҳаётии бемории эхинококкози ҳайвонот, ваксина аз антигени протективӣ барои пешгирии брутселлёзи ҳайвонот, “Манесид” барои пешгирӣ ва табобати бемориҳои инвазионии ҳайвонот пешкаши ҳакамон гардонидам.

Ҳамин ихтирооти ман буд, ки байни чанд иштирокчӣ дар номинатсияи “Системаҳои зинда” ғолиб омадам.

- То ба шаҳри Боку расидан ва баромад дар озмун ба кадом мушкилӣ дучор гаштед?

- Албатта, бузургон мегӯянд, ки “Бе дарду ранҷ ганҷ муяссар намешавад”, яъне барои номзади илм шудан ва ҳимояи рисола намудан зинаҳои гуногун ва хеле мушкилро тай кардан лозим аст. Ростӣ, барои иштирок дар озмун ман тайёрии ҷиддӣ дидам. Пайваста ба омӯзиш машғул шудам. Барои равшантару фарохтар ёд гирифтан, аз устодонам пурсон мешудам. Ба худам ваъда додам, ки бояд ғолиб шавам. Ва ҳамин тавр ҳам шуд. Ҳангоми баромадам аъзои ҳакамон ихтирои доруҳои маро хуб қабул намуда, баҳои баланд доданд. Ҳангоми ихтироот ва дар амал татбиқ кардани он навор гирифтам ва дар рафти баромад презентатсия нишон додам.

- Айни ҳол бо кадом кор машғулед ва дар оянда чӣ нақша доред?

- Ғолиб шудан дар як озмун маънои онро надорад, ки ман аз дигарон беҳтар ҳастам. Айни ҳол аз пайи омӯзишам. Нақша дорам, ки дар самти тарҳрезии маводҳои нави дорувории ватанӣ бештар тадқиқот анҷом диҳам ва илми ватаниро дар дигар озмунҳо ва арсаи ҷаҳонӣ тавассути нашри мақолаҳои илмӣ ва таҳияи китобу монографияҳо муаррифӣ намоям.

- Ба фикри шумо чаро шавқи ҷавонон ба ин соҳа кам аст ва чӣ бояд кард, то довталабон зиёд шаванд?

- Ҷавонони даврони соҳибистиқлол бояд худро дар ҳама соҳаҳо бисанҷанд. Гарчанде ки замони илму техника аст, бояд аз дигар соҳаҳо низ бохабар бошанд. Кор бо ҳайвонот майнаи сари одамро ором мекунад. Ба кас илҳоми тоза мебахшад. Пас, ҷавононро мебояд кӯшиш кунанд, ки аз омӯзиши ин соҳа дур набошанд. Чун мо дар кишвар шумораи зиёди корхонаҳои парандапарварӣ ва фермаҳои гову гусфандпарварӣ дорем.