Боиси ифтихор аст, ки мо – ҷавонон дар чунин давлати тинҷу осоишта умр ба сар мебарем ва аз он меболем, ки Пешвои муаззами миллат, муҳтарам Эмомалӣ Раҳмон, мо – ҷавонони саодатманди кишварро дастгирӣ мекунанд. Ин аст, ки маҳз бо ҳидоят ва раҳнамоиву пуштибонии Пешвои миллат масоили дастгирии давлатии ҷавонон ҳамчун ояндагони миллат дар саргаҳи сиёсати дурнигаронаи Ҳукумати ҷумҳурӣ қарор гирифтааст.

Мо – ҷавонони давраи Истиқлолият бо дарки масъулияти бузург баҳри ба боварии Роҳбари Олии Ҳукумати кишвар сазовор гардидан имрӯзҳо кӯшиш ба харҷ медиҳем ва аз тамоми имкониятҳо истифода бурда, суханони пурмуҳтавои Президенти мамлакат ба Маҷлиси Олиро, ки иброз дошта буданд: “Мо бо ҷавонони созандаи худ ифтихор мекунем, чунки ҷавонони даврони соҳибистиқлолии Ватанамон имрӯз бо нангу номуси миллӣ, ташаббусҳои шоиста ва эҳсоси баланди ватандорӣ дар рушди Тоҷикистони азиз ҳиссаи арзишманд мегузоранд ва ба Модар-Ватани худ содиқона хизмат мекунанд”, сармашқи кори худ қарор медиҳем.

Таърих гувоҳ аст, ки дар ҳар давру замон ҷавонон қувваи пешбаранда ва ояндасози ҷомеа буда, барои таҳкими давлатдорӣ, ҳифзи марзу бум, ваҳдату ягонагӣ ва осоиштагии мардум талош меварзанд. Онҳо дар маркази тамоми рӯйдодҳо қарор дошта, ҳамчун аъзои фаъоли ҷомеаи муосир бо ҳисси ватандӯстӣ ва ифтихори миллӣ барои рушду тараққиёти кишвар саҳмгузоранд.

Дар сиёсати пешгирифтаи Ҳукумати кишвар масъалаи ҷавонон ва боло бурдани маърифати онҳо мақоми хосро дорост. Ин аст, ки Пешвои миллат соли 2017-ро “Соли ҷавонон” эълон доштанд. Ҷавонон нерӯи созанда, рушди зеҳнии кишвар ва иқтидори воқеии пешрафти ҷомеа буда, қувваи бузург ҳастанд ва ҳар миллат дар ҳар давру замон аз ҷавонони худ умеди ояндаи нек мекунанд, зеро ҷавонон дар ҷомеа нақши махсус мебозанд.

Мо, як гурӯҳ кормандони ҷавони Суди Олӣ, ҷавобан ба ин ҳама ғамхориву дастгириҳои Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон ваъда медиҳем, ки тамоми саъю талоши худро ба донишандӯзӣ, ободиву пешрафти сарзамини аҷдодӣ, интихоби касбу ҳунарҳои замонавӣ, ҳифзи Ватан, амнияти давлат ва навовариву бунёдкорӣ равона сохта, парчамбардори Тоҷикистони азиз мешавем. Тамоми супоришҳои Сарвари давлатро сармашқи кори худ қарор дода, барои мустаҳкам кардани пояи давлат ва гиромидошти арзишҳои миллӣ саъю талош менамоем кӯшиш ба харҷ медиҳем, то сазовори ин Ватан бошем.

Ҳасанзода Абдузуҳур ХУШМАҲМАД, мутахассиси Коллегияи ҳарбии Суди Олии ҶТ