Масъалаи илмомӯзии насли наврасу ҷавон ҳамеша дар меҳвари сиёсати роҳбарияти олии кишвар қарор дорад. Талқини илмомӯзӣ, бахусус фанҳои дақиқ аз нуқтаҳои меҳварии Паёми имсолаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ буд.

Пешвои миллат дар ҳама мулоқоту суҳбатҳои худ бо намояндагони аҳли зиё, олимону ихтироъкорон ва дар маҷмӯъ бо қишрҳои гуногуни ҷомеа ба масъалаи китобхонию илмомӯзӣ, мактабсозиву мактабдорӣ ва ихтирои технологияи навин аҳамияти хосса зоҳир намуда, дар ин раванд бевосита мусоидат менамоянд. Аз ҷумла, Президенти мамлакат дар Паёми имсолаи хеш ба Маҷлиси Олӣ чунин таъкид доштанд: “Роҳбарону кормандони соҳаи маорифро зарур аст, ки сатҳу сифати таълимро дар ҳар як муассисаи таълимӣ, сарфи назар аз шакли моликияти онҳо ва дар ҳамаи зинаҳои таҳсилот баланд бардоранд. Инчунин, назорати азхудкунии донишҳои замонавиро пурзӯр гардонида, наврасону ҷавононро ба мутолиаи китобҳои бадеиву илмӣ ташвиқ намоянд, қобилияти эҷодии онҳоро тақвият бахшанд ва ба таълими фанҳои табиатшиносӣ, дақиқ ва риёзӣ таваҷҷуҳи бештар зоҳир намоянд”. Вобаста ба ин пешниҳод намудаанд, ки барои тавсеаи тафаккури техникии насли наврас солҳои 2020-2040 “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” эълон карда шавад. Ҳукумати мамлакат боварии комил дорад, ки ин иқдом ба рушди тафаккури техникӣ ва тавсеаи ҷаҳонбинии илмии ҷомеа такони ҷиддӣ мебахшад.

Паёми имсола аз аввал то ба охир фарогири масъалаи илму донишомӯзӣ буда, таъкид шудааст, ки маҳз тавассути омӯхтани илмҳои замонавӣ метавон ба рушди бештари илм, техникаю технологияи нав, нанотехнология ва дигар самтҳои муҳими илми ҷаҳонӣ дастрасӣ пайдо намуд. Муҳимтар аз ҳама таъкиди ҳамин аст, ки вазифаи насли нав ин рӯ овардан ба илми пешрафтаи ҷаҳонӣ, гузаронидани таҷрибаву ихтирооти ҷадид ва дар ин замина таъмини пешрафти илми тоҷик мебошад.

Воқеан, рушди илму инноватсия маҳаки асосии пешрафти тамоми соҳаҳо дар кишварҳои тараққикарда мебошад. Тавре Сарвари давлат дар яке аз вохӯриҳояшон бо намояндагони илму маориф таъкид намудаанд: “Имрӯз бе илму инноватсия, технологияҳои иттилоотиву коммуникатсионӣ ва ташаккули ҷаҳонбинии техникӣ қадаме ба пеш гузошта намешавад”.

Ҳамчунин дар ин замина аз ҷониби Президенти кишвар пешниҳод гардидааст, ки муассисаҳои соҳаи маориф ва илм ҳамасола олимпиадаҳои ҷумҳуриявӣ, вилоятӣ, шаҳрӣ ва ноҳиявиро оид ба илмҳои табиатшиносӣ, дақиқ ва риёзӣ дар ҳамаи зинаҳои таҳсилот баргузор намуда, ғолибони озмунҳо аз ҷониби вазорату идораҳо, мақомоти иҷроияи ҳокимияти давлатии вилоятҳо ва шаҳру ноҳияҳо аз лиҳози модиву маънавӣ қадрдонӣ ва ҳавасманд гардонида шаванд.

Бешак, чунин дастгириву ғамхориҳо ва ҳавасмандсозиҳо донишҷӯёну омӯзгорон ва дигар толибилмонро водор месозад, ки барои пешрафту шукуфоии соҳаи маорифу илми миллӣ нақши босазо дошта бошанд. Боиси хушнудист, ки дастовардҳои хонандагону толибилмони кишвар низ дар ин самт назаррас ва сазовори таҳсин аст.

Нуктаи дигари хеле фараҳбахши Паём ин бо мақсади ҷалби ҷавонон барои омӯзиши илмҳои риёзиву дақиқ ва табиӣ эълон ва роҳандозӣ шудани озмуни ҷумҳуриявии “Илм - фурӯғи маърифат” мебошад. Ин тадбир хеле муҳиму саривақтӣ буда, барои рушди илму инноватсия ва ба камол расидани кадрҳои болаёқат мусоидат хоҳад кард. Ҳамзамон, дар Паёми имсолаи Президенти мамлакат ба таври ҳатмӣ омӯхтани забонҳои хориҷӣ, махсусан забонҳои русиву англисӣ ва технологияҳои иттилоотӣ ва ба рушди иқтисоди миллии кишвар равона намудани корҳои илмиву тадқиқотӣ таъкид гардидааст, ки талаби замон мебошад.

Воқеан, миллати тоҷик аз гузашта то ба имрӯз ба илм ва таълиму тарбия эҳтироми махсус дошта, дар тӯли таърихи хеш фарзандонеро ба дунё овардааст, ки дар рушди илми ҷаҳонӣ ҳиссаи бузург гузоштаанд. Махсусан, дар замони давлатдории Сомониён баробари адабиёту ҳунар илмҳои табиатшиносӣ низ инкишоф ёфта, осори олимони барҷастаи тоҷик шуҳрати ҷаҳонӣ пайдо намуданд. Кашфиёту дастовардҳои илмии Закариёи Розӣ, Муҳаммади Хоразмӣ, Абӯнасри Форобӣ, Абӯрайҳони Берунӣ, Абӯалӣ ибни Сино ва дигарон тӯли чандин асрҳо аз тарафи олимони аксар кишварҳои олам васеъ истифода шудаанд.
Бо итминони комил метавон гуфт, ки чунин тадбирҳо сатҳи саводу маърифатнокии мардум ва дар навбати аввал наврасону ҷавононро баланд бардошта, ҳисси ватандӯстиву ватанпарварӣ, ҳувияти миллӣ, арҷгузорӣ ба муқаддасоти миллиро тақвият мебахшад.