Дар асоси нақшаи чорабиниҳои дуҷонибаи Вазорати корҳои дохилӣ ва Вазорати маориф ва илми Тоҷикистон оид ба вохӯрии ҳайати роҳбарикунандаи мақомоти корҳои дохилӣ бо донишҷӯёни литсейҳои касбӣ–техникӣ, коллеҷҳо ва донишгоҳу донишкадаҳои олии кишвар, вобаста ба тарғиби моҳияти Қонуни Ҷумҳурии Тоҷикистон “Дар бораи танзиму анъана ва ҷашну маросимҳо дар Ҷумҳурии Тоҷикистон”, 10-уми октябр вохӯрии сардори Сарраёсати Хадамоти давлатии оташнишонии ВКД (СХДО ВКД), генерал–майори хизмати дохилӣ Нозимҷон Иброҳимзода бо ҳайати профессорону омӯзгорон ва донишҷӯёни филиали Донишгоҳи миллии тадқиқотии “Донишкадаи энергитикии Москва” дар шаҳри Душанбе баргузор гардид.
   
Иброҳимзода Нозимҷон дар суханронии худ аз дастгириву ғамхориҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон нисбати ҷавонон ва таваҷҷуҳи махсус зоҳир намудан нисбати ин нерӯи созанда ёдовар гардида, дар мавзӯи “Нақши Қонун “Дар бораи анъана ва ҷашну маросимҳо дар Ҷумҳурии Тоҷикистон” дар ҳаёти ҷавонон” ибрози андеша намуд. Сардори Сарраёсат иброз намуд, ки озодии бесарҳади баргузории ҷашну маъракаҳо дар заминаи таассуб ва ғаризаҳои худпарастӣ ба вазъи молии шаҳрвандон зарар расонида, мардумро аз тарбияи фарзандон дур карда, моҳият ва табиати асили ҷашну маросимҳоро ҳамчун унсури зоҳирии фарҳанг хароб карда, зиддият ва тақсимшавии қишрҳои мухталифро дар заминаи дороию камбизоатӣ афзун намудааст. Бинобар ин, мақсади дар шакли нав қабул намудани ин санади муҳим, пеш аз ҳама, ҳимояи манфиатҳои иҷтимоии мардум буда, барои мусоидат ва паст намудани сатҳи камбизоатӣ дар кишвар ва баланд бардоштани сатҳи зиндагии мардум равона гардидааст.

Дар интиҳои ҷамъомад аз тарафи Сардори Сарраёсат ба саволҳои сершумори омӯзгорону донишҷӯён посухҳои муфассал дода шуд.
Ҳамчунин, ба ҳамин мазмун аз ҷониби муовини сардори Сарраёсати Хадамоти давлатии оташнишонии ВКД полковники хизмати дохилӣ Холзода Хол Барот бо омӯзгорону донишҷуёни Коллеҷи техникии шаҳри Душанбе ва аз тарафи сардори Шуъбаи назорати давлатии бехатарӣ аз сӯхтори СХДО ВКД, полковники хизмати дохилӣ Фаррух Ҳалимзода бо омӯзгорону донишҷуёни Донишкадаи фарҳанг ва санъати Тоҷикистон ба номи Мирзо Турсунзода вохӯрии судманд доир шуд.
  
Кароматулло АБДУЛЛОЕВ, Толиб ҲАЁТОВ, кормандони СХДО ВКД