Бо иқдоми Бахши ҷавонон, варзиш ва сайёҳии ноҳияи Восеъ чанде пеш, дар толори мақомоти иҷроияи ҳокимияти давлатии ноҳия бахшида ба “Соли ҷавонон” ва ба ифтихори 20 солагии Ваҳдати миллӣ вохӯрӣ доир гардид.

Дар он Исмоил Шерхонов, сармутахассиси кор бо ҷавонони Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, Лола Ғуломова, муовини раиси ноҳия, Фарзона Шарипова, мудири бахши варзиш, ва сайёҳӣ, Фатоҳзода Абдуғаффор, муовини сардори ШВКД, дар ноҳия иштирок доштанд.

Исмоил Шерхонов, иброз намуд, ки эълон гардидани соли 2017 ҳамчун «Соли ҷавонон» ин нишонаи олии эҳтирому эътиқоди Президенти Ҷумҳурии Тоҷикистон ба ҷавонони соадатманди диёр ва дар меҳвари сиёсати иҷтимоии Ҳукумат қарор доштани ин қишри ояндасози кишвар мебошад.

Зимни вохӯрӣ масъулин оид ба мавзуҳои пешгирии омилҳои номатлуб миёни ҷавонон, аз қабили ҷинояткорӣ, шомилшавӣ ба ҳизбу ҳаракатҳои террористию экстремистӣ, таҷовуз ба номус, зуроварӣ, худкушӣ ва хариду фурӯши одамон суханронӣ намуданд.

Дар вохӯри беш аз 350 нафар донишҷӯён ва ҷавонони ноҳия иштирок доштанд.

Умед Мирзоев, “ҶТ”