Дар натиҷаи таркиш дар назди бинои Додгоҳи олии Афғонистон дар Кобул 20 нафар ҳалок, 48 тани дигар захмӣ шудаанд.

Ба иттилои мақомот, миёни кушташудаҳо занон ва кӯдакон низ ҳастанд. Пулиси Афғонистон мегӯяд, маргталабе 7 феврал дар таваққуфгоҳ, баъди он ки кормандони додгоҳ аз кор баромада, ба автобус нишастанд, худро тарконд.

То ҳол масъулияти ин ҳамларо гурӯҳе ба зимма нагирифтааст. Вале соли 2013 ҳаракати Толибон ҳамлаи ҳамсонеро дар назди бинои додгоҳ анҷом дод, ки дар натиҷаи он 13 сокини осоишта ҷон доданд.

Соли гузашта бар асари ҳамлаҳои террористӣ дар Афғонистон наздики 11,5 ҳазор сокини осоишта кушта шудаанд, ки сеяки онҳо кӯдакон будаанд. Ин маълумотро СММ 6 феврал нашр карда, онро мудҳиштарин арқоми чанд соли охир хонд.