Дар Маҷмааи таърихиву фарҳангии “Қалъаи Хуҷанд”-и шаҳри Хуҷанд бахшида ба “Соли ҷавонон”, таҳти унвони “Шоми ҷавонӣ” чорабинии фарҳангӣ баргузор гардид.

Дар маросими ифтитоҳии чорабинии фарҳангӣ зиёда аз 2000 нафар ҷавонону варзишгарон ва сокинон шаҳр иштирок намуданд.

Раъно Ҳошимзода, муовини раиси шаҳри Хуҷанд зимни суханронии худ изҳор дошт, ки “Пешвои миллат, муҳтарам Эмомалӣ Раҳмон бо назардошти саҳми ҷавонон дар рушди ҷомеа ва иштироки фаъолонаи онҳо дар ҳаёти сиёсиву иқтисодии мамлакат соли равонро дар мамлакат “Соли ҷавонон” эълон карданд. Ин боварӣ ва эътимоди Сарвари давлатамон ба ҷавонон, имрӯз аз ҳар ҷавон, дар ҳамаи самтҳои фаъолият, масъулияти баланди хештаншиносиро тақозо намуда, ҳар яки моро дар масъалаи истифодаи самараноки нерӯи созандаи ҷавонон, тарбияву интихоб ва ҷобаҷогузории кадрҳои ҷавону лаёқатманд ва соҳибмаърифат, тарғибу ташвиқи пайвастаи донишандӯзӣ ва камолоти ҷисмониву маънавии ҷавонон, тарзи ҳаёти солим, азхуд кардани касбу ҳунарҳои замонавӣ байни ҷавонон ва ҷомеа ҷиддан вазифадор менамояд”.

Ёдовар мешавем, ки чорабинии мазкур ҳар ҳафта, рӯзҳои шанбе баргузор мешавад.

Шералӣ АЗИМӢ, “ҶТ”