Бо иштироки кормандони мақомоти иҷроияи маҳаллии ҳокимияти давлатии ноҳияи Ишкошим, Бахши кор бо ҷавонон ва варзиш, Шуъбаи маориф ва илм, толибилмону омӯзгорони мактабҳои таҳсилоти миёнаи умумии № 21, 20, 44 таҳти унвони “Истиқлолият–неъмати пурарзиш ва комёбиҳои он” конфронси илмӣ–назариявӣ баргузор гардид.

Ба иттилои Гулбек Ҳабибов, сармутахассиси Бахш қабл аз оғози чорабинӣ иштирокдорон аз намоиши молу маҳсулоти мардумӣ, адабиёт перомуни дастовардҳои даврони соҳибистиқлолӣ, китобу асарҳои Асосгузори сулҳу Ваҳдати миллӣ – Пешвои миллат, муҳтарам Эмомалӣ Раҳмон дидан намуданд.

Дар конфронс Ғуломмамад Савлатов, намояндаи мақомоти иҷроияи маҳаллии ҳокимияти давлатии ноҳия, Саодатқадам Паҳлавоншанбиев, директори Маркази рушди истеъдодҳои Шуъбаи мазкур, Завқибек Душанбиев, Мавҷуда Дилафрӯзова, Некбахт Қурбоншоева, мушовирони кабинети методии шуъба дар мавзуъҳои “Рушди Тоҷикистон дар замони Истиқлолият”, “Соҳибистиқлолӣ ва ҳастии миллат”, “Рушди маориф дар давраи Истиқлолият”, “Мақому манзалати бонувон дар вақти соҳибстиқлолӣ” маърӯза карданд.

Ҳамчунин, хонандагони макотиби мазкур дар васфи Ватан–модар, соҳибихтиёрӣ ва Тоҷикистон шеъру тарона қироат намуданд.

Машҳур ИМОМНАЗАРОВ, “ҶТ”