Дар доираи нақшаи чорабиниҳо бахшида ба 30-солагии Истиқлолияти давлатии Ҷумҳурии Тоҷикистон дар ҷамоати деҳоти Ҳайдар Усмонови ноҳияи Бобоҷон Ғафуров 1 толори варзишии замонавӣ мутобиқ ба стандарти байналмилалӣ бо иштироки масъулини мақомоти иҷроияи ҳокимияти давлатии ноҳия, фаъолон, сокинон, махсусан наврасону ҷавонон ва варзишгарон, мавриди истифода қарор дода шуд. Ин иқдомҳо бо дастуру супоришҳои наҷиб ва сиёсати варзишпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рӯи кор гирифта шудааст.

Толори мазкур бо тамоми таҷҳизоти зарурӣ муҷаҳҳаз гардонида шуда, бо иқдоми раиси вилояти Суғд, дастгирии мақомоти иҷроияи ҳокимияти давлатии ноҳия ва соҳибкорони маҳаллӣ бунёд гардид, ки дар назди он меҳмонхона барои меҳмонону варзишгарон бо тамоми таҷҳизоту лавозимоти зарурӣ, утоқи либосивазкунӣ, утоқи машқ ва ҳаммом мавҷуд мебошад.

Бояд ёдовар шуд, ки толори мазкур макони баргузории тамоми чорабиниҳои сатҳи ҷумҳуриявию байналмилалӣ хоҳанд буд.

Шодмон НУРМАТОВ, "ҶТ"