Дар майдони Нишони давлатии Ҷумҳурии Тоҷикистон ҳамоиши ҷавонон таҳти унвони "Экстремизм ва терроризмро маҳкум менамоем!" доир гардид.

Нахуст мудири Бахши кор бо ҷавонон ва варзиши шаҳри Бӯстон Хусравшоҳ Исмоилзода оид ба пешгирии шомилшаии шаҳрвандон, бахусус ҷавонон, ба ҳизбу ҳаракатҳои иртиҷоӣ ибрози назар намуда, зикр дошт, ки бояд мо, ҷавонон, ҷавобан ба ғамхориҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сазовор кору таҳсил намуда, баҳри татбиқи сиёсати муваффақонаи давлату Ҳукумат саҳмгузорӣ намоем.

Сипас мудири шуъбаи рушди иҷтимоӣ ва робита бо ҷомеаи дастгоҳи раиси шаҳри Бӯстон Мамнур Нурзода оид ба ҳифзи сулҳу ваҳдати миллӣ ва аз даст надодани зиракии сиёсӣ аз ҳамсолони худ даъват ба амал овард.

Сармутахассис - котиби комиссия оид ба ҳифзи ҳуқуқи кӯдаки мақомоти иҷроияи ҳокимияти давлатии шаҳри Бӯстон Ҷумъабой Исомитдинов муроҷиатномаи ҷавонони шаҳри Бӯстонро ба кулли ҷавонони Тоҷикистон таҳти унвони "Ояндаро бе терроризм ва экстремизм бунёд менамоем!" қироат намуд.

Шодмон НУРМАТОВ, "ҶТ"